Genesi 33:1-20
33 Yakobo a lavhelesa a vhona Esau a tshi khou ḓa na vhanna vha 400.+ Ngauralo, a dzhia vhana vhawe a vha kovhela Lea, Rahele na vhashumeli vhavhili vha vhafumakadzi.+
2 A rangisa phanḓa vhashumeli vha vhafumakadzi na vhana vhavho,+ ha tevhela Lea na vhana vhawe,+ Rahele+ na Yosefa vha vha tevhela nga murahu.
3 Ene a vha ranga phanḓa, a khotha lwa sumbe musi a tshi sendela tsini na mukomana wawe.
4 Fhedzi Esau a gidima uri a mu ṱanganedze, a mu kuvhatedza, a mu khisa, vha lila.
5 Esau a tshi lavhelesa a vhona vhafumakadzi na vhana, a ri: “Ndi vhonnyi avha vhane wa vha navho?” Yakobo a ri: “Ndi vhana vhe Mudzimu a vha ṋea mushumeli wau.”+
6 Ha sendela vhashumeli vha vhafumakadzi na vhana vhavho vha losha
7 na Lea a sendela na vhana vhawe, vha losha. Nga murahu ha tevhela Yosefa na Rahele, vha losha.+
8 Esau a ri: “Ndi ngani wo rumela vhathu na zwifuwo zwe nda ṱangana nazwo?”+ Yakobo a ri: “Ndi u itela uri muṋe wanga a ntakalele.”+
9 Esau a ri: “Ndi na zwifuwo zwinzhi vhukuma, murathu wanga.+ Zwau nga zwi dzule zwi zwau.”
10 Naho zwo ralo, Yakobo a ri: “Aiwaa! Arali u tshi ntakalela u fanela u dzhia tshifhiwa tshanga, ngauri ndo u ṋea tshone uri ndi kone u vhona tshifhaṱuwo tshau. Ndo vhona tshifhaṱuwo tshau zwa tou nga ndi khou vhona tshifhaṱuwo tsha Mudzimu nge wa ntakalela.+
11 Ndi khou humbela uri u dzhie tshenetshi tshifhiwa tsha u u fhaṱutshedza tshe nda u ḓisela tshone,+ ngauri Mudzimu o ntakalela na uri ndi na tshiṅwe na tshiṅwe tshine nda tshi ṱoḓa.”+ A bvela phanḓa a tshi mu kombetshedza, a vhuya a tshi dzhia.
12 Nga murahu Esau a ri: “Kha ri ṱuwe, nṋe ndi ḓo u ranga phanḓa.”
13 Fhedzi Yakobo a amba nae a ri: “Muṋe wanga u a zwi ḓivha uri vhana vha kha ḓi vha vhatete,+ ndi tea u ṱhogomela nngu na kholomo dzine dza khou mamisa. Arali dza khadwa nga u ṱavhanya nga ḓuvha ḽithihi, sambi ḽoṱhe ḽi ḓo fa.
14 Ndi khou humbela uri muṋe wanga a range mushumeli wawe phanḓa, fhedzi ndi ḓo bvela phanḓa na lwendo nga u ongolowa nga nḓila ine zwifuwo zwanga zwa tshimbila ngayo na nḓila ine vhana vha tshimbila ngayo, uri ndi vhuye ndi swike ha muṋe wanga ngei Seiri.”+
15 Esau a ri: “Ndi khou humbela uri ndi u sie na vhaṅwe vhathu vhanga.” Yakobo a ri: “Ndi ngani u tshi khou ita zwenezwo? Kha ndi wane vhuthu maṱoni au muṋe wanga.”
16 Nga ḽeneḽo ḓuvha Esau a vhuyelela Seiri.
17 Yakobo a ya Sukothe,+ a ḓifhaṱela nnḓu henefho, masambi awe a a fhaṱela madanga. Ndi ngazwo dzina ḽa fhethu henefho ḽi tshi pfi Sukothe.*
18 Musi Yakobo a tshi bva ngei Phadani-aramu,+ o swika o tsireledzea muḓini wa Shikeme+ shangoni ḽa Kanana,+ a fhaṱa mushasha wawe tsini na wonoyo muḓi.
19 A renga tshipiḓa tsha tsimu kha vharwa vha Hemoro, khotsi a Shikeme nga shekele* dza 100, a atha dennde ḽawe henefho.+
20 Nga murahu ha zwenezwo, a fhaṱa aḽeṱare henefho, a ri i pfi Mudzimu, ane a vha Mudzimu wa Isiraele.+
Ṱhaluso dzi re magumoni a siaṱari
^ Zwine zwa amba uri “Mishasha; Vhukhudo.”
^ Shekele nthihi i lemela gramu dza 11,4. Sedzani Ṱhume. B14.
