Забур 106:1–48
106 Яҳни мадҳ этинг!*
Яҳовага шукрона айтинг, чунки У яхшидир+,Унинг меҳр-садоқати абадий бор бўлади+.
2 Яҳованинг қудратли ишларини ким тўлиқ эълон қила олади?Мақтовга лойиқ барча ишларини ким хабарлай олади?+
3 Адолат билан йўл тутадиганлар,Ҳамиша тўғри ишларни қиладиганлар бахтлидир+.
4 Эй Яҳова, халқингга илтифот кўрсатганингда мени ҳам эсла+.
Менга ғамхўрлик қилиб, қутқар.
5 Токи танлаганларингга яхшилик қилганингда мен қувонайин+,Халқинг билан бирга севиниб,Мулкингга қўшилиб фахр билан Сени мадҳ этайин.
6 Ота-боболаримизга ўхшаб гуноҳ қилдик+,Ёмонлик қилиб, қабиҳликка қўл урдик+.
7 Ота-боболаримиз Мисрда ажойиб ишларинг қадрига етмади,
Меҳр-садоқатга бой эканингни эсдан чиқарди,Улар денгиз олдида, Қизил денгиз ёнида исён кўтарди+.
8 Лекин У Ўз исми ҳаққи уларни қутқарди+,Ўз қудратини намоён қилди+.
9 У Қизил денгизга буйруқ берди ва у қуриб қолди,Уларни саҳро бўйлаб етаклагандек денгиз тубидан олиб ўтди+.
10 Уларни рақибларининг қўлидан қутқарди+,Душманлари қўлидан қайтариб олди+.
11 Ғанимларини сув босди,Бирортаси ҳам омон қолмади+.
12 Шунда улар Унинг ваъдаларига ишониб+,Унга ҳамду сано куйлай бошлади+.
13 Бироқ улар тезда Унинг ишларини унутди+,У қандай йўл-йўриқ беришини кутмади.
14 Улар саҳрода ўз нафсларига берилди+,Дашту биёбонда Аллоҳни синади+.
15 Тангри уларга сўраган нарсасини берди,Сўнг эса касаллик юбориб уларни қириб ташлади+.
16 Улар қароргоҳда Мусога,Яҳова муқаддас деб ҳисоблаган+ Ҳорунга ҳасад қилди+.
17 Шунда ер очилиб Датанни ютиб юборди,Абурамга эргашган жамоани ҳам ўз қаърига тортиб кетди+.
18 Уларнинг тўдаси орасига олов тушди,Аланга ёвузларни ютиб юборди+.
19 Хоревда улар бузоқ ясаб,Қуйма бутга* сажда қилди+.
20 Улар Менинг улуғворлигимниЎт ейдиган буқанинг тасвирига алмаштирди+.
21 Улар Мисрда буюк ишлар қилган+Нажоткори Худони унутиб қўйди+,
22 Хом юртида ажойиботлар+,Қизил денгизда маҳобатли ишлар қилган Зотни+ эсдан чиқарди.
23 Аллоҳ уларни йўқ қилиш амрини бермоқчи бўлиб турганида,Унинг танлангани бўлмиш Мусо ўртага тушиб,Унинг ҳалокатли қаҳрини қайтарди+.
24 Улар эса ўша гўзал юртдан нафратланиб+,Унинг ваъдасига ишонмай қўйди+.
25 Улар ўз чодирларида минғирлай бошлади+,Яҳованинг сўзларига қулоқ солмай қўйди+.
26 Шунда Тангри қўлини кўтариб қасам ичди,Уларни саҳрода йўқ қилиб юборишга қарор қилди+.
27 Авлодларини халқлар орасида қириб ташлашга,Ўзларини эса бегона юртларга тарқатиб юборишга қарор қилди+.
28 Улар Пиёрдаги Баалга сиғина бошлади+,Ўликларга келтирилган қурбонликларни* ейдиган бўлди.
29 Улар ўз қилмишлари билан Унинг ғашини келтирди+,Шунда улар орасида ўлат тарқалди+.
30 Финхаз ўрнидан туриб орага тушганидаЎлат тўхтади+.
31 Шу иши учун у авлодлар оша, абадийОдил инсон деб саналанадиган бўлди+.
32 Улар Марива* сувлари ёнида Худонинг жаҳлини чиқарди.Уларнинг дастидан Мусо жафо чекди+.
33 Улар Мусонинг ғазабини қўзғатди,У ўйламасдан гапириб қўйди+.
34 Улар Яҳованинг амрига бўйсунмай+,Халқларни қириб ташламади+.
35 Аксинча, уларга қўшилиб кетиб+,Уларнинг йўлларидан юришни ўрганди+.
36 Уларнинг бутларига сиғинди+,Бу, улар учун тузоққа айланди+.
37 Улар ўғилу қизлариниЖинларга қурбон қилди+.
38 Улар Канъон бутларига қурбон қилганЎғил-қизларининг қонини+,Бегуноҳ одамлар қонини тўкди+,Хунрезлик сабабли юрт булғанди.
39 Ўз қилмишлари билан улар нопок бўлди,Ишлари билан Худога хиёнат* қилди+.
40 Шу боис, Яҳованинг Ўз халқига нисбатан ғазаби аланга олди,У Ўз мулкидан нафратланиб кетди.
41 Уларни қайта-қайта халқларнинг қўлига топшириб+,Улардан нафратланганлар устларидан бошқаришига йўл қўйди+.
42 Душманлари уларни эзди,Куч ишлатиб уларни бўйсундирди.
43 Худо уларни кўп маротаба қутқарди+,Аммо улар исён кўтариб, итоатсизлик қилди+,Ўз гуноҳлари дастидан хор-зор бўлди+.
44 Бироқ Тангри уларнинг азобларини кўрар+,Ёрдам сўраб қилган илтижоларини эшитарди+.
45 Уларнинг манфаатини кўзлаб аҳдини ёдида тутди,Ўзининг чексиз меҳр-садоқати туфайли уларга раҳм қилди+.
46 Уларни асир олганларнинг қалбидаРаҳм туйғусини уйғотди+.
47 Эй, Тангримиз Яҳова, бизни қутқар+,Халқлар орасидан бизни йиғиб ол+,Токи муқаддас исмингга шукроналар айтиб,Қувонч ила Сени мадҳ этайлик+.
48 Исроилнинг Худоси Яҳовага ҳамду сано бўлсин,У абадулабад мадҳ этилсин+.
Бутун халқ: «Омин!*» — десин.
Яҳни мадҳ этинг!
Изоҳлар
^ Ёки «Ҳаллелуя!» «Яҳ» — бу Яҳова деган исмнинг қисқача шакли.
^ Ёки «Металл ҳайкалга».
^ Яъни ўлганларга ёки жонсиз худоларга келтирилган қурбонликлар.
^ Маъноси «жанжал».
^ Ёки «маънавий фоҳишалик».
^ Ёки «Шундай бўлсин!»
