Genesi 4:1-26
4 Adamu a ita zwa vhudzekani na Eva mufumakadzi wawe, a vhifha muvhilini.+ Nga u ya ha tshifhinga a beba Kaini,+ a ri: “Yehova o nthusa nda beba ṅwana* wa mutukana.”
2 Nga murahu a dovha a beba Abele,+ murathu wa Kaini.
Abele a vha mulisa wa sambi, fhedzi Kaini a vha mulimi.
3 Ho no fhela tshifhinga Kaini a ḓisa miṅwe mitshelo ya tsimuni sa tshifhiwa tsha Yehova.
4 Abele na ene a ḓisa maṅwe a matanzhe a sambi ḽawe,+ u katela na mapfura ao. Yehova a takalela Abele na tshifhiwa tshawe,+
5 fhedzi a si takalele Kaini na tshifhiwa tshawe. Ngauralo, Kaini a sinyuwa vhukuma a ṱungufhala.*
6 Yehova a amba na Kaini a ri: “Ndi ngani wo sinyuwa nga u rali, wo ṱungufhala?
7 Arali wa ita zwivhuya, naa a thi nga dovhi nda u takalela? Fhedzi arali wa sa ita zwivhuya, tshivhi tshi khou u dodela tshi muṋangoni. Tshi ṱoḓa u u langa, fhedzi naa u ḓo tshi kunda?”
8 Kaini a amba na Abele murathu wawe a ri: “Kha ri ye masimuni.” Musi vhe henengei masimuni, Kaini a rwa Abele a mu vhulaya.+
9 Nga murahu, Yehova a amba na Kaini a ri: “Abele murathu wau u ngafhi?” Ene a ri: “A thi ḓivhi. Naa ndi dzula ndo linda murathu wanga?”
10 Mudzimu a ri: “Wo ita mini? Thetshelesa! Malofha a murathu wau a khou nṱavhela mukosi e mavuni.+
11 Zwino wo semiwa na u pandelwa kha mavu e a ṱanganedza malofha a murathu wau e a shululwa nga tshanḓa tshau.+
12 Musi u tshi lima mavu, ha nga ḓo u ṋea zwiḽiwa. U ḓo tendeleka wa vha tshavhi ḽifhasini.”
13 Kaini a amba na Yehova a ri: “Ṱhamu ya vhukhakhi hanga ndi khulwane vhukuma lune ndi nga si kone u i konḓelela.
14 Ṋamusi u khou mpandela kha ḽino shango na phanḓa ha tshifhaṱuwo tshau; ndi ḓo vha mutendeleki na u vha tshavhi ḽifhasini, ane a ngwana u ḓo mmbulaya.”
15 Yehova a amba nae a ri: “Nga nṱhani ha zwenezwo, ane a vhulaya Kaini u ḓo lifhedzwa lwa sumbe.”
Yehova a vhea luswayo kha Kaini u itela uri ane a mu wana a si mu vhulaye.
16 Kaini a ṱuwa phanḓa ha Yehova a dzula shangoni ḽa Vhushavhelo,* vhubvaḓuvha ha Edeni.+
17 Nga murahu Kaini a ita zwa vhudzekani na mufumakadzi wawe,+ a vhifha muvhilini a beba Henoxe. Kaini a fhaṱa muḓi a u ira dzina ḽa murwa wawe Henoxe.
18 Nga murahu Henoxe a beba Irada. Irada a beba Mehuyaele, Mehuyaele a beba Methusaele, Methusaele a beba Lamexe.
19 Lamexe a vhinga vhafumakadzi vhavhili. Wa u thoma o vha a tshi pfi Ada wa vhuvhili o vha a tshi pfi Tsila.
20 Ada a beba Yabale. Yabale o vha ene wa u thoma u dzula madenndeni na u vha na zwifuwo.
21 Murathu wawe o vha a tshi pfi Yubale. Ndi ene wa u thoma kha vhalidzi vhoṱhe vha haripa na zwiṱiringo.
22 Tsila na ene a dovha a beba Tubala-kaini, we a vha a tshi ita* zwishumiswa zwoṱhe zwa koporo na zwa tsimbi. Khaladzi a Tubala-kaini o vha e Naama.
23 Lamexe o ṅwalela Ada na Tsila vhafumakadzi vhawe haya maipfi:
“Ipfani ipfi ḽanga, inwi vhafumakadzi vha Lamexe;Thetshelesani zwine nda amba:
Ndo vhulaya munna we a nkhuvhadza,Ndo vhulaya muṱhannga we a nthwa.
24 Arali Kaini a tshi ḓo lifhedzwa lwa 7,+Lamexe u ḓo lifhedzwa lwa 77.”
25 Adamu a dovha a ita zwa vhudzekani na mufumakadzi wawe, a beba murwa. A mu ira dzina ḽa Sethe,*+ ngauri o amba a ri: “Mudzimu o nṋea muṅwe ṅwana* vhudzuloni ha Abele, ngauri Abele o vhulawa nga Kaini.”+
26 Sethe a beba murwa a mu ira dzina ḽa Enosi.+ Nga tshenetsho tshifhinga vhathu vha thoma u vhidzelela dzina ḽa Yehova.
Ṱhaluso dzi re magumoni a siaṱari
^ Thevhedz., “nda beba munna.”
^ Thevhedz., “tshifhaṱuwo tshawe tsha sinyalala.”
^ Kana “shangoni ḽa Nodo.”
^ Kana “we a vha e mufuli wa.”
^ Zwine zwa amba uri “O Vhewaho.”
^ Thevhedz., “mbeu.”
