Vhurifhi Ha Vhuvhili Vhu Yaho Kha Timotheo 2:1-26
2 Iwe ṅwananga,+ bvela phanḓa u tshi wana maanḓa kha vhuthu vhuhulu vhune ha ḓiswa nga u vha na vhuthihi na Kristo Yesu;
2 na kha zwithu zwe wa vhudzwa nga nṋe zwe zwa khwaṱhisedzwa nga ṱhanzi nnzhi,+ zwenezwi zwithu u zwi funze vhanna vha fhulufhedzeaho, uri na vhone vha kone u funza vhaṅwe.
3 U ḓiimisele u tambula+ samusi u swole ḽavhuḓi+ ḽa Kristo Yesu.
4 Swole a ḽi dzheneleli kha zwa mabindu, ngauri ḽi ṱoḓa u takalelwa nga we a ḽi ṅwalisa uri ḽi vhe swole.
5 Na ane a dzhenela kha mbambe* ha ambadzwi khare arali a songo tevhedza milayo.+
6 Mulimi ane a shuma nga maanḓa ndi ene wa u thoma u ḽa zwe a lima.
7 Dzula u tshi humbula zwine nda u vhudza; Murena u ḓo ita uri u pfesese* zwithu zwoṱhe.
8 U songo hangwa uri Yesu Kristo o vuswa vhafuni+ na uri o vha e ṅwana* wa Davida;+ ndi one mafhungo maḓifha ane nda a huwelela,+
9 ane nda khou farelwa na u tambudzelwa one sa ḽivemu.+ Fhedzi a hu na ane a nga thivhela ipfi ḽa Mudzimu.+
10 Ndi ngazwo ndi tshi khou konḓelela zwoṱhe ndi tshi itela vho nangwaho,+ uri na vhone vha tshidzwe nga Kristo Yesu na u wana vhugala vhu sa fheli.
11 Zwenezwi ndi ngoho: Arali ro fa nae, ri ḓo tshila nae;+
12 arali ra konḓelela, ri ḓo vhusa roṱhe sa mahosi;+ arali ra mu landula, na ene u ḓo ri landula;+
13 naho ra sa fhulufhedzea, ene u dzula a tshi fhulufhedzea, ngauri a nga si ite zwine zwa lwisana na zwine a vha zwone.
14 Dzula u tshi vha humbudza zwenezwi zwithu, u vha laye phanḓa ha Mudzimu uri vha songo lwa nga maipfi, zwenezwo zwithu a zwi vhuyedzi ngauri zwi huvhadza vho thetshelesaho.
15 Ita zwoṱhe zwi re maanḓani au uri Mudzimu a u takalele, u vhe mushumi a si na tshine tsha mu shonisa, a funzaho na u ṱalutshedza ipfi ḽa ngoho nga nḓila yo teaho.+
16 U songo thetshelesa zwithu zwi si na mushumo zwine zwa tshinya zwikhethwa,+ ngauri zwi ḓo ita uri hu vhe na mishumo minzhi ya u sa ofha Mudzimu,
17 zwine vha zwi amba zwi ḓo phaḓalala sa tshilonda tsha ṅwatela.* Vhaṅwe vhavho ndi Himeneo na Fileto.+
18 Vhenevha vhanna vho litsha ngoho, vha amba uri vhafu vho no vuswa,+ vha ita uri vhaṅwe vha si tsha vha na lutendo.
19 Naho zwo ralo, mutheo wa Mudzimu wo khwaṱhaho u ḓi dzula wo ima, u na luswayo lune lwa ri, “Yehova* u a ḓivha vha re vhawe,”+ na uri, “Vhoṱhe vhane vha vhidzelela dzina ḽa Yehova*+ kha vha laṱe zwivhi.”
20 Nḓuni khulu hu na midzio ya musuku, siḽiva, ya thanda na ya vumba, miṅwe i shumiselwa zwithu zwi ṱhonifheaho, miṅwe ya shumiselwa zwithu zwi sa ṱhonifhei.
21 Ane a ḓifhambanya na midzio ine ya shumiselwa zwithu zwi sa ṱhonifhei, u ḓo vha mudzio u shumiselwaho zwithu zwi ṱhonifheaho, u re mukhethwa, u thusaho muṋe wawo, wo lugelaho mishumo mivhuya yoṱhe.
22 Nga zwenezwo, u shavhe nyemulo dza vhuswa, fhedzi lwela u vha o lugaho, u vha na lutendo, lufuno, mulalo, u na vhane vha vhidzelela Murena zwi tshi bva mbiluni dzo kunaho.
23 Zwiṅwe hafhu, u iledze mbudziso dzi si na mushumo+ ngauri dzi ita uri hu vhe na dzinndwa.
24 Ngauri mulanda wa Murena ho ngo fanela u lwa, fhedzi u fanela u sumbedza vhathu vhoṱhe vhulenda,*+ a kone u funza, na u kona u ḓifara musi a tshi khakhelwa,+
25 a laye mashandukwa o vuḓa.+ Khamusi Mudzimu u ḓo ita uri vha rembuluwe* vha wane nḓivho yo teaho ya ngoho,+
26 uri vha dzivhuluwe, vha ponyoke tshikwekweni tsha Diabolo, we a vha fasha uri vha ite zwine a zwi funa.+
Ṱhaluso dzi re magumoni a siaṱari
^ Thevhedz., “mitambo.”
^ Kana “u ṱalukanye.”
^ Thevhedz., “mbeu.”
^ Kana “tshilonda tshine tsha phaḓalala tshi tshi tshinyadza muvhili.”
^ Kana “u fanela u sumbedza u humbulela vhathu vhoṱhe.”
^ Kana “vha shandule muhumbulo.”
