Vhagudi vha Bivhili vha tenda uri dzina ḽa Mudzimu, ḽine ḽa imelwa nga Tetragrammaton (יהוה), ḽi bvelela lu ṱoḓaho u vha 7 000 kha maṅwalwa a u thoma a Maṅwalo a Tshihevheru. Fhedzi vhathu vhanzhi vha humbula uri ḽeneḽo dzina ḽo vha ḽi siho kha maṅwalwa a u thoma a Maṅwalo a Tshikriste a Tshigerika. Ndi ngazwo musi hu tshi ṱalutshedzelwa Bivhili nnzhi dza Tshiisimane ano maḓuvha, hu si na dzina ḽa Yehova kha Maṅwalo ane a vhidzwa Thestamennde Ntswa. Musi vhaṱalutshedzeli vhanzhi vha tshi redza Maṅwalo a Tshihevheru ane a vha na Tetragrammaton, vha shumisa ipfi “Murena” nṱhani ha u shumisa dzina ḽa Mudzimu.

Vhaṱalutshedzeli vha Ṱhalutshedzelo Ya Shango Ḽiswa Ya Maṅwalo Makhethwa, a vha ṱalutshedzeli nga yeneyo nḓila. Kha Maṅwalo a Tshikriste a Tshigerika, vho dzhenisa dzina Yehova lwa 241 kha ṱhalutshedzelo ya Tshivenḓa. Musi vhaṱalutshedzeli vha tshi dzhia yeneyo phetho, vho ṱhogomela zwithu zwivhili zwa ndeme: (1) Maṅwalwa a Tshigerika ane ra vha nao ṋamusi, a si maṅwalwa a u thoma. Vhunzhi ha kopi dzi re hone ṋamusi, dzo ṅwaliwa ho no fhela maḓana mavhili a miṅwaha musi maṅwalwa a u thoma o no vha hone. (2) Nga tshenetsho tshifhinga, vhe vha kopolola eneo maṅwalwa vha nga vha vho bvisa Tetragrammaton vha dzhenisa Kyrios, ḽine ḽa vha ipfi ḽa Tshigerika ḽi ambaho uri “Murena.” Kana vha nga vha vho kopolola kha maṅwalwa e dzina ḽa Mudzimu ḽa vha ḽo no bviswa khao.

Komiti Ya Bivhili Ya Ṱhalutshedzelo Ya Shango Ḽiswa i na vhungoho ha uri hu na vhuṱanzi vhu sumbedzaho uri ho vha hu na Tetragrammaton kha maṅwalwa a u thoma a Tshigerika. Vho dzhia yeneyo phetho nga nṱhani ha vhuṱanzi vhu tevhelaho:

• Kopi dza Maṅwalo a Tshihevheru dzo shumiswaho tshifhingani tsha Yesu na vhaapostola vhawe dzi na Tetragrammaton. Tshifhingani tsho fhiraho, vhathu vha si gathi vho hanedza honoho vhuṱanzi. Samusi zwino hu na kopi dza Maṅwalo a Tshihevheru dza ḓanani ḽa u thoma ḽa miṅwaha dzo waniwaho tsini na Khumrani, a hu na ane a nga timatima uri eneo mafhungo ndi ngoho.

• Tetragrammaton yo vha i hone na kha Maṅwalo a Tshihevheru o ṱalutshedzelwaho nga Tshigerika a tshifhingani tsha Yesu na vhaapostola vhawe. Lwa miṅwaha minzhi, vhagudi vho vha vha tshi humbula uri ho vha hu si na Tetragrammaton kha maṅwalwa a Septuagint ya Tshigerika, o ṱalutshedzelwaho a tshi bva  kha Maṅwalo a Tshihevheru. Fhedzi vhukati ha ḓanani ḽa vhu 20 ḽa miṅwaha, vhagudi vho wana zwiṅwe zwipiḓa zwa kale zwa maṅwalwa a Septuagint ya Tshigerika ya tshifhingani tsha Yesu. Zwenezwo zwipiḓa zwi na dzina ḽa Mudzimu, ḽo ṅwaliwaho nga maḽeḓere a Tshihevheru. Tshifhingani tsha Yesu, kopi dza Maṅwalo o ṱalutshedzelwaho nga Tshigerika dzo vha dzi na dzina ḽa Mudzimu. Naho zwo ralo, ḓanani ḽa vhuṋa ḽa miṅwaha C.E., maṅwalwa a ndeme a Septuagint ya Tshigerika, a ngaho Codex Vaticanus na Codex Sinaiticus, o vha e si na dzina ḽa Mudzimu u bva kha bugu ya Genesi u swika kha Maḽeaxi (hoṱhe he ḽeneḽo dzina ḽa vha ḽi tshi wanala hone kha maṅwalwa a u thoma). Ndi ngazwo zwi sa mangadzi uri kha maṅwalwa e a vha hone u bva nga tshenetsho tshifhinga, dzina ḽa Mudzimu a ḽi ho kha Maṅwalo ane a vhidzwa Thestamennde Ntswa kana kha Maṅwalo a Tshigerika a Bivhili.

