Kunyamo wo 1999 Olombangi Via Yehova via fetika upange woku tunga Olonjango Viusoma kolofeka vina okuti olohukũi. Casapalo keteke 1 Yelombo yunyamo wo 2014, ci soka 823 komanu vo Benin, ko Nigéria, va kala Vonjango Yolohongeke Vinene oco va linge ocipito cimue ci likasi: Oku tungiwa kueci ci soka 3.000 Violonjango Viusoma vofeka lekuatiso liesokiyo liaco.

Vokuenda kuohongele, kua lomboluiwa ulandu wupange wosi woku tunga ovitumãlo viefendelo kofeka yo Nigéria oku upisa kunyamo wo 1920. Kefetikilo olohongele via enda oku lingiwila kolonjo via vamanji ale kovitumãlo vimue vioku fetela. Ulandu umue wosimbu watiamẽla kocitumãlo ca enda oku lingiwila olohongele Violombangi Via Yehova ko Nigéria, osapalalo yimue ya tungiwa volupale luo Ilesa vokuenda kunyamo wo 1935. Kunyamo wo 1938 kuenda 1990, e tendelo liakongelo lia livokiya oku upisa 14 toke 2.681 okuti evokiyo liaco li panda eci ci soka 200 kolonjanja. Alua pokati kakongelo aco, ka va tẽlele oku tunga ovitumãlo vioku lingila olohongele. Valupale amue Vonjango yimosi Yusoma mu liongoluila eci ci soka epandu kakongelo. Valupale akuavo, etendelo liomanu lialua okuti eci va linga ohongele, Vonjango Yusoma omanu ka va suimo. Omo liaco, omanu va enda oku talama posamua polonjanela oco va yevelele olohongele. Akongelo alua a enda oku liongoluila kolonjo ale volosikola.

Kunyamo wo 1990, Ombala yolombangi Via Yehova ko Nigéria ya fetika oku undika olombongo oco vi Kuatise Kupange Woku Tunga Olonjango Viusoma. Toke kunyamo wo 1997 ocisoko Coku Tunga Olonjo Viusoma, ca kuatisa eci ci soka 105 kakongelo oku tunga ale oku semulula Olonjango viavo Viusoma. Oku u pisa kunyamo wo1997 toke 1999 kuatungiwa 13 Kolonjango Viusoma. Olonjango Viusoma via enda oku tungiwa vokuenda kuoloneke 7 ale 15 koloneke.

Ndaño lelikolisilo liaco, etendelo Liolombangi via Yehova vo Nigéria lia kala oku livokiya. Kosãi ya Kupupu yunyamo wo 1998 ombala Yolombamgi Via Yehova vofeka ya kũlĩhisa lutate kuenje va limbuka okuti handi ku sukiliwa oku tungiwa ci soka 1.114 Kolonjango Viusoma.

Don Trost okuti o panga onepa Kocisoko Cakulu ko Betele, vo Nigéria wa sapuila olonjeveleli volupale luo Benin hati: “Ocikele caco ka ca lelukile! Tua enda oku lipula ndoco: ‘Tu tẽlisa ndati upange waco?’” Tua tambula etambululo liaco kunyamo wo 1999 eci ovimunga vioku tunga Olonjango Viusoma vi kuete epandu ale ecelãla komanu va fetika oku kuatisa akongelo vofeka. Loku kuama esokiyo limue lia leluka ovimunga viaco vokuenda kueci ci soka 14 kanyamo va tunga 17 Kolonjango Viusoma vosãi.

Manji Don Trost vokuenda kuohundo yaye wa pandiya olonjeveleli omo lielikolisilo va linga kuenda wa popia okuti handi kuli upange walua woku linga. Kunyamo wo 2013 ci pitãhala olohulukãi 8 komanu va linga Olombangi Via Yehova. Don Trost wa popia hati: “Oco tu limbuke evokiyo tu ka kuata kovaso yoloneke, tu sukila handi oku tunga 100 Colonjango Viusoma vokuenda kunyamo.” Toke kunyamo wo 2013, etendelo Liolombangi Via Yehova vo Nigéria, lia tẽla eci ci soka 351 kolohulukãi vi kasi vakongelo a soka 5.700.