Ekisoda 32:1-35
32 Nga tshenetsho tshifhinga, vhathu vha vhona uri Mushe u khou lenga u vhuya thavhani.+ Vhathu vha kuvhanganela Aroni, vha amba nae vha ri: “Ri itele mudzimu ane a ḓo ri ranga phanḓa,+ ngauri a ri ḓivhi zwe zwa itea kha Mushe, we a ri bvisa shangoni ḽa Egipita.”
2 Aroni a amba navho a ri: “Bvulani zwiṅiṋa zwa musuku+ zwi re nḓevheni dza vhafumakadzi vhaṋu, vharwa na vhananyana vhaṋu, ni zwi ḓise kha nṋe.”
3 Vhathu vhoṱhe vha bvula zwiṅiṋa zwa musuku zwe zwa vha zwi nḓevheni dzavho, vha zwi ṋea Aroni.
4 A dzhia musuku we vha mu ṋea wone, a u ṋokisa, a u fula a vhumba tshifanyiso tsha ṋamana.+ Vhathu vha ri: “Hee Isiraele, Mudzimu wau ngoyu, we a u bvisa shangoni ḽa Egipita.”+
5 Musi Aroni a tshi vhona zwenezwo, a fhaṱa aḽeṱare phanḓa hayo. Aroni a vhidzelela a ri: “Matshelo hu ḓo vha na vhuṱambo ha Yehova.”
6 Vha vuwa nga matsheloni-tsheloni nga ḓuvha ḽi tevhelaho vha ṋekedza tshifhiwa tsha u fhiswa, vha ṋekedza zwiṱhavhelo zwa u pfumedzana. Nga murahu ha zwenezwo, vha ḽa na u nwa, vha ḓiphiṋa.+
7 Yehova a amba na Mushe a ri: “Itsa ngauri vhathu vhe wa vha ranga phanḓa u tshi vha bvisa shangoni ḽa Egipita vho tshinya.+
8 Vho kheluwa nga u ṱavhanya kha nḓila ye nda vha laya uri vha tshimbile khayo.+ Vho ḓiitela tshifanyiso tsha ṋamana, vha i gwadamela vha i itela zwiṱhavhelo vha ri: ‘Hee Isiraele, Mudzimu wau ngoyu, we a u ranga phanḓa a u bvisa shangoni ḽa Egipita.’”
9 Yehova a bvela phanḓa a tshi amba na Mushe a ri: “Ndo zwi vhona uri havha vhathu vha na tshikhuna.*+
10 Zwino nnditshe ndi vha fhelise nga mbiti dzanga, iwe ndi u ite lushaka luhulu.”+
11 Mushe a luvhelela Yehova Mudzimu wawe+ a ri: “Ndi ngani iwe Yehova u tshi nga sinyutshela vhathu vhau vhe wa vha bvisa shangoni ḽa Egipita nga maanḓa mahulu na nga tshanḓa tshau tsha maanḓa?+
12 Iwe u ṱoḓa uri Vhaegipita vha ri: ‘O vha e na tshiitisi tshi si tshavhuḓi musi a tshi vha bvisa. O vha a tshi khou ṱoḓa u vha vhulayela dzithavhani na u vha fhelisa kha ḽifhasi’?+ Litsha u sinyuwa, u humbule* nga ha phetho yau ya u ḓisela vhathu vhau yeneyi khombo.
13 Humbula zwe wa anela Abrahamu, Isaka na Isiraele vhashumeli vhau, wa amba navho wa ri: ‘Ndi ḓo andisa vhana* vhaṋu sa ṋaledzi dza ṱaḓulu,+ ḽeneḽi shango ḽoṱhe ḽe nda ḽi nanga ndi ḓo ḽi ṋea vhana* vhaṋu uri ḽi vhe ḽavho lini na lini.’”+
14 Yehova a litsha* u ḓisela vhathu vhawe khombo dze a vha o dzi amba uri u ḓo vha ḓisela dzone.+
15 Nga murahu ha zwenezwo, Mushe a tsa thavhani o fara+ mbaba mbili dza matombo dza Vhuṱanzi.+ Dzenedzo mbaba dzo vha dzo ṅwaliwa thungo dzoṱhe; nga phanḓa na nga murahu.
16 Dzenedzo mbaba dzo vha dzo vhaḓwa nga Mudzimu, mbaba dzenedzo dzo vha dzo ṅwaliwa nga Mudzimu.+
17 Musi Yoshua a tshi pfa phosho ya vhathu vha tshi khou ṱavha mikosi, a amba na Mushe a ri: “Hu khou pfala mukosi wa nndwa madenndeni.”
