Yo‘q. Muqaddas Kitobda pul yomon ekani va ko‘pincha u sababli barcha yomon narsalar sodir bo‘lishi haqida aytilmagan. «Pul — har turli yomonlikning negizi» degan ommabop fikr Muqaddas Kitobdan qisman olingan bo‘lib, insonni adashtirishi mumkin. Aslida esa, Muqaddas Kitobda «har turli yomonlikning negizi pulparastlikdir»,— deb aytilgan. (1 Timo‘tiyga 6:10)

•  Muqaddas Kitobda pul haqida nima deyilgan?

•  Nima uchun Muqaddas Kitob pulparast bo‘lishdan ogohlantiryapti?

•  Muqaddas Kitobda pul borasida berilgan maslahatlardan qanday foyda olishimiz mumkin?

•  Pul mavzusiga oid Muqaddas Kitobdagi oyatlar

 Muqaddas Kitobda pul, agar inson uni oqilona ishlatsa, foydali bo‘lishi va hatto «himoya berishi» mumkinligi to‘g‘risida yozilgan. (Voiz 7:12) Bundan tashqari, Muqaddas Kitobda boshqalarga saxiylik ko‘rsatganlar, jumladan, kimgadir sovg‘a sifatida pul ulashganlar maqtab o‘tilgan. (Hikmatlar 11:25)

 Lekin shu bilan birga Muqaddas Kitobda pulni hayotimizda birinchi o‘ringa qo‘yishdan ehtiyot bo‘lishimiz kerakligi haqida quyidagi ogohlantirish yozilgan: «Pulparastlikdan xoli kun kechiringlar. Boriga shukur qilinglar». (Ibroniylarga 13:5) Saboq shundaki, puldan to‘g‘ri foydalanib, boylik ketidan quvmasligimiz kerak, aksincha, bizga chindan ham zarur bo‘lgan, masalan, yegulik, kiyim va boshpana kabi narsalar bilan qanoat qilishga intilishimiz darkor. (1 Timo‘tiyga 6:8)

 Ochko‘z odamlar abadiy hayotdan bahramand bo‘lishmaydi. (Efesliklarga 5:5) Buning bir sababi shundaki, ochko‘zlik bu — butparastlikning, ya’ni soxta topinishning bir turidir. (Kolosaliklarga 3:5) Boshqa sababi esa shundan iboratki, ochko‘z inson istagan narsasini olish niyatida ko‘pincha odob-axloq me’yorlarini buzishga tayyor bo‘ladi. Hikmatlar 28:20 da: «Boyib ketishga oshiqqan... gunohga botadi»,— deb aytilgan. Bunday inson hattoki jinoyat sodir etishgacha, xususan, tovlamachilik, tamagirlik, firibgarlik, odam o‘g‘irlash yoki qotillikkacha borishi hech gap emas.

 Garchi pulparastlik yomon xatti-harakatlarga olib kelmasa ham, u ayrim salbiy oqibatlar keltirib chiqarishi mumkin. Muqaddas Kitobda shunday so‘zlarni o‘qiymiz: «Boyib ketish niyatida yurganlar esa vasvasaga tushib, tuzoqqa ilinib,.. ko‘p bema’ni va zararli istaklarga mubtalo bo‘ladilar». (1 Timo‘tiyga 6:9)

 Agar axloqiy va ma’naviy qadriyatlarimizni pulni deb buzishdan qochsak, o‘z hurmatimizni saqlab, Allohning marhamatiga va ko‘magiga erishamiz. Xudoni mamnun qilishga astoydil intilganlar uchun U quyidagicha va’da bermoqda: «Seni hecham tashlab ketmayman va aslo tark etmayman». (Ibroniylarga 13:5, 6) Qolaversa, U bizni: «Sadoqatli kishi mo‘l-ko‘l baraka topadi»,— deb ishontirmoqda. (Hikmatlar 28:20)