Bugu Ya Vhuvhili Ya Dzikhosi 17:1-41
17 Nga ṅwaha wa vhu 12 hu tshi khou vhusa Ahasi khosi ya Yuda, Hoshea+ murwa wa Elaa a vha khosi kha ḽa Isiraele e Samaria; a vhusa miṅwaha ya ṱahe.
2 O bvela phanḓa a tshi ita zwi sa takadzi Yehova, naho zwivhi zwawe zwi songo swika kha zwa mahosi a Isiraele e a vhusa phanḓa hawe.
3 Khosi Shalamanasere wa Asuri a ḓa a lwa nae,+ Hoshea a vha mushumeli wawe, a mu luvha.+
4 Naho zwo ralo, khosi ya Asuri ya zwi ṱhogomela uri Hoshea o ita tshimbevha, ngauri o ruma vhaḓinḓa ha So khosi ya Egipita,+ a si luvhe khosi ya Asuri u fana na tshifhingani tsha kale. Nga zwenezwo, khosi ya Asuri ya mu valela dzhele.
5 Khosi ya Asuri ya vutshela shango ḽoṱhe, ya ya Samaria ya u tanga lwa miṅwaha miraru.
6 Nga ṅwaha wa vhuṱahe hu tshi khou vhusa Hoshea, khosi ya Asuri ya thuba muḓi wa Samaria.+ Ya isa Vhaisiraele vhuthubwani+ ngei Asuri, ya vha dzudza ngei Hala na ngei Haboro mulamboni wa Gozani+ na miḓini ya Vhameda.+
7 Zwenezwi zwo itea nge vhathu vha Isiraele vha khakhela Yehova Mudzimu wavho we a vha bvisa shangoni ḽa Egipita a vha lamulela kha Farao khosi ya Egipita.+ Vho gwadamela* miṅwe midzimu,+
8 vha tevhela mikhuvha ya tshaka dze Yehova a dzi pandela phanḓa ha Vhaisiraele, vha tevhela maitele e a thomiwa nga mahosi a Isiraele.
9 Vhaisiraele vho ita zwithu zwi songo lugaho phanḓa ha Yehova Mudzimu wavho. Vho bvela phanḓa vha tshi ita fhethu ha vhurabeli miḓini yavho yoṱhe,+ u bva kha i re na tshiingamo u ya kha yo tsireledzwaho nga mbondo.*
10 Vho bvela phanḓa vha tshi ḓiimisela phuphu khethwa+ na thanda khethwa* kha tshikwara tshiṅwe na tshiṅwe tshilapfu tsha vhurabeli na nga fhasi ha miri yoṱhe mihulu;+
11 henefho fhethu hoṱhe ha vhurabeli vho vha vha tshi dubisa zwiṱhavhelo u fana na tshaka dze Yehova a dzi isa vhuthubwani nga nṱhani havho.+ Vho bvela phanḓa vha tshi ita zwithu zwivhi zwi sa takadzi Yehova.
12 Vho bvela phanḓa vha tshi shumela midzimu ya zwifanyiso i nengisaho,*+ ye Yehova a vha vhudza nga hayo a ri: “Ni songo ita zwenezwo!”+
13 Yehova o bvela phanḓa a tshi sevha Isiraele na Yuda nga u shumisa vhaporofita vhawe vhoṱhe na muvhoni muṅwe na muṅwe,+ a tshi ri: “Litshani nḓila mmbi dzaṋu!+ Ni tevhedze ndaela na maitele anga u ya nga milayo yoṱhe ye nda i ṋea vhomakhulukuku waṋu na ye nda ni vhudza ndi tshi shumisa vhashumeli vhanga vha vhaporofita.”