18 Fhedzi Mushe a ri:
“A si mukosi wa u imba wa gundo,*A si mukosi wa u lila nge vha kundwa;Ndi khou pfa mukosi wa u imba wa muṅwe mufuda.”
19 Musi Mushe a tshi vho sendela tsini na madennde, a tshi vhona ṋamana,+ vhathu vha tshi khou tshina, a sinyuwa, a laṱa fhasi mbaba dze a vha o dzi fara, a dzi kwasha henefho fhasi ha thavha.+
20 A dzhia ṋamana ye vha i ita a i fhisa nga mulilo, a i kwashekanya ya vha luphuse;+ nga murahu a lu hasha maḓini, a ita uri Vhaisiraele vha lu nwe.+
21 Nga murahu ha zwenezwo, Mushe a amba na Aroni a ri: “Avha vhathu vho u ita mini, u tshi vha dzhenisa tshivhini tshingafha?”
22 Aroni a ri: “U songo sinyuwa, muṋe wanga. U a zwi ḓivha zwavhuḓi uri vhathu vho ḓowela u ita vhuvhi.+
23 Vho amba na nṋe vha ri: ‘Ri itele mudzimu ane a ḓo ri ranga phanḓa, ngauri a ri ḓivhi zwe zwa itea kha Mushe, we a ri bvisa shangoni ḽa Egipita.’+
24 Nṋe nda amba navho nda ri: ‘Ane a vha na musuku u fanela u u ḓisa kha nṋe.’ Nda u posa muliloni, ha bva yeneyi ṋamana.”
25 Mushe a vhona uri vhathu vho vha vha si tsha langea, ngauri Aroni o vha ita uri vha si tsha langea, zwa vha zwithu zwe zwa vha shonisa phanḓa ha maswina avho.
26 Mushe a ima khoroni ya madennde a ri: “Ane a ima na Yehova kha a ḓe kha nṋe!”+ Vhalevi vhoṱhe vha mu kuvhanganela.
27 A amba navho a ri: “Yehova Mudzimu wa Isiraele o ri: ‘Muṅwe na muṅwe waṋu u tea u fara banga ḽawe, a buḓekanye madennde oṱhe u bva kha iṅwe khoro u ya kha iṅwe khoro, a vhulaye wahawe, muhura wawe na khonani yawe ya tsini.’”+
28 Vhalevi vha ita zwe Mushe a amba. Nga ḽeneḽo ḓuvha ho vhulawa vhanna vha ṱoḓaho u vha 3 000.
29 Mushe a ri: “Ḓikumedzeleni ṋamusi kha u ita mushumo wa Yehova, ngauri muṅwe na muṅwe waṋu o lwa na murwa wawe na ṅwana wahawe;+ ṋamusi u ḓo ni ṋea phaṱhutshedzo.”+
30 Nga ḓuvha ḽi tevhelaho Mushe a amba na vhathu a ri: “No ita tshivhi tshihulu, ndi ḓo gonya kha Yehova u itela u vhona arali ndi tshi nga ni pfumelela tshivhi tshaṋu.”+
31 Mushe a humela kha Yehova a ri: “Vhathu vho ita tshivhi tshihulwane vhukuma! Vho ḓiitela mudzimu wa musuku!+
32 Fhedzi arali wo ḓiimisela, vha hangwele zwivhi zwavho;+ arali wa sa vha hangwela, ndi humbela uri u nthuthe kha bugu yau ye wa nṅwala khayo.”+
33 Naho zwo ralo, Yehova a amba na Mushe a ri: “Muṅwe na muṅwe we a nkhakhela, ndi ḓo mu thutha kha bugu yanga.
34 Tshimbila zwino, u range phanḓa vhathu u vha ise fhethu he nda u vhudza hone. Muruṅwa wanga u ḓo u ranga phanḓa,+ nga ḓuvha ḽine nda ḓo haṱula, ndi ḓo vha pfisa vhuṱungu nga nṱhani ha zwivhi zwavho.”
35 Yehova a rwa vhathu nga ṱhamu nga nṱhani ha ṋamana ye vha i ita vha tshi shumisa Aroni.
Ṱhaluso dzi re magumoni a siaṱari
^ Thevhedz., “vho oma mitsinga.”
^ Thevhedz., “u ḓisole.”
^ Thevhedz., “mbeu.”
^ Thevhedz., “mbeu.”
^ Kana “a ḓisola.”
^ Kana “mishumo ya maanḓa.”
