بائبل میں بتایا گیا ہے کہ جب مِدیانی یوسف کو مصر لے گئے تو بعد میں یعقوب اور اُن کا خاندان ملک کنعان سے مصر منتقل ہو گیا۔‏ وہ مصر کے علاقے جشن میں آباد ہو گئے جو کہ نیل ڈیلٹا * کا حصہ تھا۔‏ (‏پید 47:‏1،‏ 6‏)‏ اِسرائیلیوں کی تعداد بڑھتی گئی اور وہ ”‏نہایت زورآور“‏ ہو گئے۔‏ مصریوں کو یہ خوف ستانے لگا کہ کہیں اِسرائیلی اُن پر حاوی نہ ہو جائیں۔‏ اِس لیے اُنہوں نے زبردستی اُنہیں اپنا غلام بنا لیا۔‏—‏خر 1:‏7-‏14‏۔‏

جدید زمانے کے کچھ تنقیدنگار بائبل کے اِس بیان کو من‌گھڑت خیال کرتے ہیں۔‏ لیکن اِس بات کا ثبوت موجود ہے کہ قدیم مصر میں سامی لوگ * غلامی کی زندگی گزارتے تھے۔‏

مثال کے طور پر آثارِقدیمہ کے ماہرین نے شمالی مصر میں کھدائی کے دوران کچھ آبادیوں کے آثار دریافت کیے ہیں۔‏ ڈاکٹر جان بم‌سن نے بتایا کہ کھدائی کے علاقے سے 20 یا اِس سے بھی زیادہ ایسی آبادیوں کے شواہد ملے ہیں جن میں سامی لوگ رہتے تھے۔‏ مصر کے آثارِقدیمہ پر تحقیق کرنے والے ایک ماہر جیمز ہافمائیر نے کہا:‏ ”‏لگ بھگ 1800 سے 1540قبل‌ازمسیح کے دوران مغربی ایشیا [‏جہاں یعقوب کا خاندان رہتا تھا]‏سے تعلق رکھنے والے سامی لوگوں کے لیے مصر ایک بڑی پُر کشش جگہ رہی اور وہ یہاں آ کر بس گئے۔‏“‏ وہ مزید بتاتے ہیں:‏ ”‏یہ وہی عرصہ تھا جب بنی‌اِسرائیل کے باپ‌دادا زندہ تھے۔‏ لہٰذا یہ عرصہ پیدایش کی کتاب میں ذکرکردہ اُس عرصے اور حالات سے میل کھاتا ہے جب ابراہام اور یعقوب کھانے،‏ پانی اور سرسبز چراگاہوں کی تلاش میں مصر گئے اور اِضحاق بھی اِن چیزوں کی تلاش میں مصر کے کافی قریب پہنچ گئے۔‏“‏

اِس سلسلے میں ایک اَور ثبوت جنوبی مصر سے دریافت ہونے والے ایک نسخے سے ملتا ہے۔‏ 2000 سے 1600 قبل‌ازمسیح کے اُس نسخے میں جنوبی مصر کے ایک گھر میں کام کرنے والے غلاموں کے نام درج ہیں۔‏ اِن ناموں میں 40 سے زیادہ سامی نام ہیں۔‏ یہ غلام باورچیوں،‏ کپڑے بُننے والوں اور مزدوروں کے طور پر کام کرتے تھے۔‏ جیمز ہافمائیر نے کہا:‏ ”‏اگر تھی‌بس [‏جنوبی مصر کا ایک علاقہ]‏ کے صرف ایک گھر میں 40 سے زیادہ سامی کام کرتے تھے تو بےشک پورے مصر اور خاص طور پر[‏نیل]‏ ڈیلٹا میں سامیوں کی تعداد خاصی زیادہ ہوگی۔‏“‏

ماہرِآثارِقدیمہ ڈیوڈ رول نے لکھا کہ اِس نسخے میں درج کچھ غلاموں کے نام ”‏کافی حد تک بائبل میں درج ناموں جیسے ہیں۔‏“‏ مثال کے طور پر اُن نسخوں میں لکھے کچھ نام بائبل میں درج ناموں اِشکار،‏ آشر اور سفرہ سے ملتے جلتے ہیں۔‏ (‏خر 1:‏3،‏ 4،‏ 15‏)‏ ڈیوڈ رول کے مطابق ”‏یہ اِس بات کا پکا ثبوت ہے کہ ایک وقت تھا جب اِسرائیلی مصر میں غلامی کی زندگی گزار رہے تھے۔‏“‏

ڈاکٹر بم‌سن بتاتے ہیں:‏ ”‏مصر میں غلامی اور اِس سے رِہائی کے حوالے سے بائبل میں جو واقعات درج ہیں،‏ اُن کے ٹھوس تاریخی شواہد موجود ہیں۔‏“‏