14 Fhedzi vha si thetshelese, vha ḓi dzula vhe na swili u fana na* vhomakhulukuku wavho vhe vha si sumbedze lutendo kha Yehova Mudzimu wavho.+
15 Vho bvela phanḓa vha tshi laṱa milayo yawe na mulanga+ wawe we a u vhofha na vhomakhulukuku wavho na khumbudzo dzawe dze a vha ṋea dzone dza u vha sevha,+ vha bvela phanḓa vha tshi tevhela midzimu ya zwifanyiso i sa vhuyedzi tshithu+ na vhone vha vha vhathu vha sa vhuyedzi tshithu,+ vha edzisa tshaka dzo vha tangaho dze Yehova a vha laya uri vha si dzi edzise.+
16 Vha bvela phanḓa vha tshi litsha ndaela dzoṱhe dza Yehova Mudzimu wavho, vha ita zwifanyiso zwa ṋamana+ mbili dza tsimbi na thanda khethwa,*+ vha gwadamela ṋaledzi dza ṱaḓulu,+ vha shumela Baali.+
17 Vho dovha vha posa vharwa vhavho na vhananyana vhavho muliloni,+ vha ita zwa u tungula+ na u bvumba, vha ḓikumedzela kha u ita zwi sa takadzi Yehova, uri vha mu sinyuse.
18 Yehova a sinyutshela Vhaisiraele zwihulu, a si tsha funa u vha vhona.+ Ho ngo sia na muthihi nga nnḓa ha lushaka lwa Yuda fhedzi.
19 Na Vhayuda a vho ngo tevhedza ndaela dza Yehova Mudzimu wavho;+ vho dovha vha tevhedza mikhuvha ye ya itwa nga Vhaisiraele.+
20 Yehova o laṱa vhaḓuhulu vhoṱhe vha Isiraele a vha shonisa nga u vha kumedzela zwanḓani zwa mavemu, u vhuya u swika a tshi vha pandela phanḓa hawe.
21 O bvisa Vhaisiraele nḓuni ya Davida, vha vhea Yerobeamu murwa wa Nebatha uri a vhe khosi.+ Fhedzi Yerobeamu a ita uri Vhaisiraele vha si tsha tevhela Yehova, a vha itisa tshivhi tshihulu.
22 Vhathu vha Isiraele vha ita zwivhi zwoṱhe zwe zwa itwa nga Yerobeamu.+ A vho ngo zwi litsha
23 u swika Yehova a tshi pandela Vhaisiraele phanḓa hawe, samusi o amba a tshi shumisa vhashumeli vhawe vhoṱhe vha vhaporofita.+ Ngauralo, Vhaisiraele vha iswa vhuthubwani shangoni ḽa Asuri,+ hune vha vha hone u swika na ṋamusi.
24 Nga murahu khosi ya Asuri ya ḓisa vhathu vha tshi bva Babele, Khutha, Ava, Hamathi na Sefaravaimi+ a vha dzudza miḓini ya Samaria vhudzuloni ha Vhaisiraele; vha dzhia shango ḽa Samaria vha dzula miḓini yaḽo.
25 Musi vha tshi tou thoma u dzula henefho, vho vha vha sa ofhi* Yehova. Ngauralo, Yehova a rumela ndau+ dza vhulaya vhaṅwe vhavho.
26 Ha ḓivhadzwa khosi ya Asuri ha pfi: “Tshaka dze wa dzi isa vhuthubwani wa dzi pfulusela miḓini ya Samaria a dzi ḓivhi vhurereli* ha Mudzimu wa ḽeneḽo shango. Ngauralo, o rumela ndau vhukati havho, zwino dzi khou vha vhulaya, ngauri a hu na na muthihi wavho o no ḓivha vhurereli ha Mudzimu wa ḽeneḽo shango.”
27 Khosi ya Asuri ya ri: “Dzhiani muṅwe wa vhotshifhe vhe na vha isa vhuthubwani vha tshi bva henefho ni mu humise a dzule henefho uri a vha funze vhurereli ha Mudzimu wa ḽeneḽo shango.”