  Yesu o ri: “Ndo ḓa dzinani ḽa Khotsi anga.” O dovha a ombedzela uri o ita mishumo “dzinani ḽa Khotsi” awe

• Maṅwalo a Tshikriste a Tshigerika a amba uri Yesu o vha a tshi shumisa dzina ḽa Mudzimu tshifhinga tshoṱhe na uri o ḽi ḓivhadza vhaṅwe. (Yohane 17:6, 11, 12, 26) Yesu o ri: “Ndo ḓa dzinani ḽa Khotsi anga.” O dovha a ombedzela uri o ita mishumo “dzinani ḽa Khotsi” awe.​—Yohane 5:43; 10:25.

• Samusi dzina ḽa Yehova ḽi hone kha Maṅwalo makhethwa a Tshihevheru, a zwi pfali uri ḽi vhe ḽi siho kha Maṅwalo a Tshikriste a Tshigerika ngauri enea Maṅwalo a a tshimbidzana. Hu ṱoḓaho u vha vhukati ha ḓana ḽa u thoma ḽa miṅwaha C.E., mufunziwa Yakobo o amba na vhahulwane vha Yerusalema a ri: “Simioni o ri vhudza nga ha nḓila ye Mudzimu a humbula ngayo vha dzitshaka, na uri o no thoma u nanga khavho vhane vha ḓo vhidzwa nga dzina ḽawe.” (Mishumo 15:14) Yakobo o vha a sa ḓo amba zwenezwo arali ho vha hu si na muthu we a vha a tshi ḓivha kana u shumisa dzina ḽa Mudzimu ḓanani ḽa u thoma ḽa miṅwaha.

• Dzina ḽa Mudzimu ḽo ṅwaliwa nga u tou pfufhifhadza kha Maṅwalo a Tshikriste a Tshigerika. Kha Nzumbululo 19:1, 3, 4, 6, dzina ḽa Mudzimu ḽi wanala kha ipfi “Haleluya.” Ḽeneḽo ndi ipfi ḽa Tshihevheru ḽine ḽa amba uri Rendani Ya. “Ya” ndi u pfufhifhadzwa ha dzina Yehova. Madzina manzhi o shumiswaho kha Maṅwalo a Tshikriste a Tshigerika a bva kha dzina ḽa Mudzimu. Dziṅwe bugu dzo ṱalutshedza uri Yesu zwi amba uri “Yehova Ndi Mutshidzi.”

• Maṅwalwa a u thoma a Vhayuda a sumbedza uri Vhakriste vha Vhayuda vho shumisa dzina ḽa Mudzimu kha maṅwalwa avho. Tosefta, ine ya vha bugu i re na milayo, yo fhedzaho u ṅwaliwa hu ṱoḓaho u vha nga 300 C.E, yo amba uri maṅwalwa a Vhakriste  o vha a tshi fhiswa nga Savhatha, hu tshi fhiswa na zwipiḓa zwi re na Dzina ḽa Mudzimu khazwo. Kha yeneyi bugu ho ṅwaliwa mafhungo e a ambiwa nga Rabbi Yosé wa Mugalilea, we a tshila mathomoni a ḓana ḽa vhuvhili ḽa miṅwaha C.E. O amba uri nga maṅwe maḓuvha a vhege, “muṅwe o vha a tshi gera zwipiḓa zwi re na dzina ḽa Mudzimu [hu khou ambelwa kha maṅwalwa a Vhakriste] a zwi dzumba, a fhisa zwoṱhe zwo salaho.”

• Vhaṅwe vhagudi vha Bivhili vha tenda uri zwi vhonala u nga dzina ḽa Mudzimu ḽo vha ḽi hone kha miredzo i wanalaho kha Maṅwalo a Tshikriste a Tshigerika i bvaho kha Maṅwalo a Tshihevheru. Kha The Anchor Bible Dictionary nga fhasi ha tshiṱoho tshine tsha  ri “Tetragrammaton in the New Testament,” ho ambiwa uri: “Hu na vhuṅwe vhuṱanzi vhune ha sumbedza uri musi hu tshi thoma u ṅwaliwa Thestamennde Ntswa, Tetragrammaton, ine ya vha Dzina ḽa Mudzimu Yahweh, yo vha i hone kha miṅwe miredzo kana yoṱhe i wanalaho kha T[hestamennde] N[tswa] i bvaho kha T[hestamennde] ya K[ale].” Mugudi ane a pfi George Howard o ri: “Nga nṱhani ha uri Tetragram yo vha i tshee hone kha kopi dza Bivhili ya Tshigerika [ya Septuagint] ine ya vha Maṅwalo a Vhakriste vha ḓanani ḽa u thoma, zwi a pfala u tenda uri vhaṅwali vha T[hestamennde] N[tswa], a vho ngo bvisa maḽeḓere maṋa a Tshihevheru a dzina ḽa Mudzimu kha Bivhili musi vha tshi redza u bva Maṅwaloni.”

