Genesi 13:1-18
13 Nga murahu ha zwenezwo, Abramu a pfuluwa Egipita a ya Negebe,+ ene na mufumakadzi wawe na zwoṱhe zwe a vha e nazwo, khathihi na Loto.
2 Abramu o vha o pfuma nga maanḓa e na zwifuwo zwinzhi na siḽiva na musuku.+
3 A bva Negebe a tshimbila a tshi atha dennde a tshi ya Bethele, a swika he a vhuya a atha hone dennde ḽawe vhukati ha Bethele na Ai,+
4 fhethu he a vhuya a fhaṱa hone aḽeṱare. Henefho Abramu a renda dzina ḽa Yehova.
5 Loto we a vha a tshi khou tshimbila na Abramu na ene o vha e na nngu na kholomo na madennde.
6 Huno pfulo yo vha i sa eḓani uri vha dzule fhethu huthihi; ngauri thundu yavho yo vha yo no vha nnzhi lwe zwa vha zwi si tsha konadzea uri vha dzule vhoṱhe.
7 Nga nṱhani ha zwenezwo, ha vha na nndwa vhukati ha vhalisa vha zwifuwo zwa Abramu na vhalisa vha zwifuwo zwa Loto. (Nga tshenetsho tshifhinga Vhakanana na Vhapheresi vho vha vha tshi dzula kha ḽeneḽo shango.)+
8 Abramu a amba na Loto+ a ri: “Ndi khou humbela uri hu songo vha na nndwa vhukati hashu na vhalisa vhashu ngauri ri mashaka.
9 U nga dzhia tshipiḓa naho tshi tshifhio tsha ḽeneḽi shango. Ndi khou humbela uri ri fhandekane. Arali wa ya thungo ya tsha monde, nṋe ndi ḓo ya thungo ya tsha u ḽa; fhedzi arali wa ya thungo ya tsha u ḽa, nṋe ndi ḓo ya thungo ya tsha monde.”
10 Loto a lavhelesa a vhona tshiṱiriki tshoṱhe tsha Yorodane+ tshi na maḓi manzhi (ndi musi Yehova a sa athu u fhelisa Sodoma na Gomora), tshi tshi nga tsimu ya Yehova,+ tshi tshi nga shango ḽa Egipita tshi tshi guma nga Tsowari.+
11 Loto a nanga tshiṱiriki tshoṱhe tsha Yorodane, a pfulutshela vhubvaḓuvha. Vha fhandekana.
12 Abramu a dzula shangoni ḽa Kanana, ngeno Loto o dzula miḓini ya tshiṱirikini tsha Yorodane.+ Mafheleloni a atha dennde tsini na Sodoma.
13 Vhathu vha Sodoma vho vha vhe vhavhi, vhe vhaitazwivhi vhahulu phanḓa ha Yehova.+
14 Yehova a amba na Abramu musi Loto o no ṱuwa a ri: “Ndi humbela uri u lavhelese wo ima henefho, u sedze devhula na tshipembe, vhubvaḓuvha na vhukovhela,
15 ngauri shango ḽoṱhe ḽine wa ḽi vhona ndi ḓo ḽi ṋea iwe na vhana* vhau, ḽa vha ḽau lwa tshoṱhe.+
16 Ndi ḓo ita uri vhana* vhau vha nge buse ḽa kha ḽifhasi, uri arali muthu a kona u vhala buse ḽa kha ḽifhasi, zwi amba uri u ḓo kona u vhala na vhana* vhau.+
17 Takuwa u tshimbile u ḓivhe vhulapfu na vhuphara ha heḽi shango, ngauri ndi ḓo ḽi ṋea iwe.”
18 Abramu a bvela phanḓa a tshi dzula madenndeni. Nga murahu a ya a dzula tsini na miri mihulu ya Mamure,+ hune ha vha Heburoni,+ henefho a fhaṱela Yehova aḽeṱare.+