28 Muṅwe wa vhotshifhe vho iswaho vhuthubwani vha tshi bva Samaria a vhuya, a ḓa a dzula Bethele,+ a thoma u vha funza nḓila ine vha fanela u ofha* ngayo Yehova.+
29 Lushaka luṅwe na luṅwe lwa ḓiitela mudzimu* walwo, lwa mu vhea nḓuni dzi re fhethu ha vhurabeli he Vhasamaria vha ḓiitela hone; lushaka luṅwe na luṅwe lwa ita nga u ralo muḓini we lwa vha lu tshi dzula khawo.
30 Vhathu vha Babele vha ita mudzimu ane a pfi Sukhotho-benotho, vhathu vha Khutha vha ita Neregala, vhathu vha Hamathi+ vha ita Ashima,
31 Vhaava vha ita Nibahasi na Tharathaka. Vhasefaravaimi vho vha vha tshi fhisa vhana vhavho muliloni vha tshi itela Adrameleke na Anamelekhe, midzimu ya Sefaravaimi.+
32 Naho vho vha vha tshi ofha Yehova, vho ḓinangela vhotshifhe vha fhethu ha vhurabeli kha vhathu zwavho, vhenevha vhotshifhe vho vha vha tshi shuma nḓuni dzi re fhethu ha vhurabeli.+
33 Vho vha vha tshi ofha Yehova, fhedzi vha tshi gwadamela midzimu yavho u ya nga vhurereli* ha tshaka dze vha iswa khadzo vhuthubwani.+
34 U swika na ṋamusi vha kha ḓi tevhela vhurereli* havho ha kale. A hu na ane a gwadamela* Yehova, a hu na ane a tevhedza maitele awe, khaṱhulo dzawe, Mulayo na ndaela zwe Yehova a ṋea vharwa vha Yakobo, we a shandula dzina ḽawe ḽa pfi Isiraele.+
35 Musi Yehova a tshi vhofha mulanga navho,+ o vha laya a ri: “Ni songo ofha miṅwe midzimu, ni songo i gwadamela kana u i shumela kana u i ṋekedza zwiṱhavhelo.+
36 Fhedzi ni ofhe+ Yehova we a ni bvisa shangoni ḽa Egipita nga tshanḓa tshawe tsha maanḓa,+ ndi ene ane na fanela u mu gwadamela, na u mu ṋekedza zwiṱhavhelo.
37 Misi yoṱhe ni tevhedze nga vhuronwane maitele, khaṱhulo, Mulayo na ndaela zwe a ni ṅwalela zwone,+ ni songo ofha miṅwe midzimu.
38 Ni songo hangwa mulanga we nda u vhofha na inwi,+ ni songo ofha miṅwe midzimu.
39 Fhedzi ni ofhe Yehova Mudzimu waṋu, samusi e ene ane a ḓo ni tshidza zwanḓani zwa maswina aṋu oṱhe.”
40 Fhedzi a vho ngo thetshelesa, vho tevhela vhurereli* havho ha kale.+
41 Vhathu vha dzenedzi tshaka vho vha vha tshi ofha Yehova,+ fhedzi vho vha vha tshi dovha vha shumela zwifanyiso zwavho zwo vhaḓwaho. Vhana vhavho na vhaḓuhulu vhavho vho ita zwi fanaho na zwa vhomakhulukuku wavho, u swika na ṋamusi.
Ṱhaluso dzi re magumoni a siaṱari
^ Thevhedz., “ofha.”
^ Zwine zwa amba fhethu hoṱhe, hu sa londwi uri hu na vhadzulapo vhaṱuku kana vhanzhi.
^ Sedzani Mutevhe Wa Ṱhalutshedzo Ya Maipfi.
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Thevhedz., “vho omisa mitsinga yavho u fana na mitsinga ya.”
^ Sedzani Mutevhe Wa Ṱhalutshedzo Ya Maipfi.
^ Kana “gwadameli.”
^ Kana “mikhuvha ya vhurereli.”
^ Kana “u gwadamela.”
^ Kana “midzimu.”
^ Kana “mikhuvha ya vhurereli.”
^ Thevhedz., “ofha.”
^ Kana “mikhuvha ya vhurereli.”
^ Kana “mikhuvha ya vhurereli.”
