Daniele 2:1-49
-
Khosi Nebukadanetsara u ḽora muḽoro u tshuwisaho (1-4)
-
A hu na munna o ṱalifhaho ane a nga kona u ṱalutshedza muḽoro (5-13)
-
Daniele u humbela thuso kha Mudzimu (14-18)
-
Mudzimu u a huliswa nga u dzumbulula tshiphiri (19-23)
-
Daniele u vhudza khosi zwe ya ḽora (24-35)
-
Zwine muḽoro wa amba zwone (36-45)
-
Tombo ḽine ḽa vha muvhuso ḽi kwasha tshifanyiso (44, 45)
-
-
Daniele u huliswa nga khosi (46-49)
2 Nga ṅwaha wa vhuvhili musi Nebukadanetsara a tshi khou vhusa, o ḽora miḽoro minzhi, a vhilaela+ a si kone u eḓela.
2 Ndi hone khosi i tshi ita uri hu vhidzwe vhotshifhe vha manditi, mingome na Vhakaladea* uri vha vhudze khosi zwe ya ḽora. Vha ḓa vha ima phanḓa ha khosi.+
3 Khosi ya amba navho ya ri: “Ndo ḽora muḽoro, ndi khou vhilaela ngauri ndi khou ṱoḓa u ḓivha zwe nda ḽora.”
4 Vhakaladea vha fhindula khosi nga Tshiaramiki*+ vha ri: “Ngavhe iwe khosi u tshi tshila lini na lini. Vhudza vhashumeli vhau zwe wa ḽora, ndi hone ri tshi ḓo u ṱalutshedza uri zwi amba mini.”
5 Khosi ya fhindula Vhakaladea ya ri: “A thi tsha ḓo dovha nda dovholola zwe nda amba: Arali na sa mmbudza na u nṱalutshedza zwe nda ḽora, ni ḓo tumukanywa, nnḓu dzaṋu dzi ḓo itwa mabunga.*
6 Fhedzi arali na mmbudza muḽoro na zwine wa amba zwone, ndi ḓo ni ṋea zwifhiwa, malamba na u ni hulisa zwihulu.+ Zwino mmbudzeni zwe nda ḽora na zwine zwa amba zwone.”
7 Vha dovha vha fhindula vha ri: “Khosi nga i vhudze vhashumeli vhayo zwe ya ḽora ri kone u i ṱalutshedza zwine zwa amba zwone.”
8 Khosi ya fhindula ya ri: “Ndi a zwi ḓivha uri ni khou lingedza u ḓiṋea tshifhinga tsha u humbula, ngauri ni a ḓivha uri ndo khwaṱhisa zwe nda amba.
9 Arali na sa mmbudza muḽoro, noṱhe ni ḓo pfiswa vhuṱungu nga nḓila i fanaho. Fhedzi no tendelana uri ni ḓo mmbudza mazwifhi na u mphura ni tshi humbula uri ndi ḓo shandula muhumbulo. Zwino mmbudzeni zwe nda ḽora, ndi hone ndi tshi ḓo ḓivha uri ni ḓo nṱalutshedza uri zwi amba mini.”
10 Vhakaladea vha fhindula khosi vha ri: “A hu na muthu kha ḽifhasi ane a nga kona u ita zwine khosi ya ṱoḓa, ngauri a hu na khosi-khulu kana muvhusi we a vhuya a vhudzisa vhotshifhe vha manditi kana mingome kana Vhakaladea zwenezwi zwithu.
11 Zwine khosi ya khou zwi vhudzisa zwi a konḓa, a hu na ane a nga vhudza khosi zwenezwo nga nnḓa ha midzimu i sa dzuliho na vhathu.”
12 Khosi i tshi pfa zwenezwo ya sinyuwa zwihulu, ya ri hu vhulawe vhanna vhoṱhe vho ṱalifhaho vha Babele.+
13 Musi ho no bva mulayo wa uri vhanna vho ṱalifhaho vha vhulawe, ha ṱoḓiwa Daniele na khonani dzawe uri na vhone vha vhulawe.
14 Nga tshenetsho tshifhinga, Daniele a amba nga vhuṱali na nga vhulondi na Arioko muhulwane wa vhalindi vha khosi, we a vha o ya u vhulaya vhanna vho ṱalifhaho vha Babele.
15 A vhudzisa Arioko muḓinḓa wa khosi a ri: “Ndi ngani khosi i tshi ṱoḓa u ita zwithu zwo vhifhaho nga u rali?” Ndi hone Arioko a tshi vhudza Daniele zwe zwa itea.+
16 Daniele a ya a humbela khosi uri i mu ṋee tshifhinga tsha uri a i ṱalutshedze zwine muḽoro wa amba zwone.
17 Daniele a kona u ya nḓuni yawe a vhudza Henania, Misaele na Asaria khonani dzawe eneo mafhungo.
18 A humbela uri vha rabele uri Mudzimu wa ṱaḓulu a vha khathutshele, a vha dzumbululele tshenetsho tshiphiri, uri Daniele na khonani dzawe vha si vhulawe na vhanna vho ṱalifhaho vha Babele.
