Genesi 2:1-25
2 Ngauralo, a fhedza u sika ḽiṱaḓulu na ḽifhasi na zwoṱhe zwi re khazwo.*+
2 Nga ḓuvha ḽa vhusumbe, Mudzimu o vha o fhedza mushumo we a u ita, a awela nga ḓuvha ḽa vhusumbe kha mishumo yawe yoṱhe ye a vha a tshi khou i ita.+
3 Mudzimu a fhaṱutshedza ḓuvha ḽa vhusumbe, a ḽi ita ḽikhethwa ngauri o awela ngaḽo kha mishumo yoṱhe ya u sika zwoṱhe zwe a vha o dzudzanya u zwi ita.
4 Haya ndi mafhungo a musi hu tshi sikwa ḽiṱaḓulu na ḽifhasi, nga ḓuvha ḽe Yehova* Mudzimu a sika ngaḽo ḽifhasi na ḽiṱaḓulu.+
5 Ho vha hu si na ḓaka kha ḽifhasi, hu sa athu u vha na zwimela, ngauri Yehova Mudzimu o vha a sa athu u nisa mvula kha ḽifhasi, hu si na muthu wa u lima mavu.
6 Fhedzi khuli yo vha i tshi bva kha ḽifhasi ya ṋukadza mavu oṱhe.
7 Yehova Mudzimu a vhumba munna nga buse,+ ningoni dzawe a vhudzulela mufemo u ṋeaho vhutshilo,+ a vha muthu a tshilaho.*+
8 Zwiṅwe hafhu, Yehova Mudzimu a lima tsimu ya Edeni,+ thungo ya vhubvaḓuvha, henefho a vhea muthu we a mu vhumba.+
9 Ngauralo, Yehova Mudzimu a medza miri yoṱhe i tshi bva mavuni ye ya vha i tshi takadza maṱo, yo fanela u ḽiwa, a medza na muri wa vhutshilo+ vhukati ha tsimu na muri wa u ḓivha zwivhuya na zwivhi.+
10 Ho vha hu na mulambo we wa vha u tshi elela u tshi bva Edeni u tshi sheledza tsimu, u bva henefho wa fhandekana wa bva milambo miṋa.*
11 Wa u thoma u pfi Pisoni; ndi wone une wa elela u tshi mona na shango ḽoṱhe ḽa Havila, hune ha vha na musuku.
12 Musuku wa ḽeneḽo shango ndi wavhuḓi. Hu dovha ha vha na ṋonzhe dza Bedola na tombo ḽa onikisi.
13 Mulambo wa vhuvhili u pfi Gihoni; ndi wone une wa elela u tshi mona na shango ḽoṱhe ḽa Kushi.
14 Mulambo wa vhuraru u pfi Hidekele;+ ndi wone une wa elela u tshi ya vhubvaḓuvha ha Asuri.+ Mulambo wa vhuṋa u pfi Yufuratha.+
15 Yehova Mudzimu a dzhia muthu a mu vhea tsimuni ya Edeni uri a i lime na u i ṱhogomela.+
16 Yehova Mudzimu a dovha a laya muthu a ri: “U nga ḽa miri yoṱhe ya tsimuni uri u fushee.+
17 Fhedzi muri wa u ḓivha zwivhuya na zwivhi u songo u ḽa, ngauri ḓuvha ḽine wa ḓo u ḽa, u ḓo fa.”+
18 Yehova Mudzimu a ri: “A si zwavhuḓi munna a tshi dzula e eṱhe. Ndi ḓo mu itela muthusi, mufarisi o mu teaho.”+
19 Yehova Mudzimu a vhumba phukha dzoṱhe dza ḓaka na zwiṋoni zwoṱhe nga mavu, a zwi isa kha muthu uri a vhone uri o vha a tshi ḓo vhidza hani tshiṅwe na tshiṅwe tshazwo; madzina e muthu a vhidza tshiṅwe na tshiṅwe tshi tshilaho ngao, a vha madzina azwo.+
20 Muthu a ira zwifuwo zwoṱhe na zwiṋoni zwi fhufhaho ṱaḓulu na phukha dzoṱhe, fhedzi muthu a si wane muthusi ane a vha mufarisi o mu fanelaho.
21 Yehova Mudzimu a eḓedza muthu khofhe khulu, musi o eḓela, a bvisa luvhabvu khae, a thivha henefho fhethu nga ṋama.
22 Yehova Mudzimu a vhumba mufumakadzi nga luvhabvu lwe a lu bvisa kha munna, a mu ḓisa kha munna.+
23 Munna a ri:
“Uyu ndi ene shambo ḽa shambo ḽangaṊama ya ṋama yanga.Onoyu u ḓo pfi Mufumakadzi,Ngauri o bviswa kha munna.”+
24 Ndi ngazwo munna a tshi ḓo sia khotsi awe na mme awe a nambatela* mufumakadzi wawe, vha vha ṋama nthihi.+
25 Munna na mufumakadzi wawe vha dzula vhe fhedzi;+ vha sa shoni.
Ṱhaluso dzi re magumoni a siaṱari
^ Thevhedz., “na mavhuthu azwo oṱhe.”
^ Thevhedz., “wa vha milonga miṋa.”
^ Kana “a dzula na.”
