Vhurifhi Ha U Thoma Vhu Yaho Kha Vhakorinta 1:1-31
1 Nṋe Paulo ndo vhidzwa uri ndi vhe muapostola+ wa Kristo Yesu nge Mudzimu a vha a tshi zwi funa. Nṋe na wahashu Sostene
2 ri ṅwalela tshivhidzo tsha Mudzimu tshi re Korinta,+ na vhoṱhe vha re fhethu ho fhambanaho vhane vha vhidzelela dzina ḽa Murena washu Yesu Kristo,+ a re Murena wavho na washu.+ Mudzimu o ni nanga uri ni vhe na vhuthihi na Kristo Yesu, o ni vhidza uri ni vhe vhakhethwa.
3 Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.
4 Ndi dzula ndi tshi livhuwa Mudzimu ndi tshi itela inwi nga nṱhani ha vhuthu vhuhulu he Mudzimu a ni sumbedza hone nga Kristo Yesu.
5 No wana zwoṱhe ngauri ni na vhuthihi nae, ndi ngazwo ni tshi kona u ḓivhadza mulaedza wa Mudzimu na u ḓivha ipfi ḽa Mudzimu zwavhuḓi.+
6 Zwe na funzwa nga ha Kristo+ zwo nwelela kha inwi,
7 ndi ngazwo hu si na zwine na shaya musi no lindela Murena washu Yesu Kristo a tshi dzumbululwa.+
8 U ḓo ni khwaṱhisa u swika vhufheloni, uri hu si vhe na ane a ni vhona mulandu nga ḓuvha ḽa Murena washu Yesu Kristo.+
9 Mudzimu we a ni vhidza uri ni vhe na vhuthihi* na Murwa wawe Yesu Kristo Murena washu, u a fhulufhedzea.+
10 Ndi a ni ṱuṱuwedza vhahashu, nga dzina ḽa Murena washu Yesu Kristo, uri noṱhe ni tea u tendelana musi ni tshi amba, na uri a no ngo tea u fhandekana,+ fhedzi ni vhe vhathihi nga u humbula na u vhona zwithu nga nḓila i fanaho.+
11 Vhahashu, vhaṅwe vha muṱani wa Kloe vho mmbudza uri ni khou lwa.
12 Ndi khou amba zwenezwi ngauri vhaṅwe vha ri: “Nṋe ndi wa Paulo,” vhaṅwe vha ri: “Nṋe ndi wa Apolo,”+ vhaṅwe vha ri: “Nṋe ndi wa Kefa,”* vhaṅwe vha ri: “Nṋe ndi wa Kristo.”
13 Naa Kristo o fhandekana? Naa Paulo o ombelwa kha danda a tshi itela inwi? Kani no lovhedzwa dzinani ḽa Paulo?
14 Ndi livhuwa Mudzimu uri a hu na we nda mu lovhedza nga nnḓa ha Krisipo+ na Gayo,+
15 uri hu si vhe na ane a amba uri o lovhedzwa dzinani ḽanga.
16 Ndo lovhedza na vha muṱa wa Stefanasi.+ A thi ḓivhi arali hu na vhaṅwe vhe nda vha lovhedza.
17 Ngauri Kristo ho ngo nthuma uri ndi lovhedze, fhedzi o nthuma uri ndi ḓivhadze mafhungo maḓifha,+ hu si nga maipfi a vhuṱali, uri zwi si nge Kristo o fela mahala kha danda.*
18 Ngauri mulaedza u ambaho nga ha u fa ha Kristo kha danda* ndi vhutsilu kha vhane vha ḓo fheliswa,+ fhedzi wonoyu mulaedza u sumbedza maanḓa a Mudzimu kha riṋe vhane ra ḓo tshidzwa.+
19 Ngauri ho ṅwaliwa u pfi: “Ndi ḓo ita uri vhuṱali ha vho ṱalifhaho vhu fhele, nda hana na ṱhalukanyo ya vha re na maano.”+
20 Muṱali u ngafhi? U ngafhi wa maṅwalo?* U ngafhi ane a ṱaṱa khani wa ḽino shango?* Naa Mudzimu ho ngo ita uri vhuṱali ha ḽino shango vhu vhe vhutsilu?
21 Ngauri vhathu vha ḽino shango a vha ḓivhi Mudzimu,+ samusi vha tshi fhulufhela vhuṱali havho.+ Mudzimu o vhona zwo tea u tshidza vhane vha tenda nga mulaedza une ra huwelela, une kha vhaṅwe wa vhonala u vhutsilu.+
22 Vhayuda vha ṱoḓa vhuṱolo,+ Vhagerika vha ṱoḓa vhuṱali;
23 fhedzi ri huwelela mulaedza u ambaho nga ha Kristo o ombelwaho kha danda, une wa khukhulisa Vhayuda, wa vha vhutsilu kha dzitshaka.+
24 Naho zwo ralo, kha Vhayuda na Vhagerika vho vhidzwaho, Kristo ndi maanḓa a Mudzimu na vhuṱali ha Mudzimu.+
25 Ngauri zwithu zwa Mudzimu zwine vhathu vha zwi dzhia zwi vhutsilu, zwo ṱalifha u vha fhira. Zwithu zwa Mudzimu zwine vhathu vha zwi dzhia zwi si na nungo, zwi na maanḓa u vha fhira.+
26 Vhahashu, ni a zwi ḓivha uri a si vhanzhi vho vhidzwaho vhukati haṋu vhane vha dzhiiwa vho ṱalifha u ya nga vhathu,+ a si vhanzhi vha re na maanḓa, a si vhanzhi vha re vhakololo,+
27 fhedzi Mudzimu o nanga zwithu zwo tsilufhalaho zwa shango uri a shonise vhaṱali; o nanga zwi si na nungo zwa shango uri a shonise zwi re na maanḓa.+
28 O nanga zwithu zwi nyadzeaho zwa shango na zwithu zwi dzhielwaho fhasi, na zwine zwa dzhiiwa zwi si tshithu uri hu fheliswe zwine zwa dzhielwa nṱha,+
29 uri hu si vhe na ane a zuwa phanḓa ha Mudzimu.
30 Fhedzi ndi nga nṱhani hawe uri ni vhe na vhuthihi na Kristo Yesu, we a vha vhuṱali vhu bvaho kha Mudzimu kha riṋe, khathihi na u luga,+ vhukhethwa+ na u vhofhololwa nga tshirengululi;+
31 uri zwi vhe nga nḓila ye zwa ṅwaliwa ngayo ha pfi: “Ane a zuwa, nga a zuwe nga Yehova.”*+
Ṱhaluso dzi re magumoni a siaṱari
^ Kana “mukovhe.”
^ U dovha a pfi Petro.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Ane a ḓivha Mulayo.
^ Sedzani Mutevhe Wa Ṱhalutshedzo Ya Maipfi.