19 Daniele a dzumbululelwa tshenetsho tshiphiri kha bono vhusiku.+ Daniele a renda Mudzimu wa ṱaḓulu.
20 Daniele a ri:
“Dzina ḽa Mudzimu nga ḽi rendwe nga hu sa fheli,*Ngauri vhuṱali na maanḓa ndi zwawe e eṱhe.+
21 U shandula zwifhinga na dzikhalaṅwaha,+U bvisa na u vhea mahosi,+U ṋea vhuṱali vho ṱalifhaho na nḓivho kha vha re na ṱhalukanyo.+
22 U dzumbulula zwithu zwo dzikaho na zwo dzumbiwaho,+U ḓivha zwi re swiswini,+O tangiwa nga tshedza.+
23 Iwe Mudzimu wa vhomakhulukuku wanga, ndi a u livhuwa na u u renda,Ngauri wo nṋea vhuṱali na maanḓa.
Zwino wo ita uri ndi ḓivhe zwe ra u humbela;Wo ita uri ri ḓivhe zwine khosi ya ṱoḓa u ḓivha.”+
24 Daniele a ya kha Arioko, we khosi ya mu nanga uri a vhulaye vhanna vho ṱalifhaho vha Babele,+ a amba nae a ri: “U songo vhulaya vhanna vho ṱalifhaho vha Babele. Nnyise phanḓa ha khosi ndi ḓo kona u i ṱalutshedza uri zwe ya ḽora zwi amba mini.”
25 Arioko a ṱavhanya a isa Daniele phanḓa ha khosi a amba nayo a ri: “Ndo wana munna ane a vha muṅwe wa mathubwa a Yuda+ ane a nga ṱalutshedza khosi zwine muḽoro wa amba zwone.”
26 Khosi ya amba na Daniele we a vha a tshi pfi Beḽetsatsara,+ ya ri: “Naa zwa vhukuma u nga mmbudza zwe nda ḽora na zwine zwa amba zwone?”+
27 Daniele a fhindula khosi a ri: “A hu na na muthihi kha vhanna vho ṱalifhaho, mingome, vhotshifhe vha manditi kana vhaḓivhi vha ṋaledzi ane a nga kona u vhudza khosi tshiphiri tshine ya khou tshi vhudzisa.+
28 Fhedzi hu na Mudzimu wa ṱaḓulu ane a vha Mudzumbululi wa zwiphiri,+ o ḓivhadza Khosi Nebukadanetsara zwine zwa ḓo itea maḓuvhani a vhufhelo. Zwe wa ḽora na mabono e wa a vhona musi wo eḓela ndi hezwi:
29 “Iwe khosi, wo ḽora nga ha zwithu zwine zwa ḓo itea tshifhingani tshi ḓaho, Mudzumbululi wa zwiphiri o u ḓivhadza zwine zwa ḓo itea.
30 Nṋe a tho ngo dzumbululelwa tshenetshi tshiphiri ngauri ndo ṱalifha u fhira vhathu vhoṱhe; fhedzi ndo dzumbululelwa zwenezwi u itela u ṱalutshedza khosi zwe ya ḽora zwone uri i zwi ḓivhe.+
31 “Musi iwe khosi wo lavhelesa, wo vhona tshifanyiso tshihulu. Tshenetsho tshifanyiso tshe tsha vha tshi tshihulu, tshi tshi penya vhukuma, tsho vha tshi phanḓa hau, tshi tshi ofhisa.
32 Ṱhoho ya tshenetsho tshifanyiso yo vha yo itwa nga musuku vhukuma,+ khana na zwanḓa zwo vha zwi zwa siḽiva,+ thumbu na zwirumbi zwo vha zwi koporo,+
33 milenzhe yo vha i ya tsimbi,+ ṋayo dzo vha dzo itwa nga tsimbi na vumba.+
34 Wo lavhelesa u swika tombo ḽi tshi bviswa kha thavha, hu si nga zwanḓa zwa muthu, ḽa rwa ṋayo dza tshenetsho tshifanyiso dzo itwaho nga tsimbi na vumba dza kwashekana.+
35 Nga tshenetsho tshifhinga, tsimbi, vumba, koporo, siḽiva na musuku zwa kwashekanywa zwoṱhe zwa nga mungu u bvaho hune ha fhefherwa hone tshilimo, muya wa zwi vhudzula hu si sale na tshithihi tshazwo. Fhedzi tombo ḽe ḽa rwa tshenetsho tshifanyiso ḽa vha thavha khulu, ye ya ḓadza ḽifhasi ḽoṱhe.
