Vhurifhi Ha Vhuvhili Vhu Yaho Kha Vhathesalonika 1:1-12
1 Nṋe Paulo, ndi na Silvano* na Timotheo,+ ndi ṅwalela tshivhidzo tsha Vhathesalonika vha re na vhuthihi na Mudzimu ane a vha Khotsi ashu na Murena Yesu Kristo, ndi ri:
2 Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.
3 Vhahashu, ri a kombetshedzea u dzula ri tshi livhuwa Mudzimu nga nṱhani haṋu. Zwenezwi zwo tea, ngauri lutendo lwaṋu lu khou engedzea, ni khou funana nga ho engedzeaho.+
4 Ndi ngazwo ri tshi ḓihudza nga inwi+ ri vhukati ha zwivhidzo zwa Mudzimu, ngauri no konḓelela na fhulufhela Mudzimu hu sa londwi u tovholwa na maṱungu e na sedzana nao.+
5 Zwenezwi zwi sumbedza uri Mudzimu u haṱula nga nḓila yo teaho, zwa ita uri ni fanelee u dzhena Muvhusoni wa Mudzimu, une na khou tambulela wone.+
6 Samusi Mudzimu o luga, u ḓo pfisa vhuṱungu vhane vha ni tambudza.+
7 Fhedzi inwi vhane na khou tambula ni ḓo vhofhololwa na riṋe, musi hu tshi dzumbululwa Murena Yesu+ a tshi bva ṱaḓulu e na vharuṅwa vhawe vha maanḓa,+
8 e kha mulilo u dugaho, a tshi ḓa u lifhedza vhane vha si ḓivhe Mudzimu na vhane vha si thetshelese mafhungo maḓifha a Murena washu Yesu.+
9 Murena washu u ḓo haṱula vhenevho, a vha fhelisa tshoṱhe.+ Ha tsha ḓo vha lavhelesa kana u vha thusa nga maanḓa awe mahulu.
10 Musi a tshi ḓa uri a huliswe na vhakhethwa vhawe, u ḓo takalelwa nga vhoṱhe vha mu tendaho. Ni ḓo vha vhaṅwe vhavho ngauri no tenda zwe ra ni vhudza.
11 Ndi ngazwo ri tshi dzula ri tshi ni rabelela, uri Mudzimu washu a ni dzhie no fanelwa nga vhutshilo he a ni vhidzela+ hone, na uri nga maanḓa awe a khunyeledze zwithu zwoṱhe zwavhuḓi zwine a zwi takalela, na u khunyeledza mushumo u ṱuṱuwedzwaho nga lutendo.
12 Ndi hone dzina ḽa Murena washu Yesu ḽi tshi ḓo huliswa kha inwi, na inwi na huliswa nae, nga nṱhani ha vhuthu vhuhulu ha Mudzimu washu na ha Murena Yesu Kristo.
Ṱhaluso dzi re magumoni a siaṱari
^ U dovha a pfi Silasi.