•   Vhaṱalutshedzeli vha Bivhili vha ḓivheaho vho shumisa dzina ḽa Mudzimu kha Maṅwalo a Tshikriste a Tshigerika. Vhaṅwe vha vhenevho vhaṱalutshedzeli vho ita zwenezwo Ṱhalutshedzelo Ya Shango Ḽiswa i sa athu u vha hone. Mafhungo a tevhelaho a sumbedza madzina a vhaṱalutshedzeli na zwe vha zwi ṱalutshedzela: A Literal Translation of the New Testament . . . From the Text of the Vatican Manuscript, nga Herman Heinfetter (1863); The Emphatic Diaglott, nga Benjamin Wilson (1864); The Epistles of Paul in Modern English, nga George Barker Stevens (1898); St. Paul’s Epistle to the Romans, nga W. G. Rutherford (1900); The New Testament Letters, nga J.W.C. Wand, Mubishopo wa London (1946). Zwiṅwe hafhu, kha ṱhalutshedzelo ya Tshipania ya mathomoni a ḓana ḽa vhu 20 ḽa miṅwaha, muṱalutshedzeli ane a pfi Pablo Besson o shumisa “Jehová” kha Luka 2:15 na kha Yuda 14 nahone ṱhaluso dzi re magumoni a siaṱari dzi ṱoḓaho u vha 100 dzi re kha ṱhalutshedzelo yawe dzo shumisa dzina ḽa Mudzimu. Musi dzenedzo ṱhalutshedzelo dzi sa athu u vha hone, Maṅwalo a Tshikriste a Tshigerika o ṱalutshedzelwaho nga Tshihevheru u bva nga ḓana ḽa vhu 16 ḽa miṅwaha u ya phanḓa, o shumisa Tetragrammaton kha ndimana nnzhi. Kha luambo lwa Tshidzheremane fhedzi, Bivhili dza 11 dzi shumisa dzina “Yehova” (kana dzina “Yahweh” ḽine ḽa vha ṱhalutshedzelo ya Tshihevheru)  kha Maṅwalo a Tshikriste a Tshigerika, ngeno vhaṱalutshedzeli vhaṋa vho dzhenisa ḽeneḽo dzina kha brakete phanḓa ha ipfi “Murena.” Bivhili dza Tshidzheremane dzi fhiraho 70 dzi shumisa dzina ḽa Mudzimu kha ṱhaluso dzi re magumoni a siaṱari kana kha dziṅwe ṱhaluso.

• Bivhili dzo ṱalutshedzelwaho nga nyambo dzi fhiraho 100 dzi na dzina ḽa Mudzimu kha Maṅwalo a Tshikriste a Tshigerika. Nyambo nnzhi dza Afurika, Amerika, Asia, Yuropa na dza tshiṱangadzime tsha Pasifiki, dzi a shumisa dzina ḽa Mudzimu. (Sedzani dzenedzo nyambo kha masiaṱari 1998 na 1999.) Vhaṱalutshedzeli vha dzenedzi Bivhili vho shumisa dzina ḽa Mudzimu nga nṱhani ha zwiitisi zwo ambiwaho afho nṱha. A si kale ho ṱalutshedzelwa dziṅwe dza dzenedzi ṱhalutshedzelo dza Maṅwalo a Tshikriste a Tshigerika, dzi ngaho Bivhili ya Tshirotuman (1999), ine ya shumisa dzina “Jihova” lwa 51 kha ndimana dza 48 na ya Tshibatak (Tshitoba) (1989) tsha Indonesia, ine ya shumisa “Jahowa” lwa 110.

A zwi timatimisi uri hu na zwiitisi zwi pfalaho zwa u vhuyedzedza dzina ḽa Mudzimu, Yehova, kha Maṅwalo a Tshikriste a Tshigerika. Zwenezwo ndi zwe vhaṱalutshedzeli vha Ṱhalutshedzelo Ya Shango Ḽiswa vha ita zwone. Vha ṱhonifha dzina ḽa Mudzimu nahone a vha ṱoḓi u bvisa zwe zwa vha zwo ṅwaliwa kha maṅwalwa a u thoma.​—Nzumbululo 22:18, 19.