36 “Wonoyo ndi muḽoro we khosi ya u ḽora, zwino ri ḓo i vhudza zwine wa amba zwone.
37 Iwe thovhela, khosi ya mahosi we Mudzimu wa ṱaḓulu a u ṋea muvhuso,+ maanḓa, nungo na vhugala,
38 na u u kumedzela vhathu vhoṱhe hu sa londwi hune vha dzula hone, u katela na zwivhanda na zwiṋoni, na u u ita muvhusi wa zwithu zwoṱhe,+ ndi iwe ane a vha ṱhoho ya musuku.+
39 “Fhedzi hu tshi bva iwe hu ḓo vha na muṅwe muvhuso,+ une wa vha muṱuku kha wau; ha kona u tevhela muṅwe wa vhuraru, wa koporo, une wa ḓo vhusa ḽifhasi ḽoṱhe.+
40 “Muvhuso wa vhuṋa u ḓo vha wo khwaṱha sa tsimbi.+ Samusi tsimbi i tshi kwashekanya na u kuya zwithu, wonoyu muvhuso u ḓo kwashekanya na u fhelisa yeneyo mivhuso yoṱhe.+
41 “Samusi wo vhona ṋayo na zwikunwane zwo itwaho nga vumba na tsimbi, wonoyu muvhuso u ḓo vha wo fhandekana, fhedzi huṅwe u ḓo vha wo khwaṱha sa tsimbi, samusi wo vhona tsimbi yo ṱanganyiswa na vumba ḽiṋu.
42 Samusi zwikunwane zwo itwa nga tsimbi na vumba, wonoyo muvhuso u ḓo vha u na maanḓa wa dovha wa thenga-thenga.
43 Samusi wo vhona tsimbi yo ṱanganyiswa na vumba ḽiṋu, na wone u ḓo vha wo ṱanganyiswa na vhathu* vho fhambanaho; fhedzi a vha nga vhi tshithu tshithihi, samusi tsimbi na vumba zwi sa ṱangani.
44 “Misini ya eneo mahosi, Mudzimu wa ṱaḓulu u ḓo vhumba muvhuso+ une wa sa ḓo fheliswa.+ Wonoyo muvhuso a u nga ṋewi vhaṅwe vhathu.+ U ḓo kwasha na u fhelisa yeneyi mivhuso yoṱhe,+ wa ima u woṱhe lini na lini,+
45 samusi wo zwi vhona tombo ḽi tshi bviswa kha thavha hu si nga zwanḓa zwa muthu, ḽa kwasha tsimbi, koporo, vumba, siḽiva na musuku.+ Mudzimu Muhulwane o ḓivhadza khosi zwine zwa ḓo itea tshifhingani tshi ḓaho.+ Wonoyo muḽoro ndi wa vhukuma, zwine wa amba ndi zwa vhukuma.”
46 Ndi hone Khosi Nebukadanetsara a tshi gwadama phanḓa ha Daniele, a mu hulisa. A laedza uri a ṋewe tshifhiwa na tshioro.
47 Khosi ya amba na Daniele ya ri: “Ngangoho Mudzimu wau, ndi Mudzimu wa midzimu, Murena wa mahosi na Mudzumbululi wa zwiphiri, ngauri wo kona u dzumbulula tshenetshi tshiphiri.”+
48 Khosi ya hulisa Daniele na u mu ṋea zwifhiwa zwinzhi zwavhuḓi, ya mu ita muvhusi wa vundu* ḽa Babele+ na muḓinḓa muhulwane a lavhelesaho vhanna vhoṱhe vho ṱalifhaho vha Babele.
49 Daniele a humbela khosi uri i vhee Shadaraka, Mishaka na Abedenego+ uri vha vhe vhalangi vha vundu* ḽa Babele, fhedzi Daniele a shuma muṱani wa khosi.
Ṱhaluso dzi re magumoni a siaṱari
^ Ndi tshigwada tshi re na vhukoni ha zwa vhungome na u ḓivha ṋaledzi.
^ Mathomoni Dan 2:4b u swika kha 7:28 yo vha yo ṅwaliwa nga Tshiaramiki.
^ Kana khamusi, “hune ha laṱwa hone mathukhwi; thulwi ya vhutoko.”
^ Kana “lini na lini.”
^ Vhenevho ndi vhathu zwavho.
^ Kana “tshiṱiriki tshi re na maanḓa.”
^ Kana “tshiṱiriki tshi re na maanḓa.”
