Genesi 50:1-26
50 Yosefa a ḓiposa nṱha ha khotsi+ awe a lila a mu khisa.
2 Nga murahu ha zwenezwo, Yosefa a laedza vhashumeli vhawe, vhane vha vha madokotel uri vha ḓodze tshitumbu tsha khotsi awe mishonga+ uri tshi si sine. Madokotela a ḓodza tshitumbu tsha Isiraele nga mishonga uri tshi si sine,
3 vha mu lilela maḓuvha a 40, ngauri zwi dzhia maḓuvha eneo u ḓodza tshitumbu mishonga uri tshi si sine, Vhaegipita vha bvela phanḓa vha tshi mu lilela maḓuvha a 70.
4 Maḓuvha a u mu lilela a fhela, Yosefa a amba na vha muṱa wa Farao a ri: “Arali ni tshi ntakalela, ni vhudze Farao uri:
5 ‘Khotsi anga o nnyanisa+ a ri: “U a zwi vhona uri ndi khou fa.+ U mbulunge vhiḓani ḽanga,+ ḽe nda dzula ndo ḓilugiselela ḽone shangoni ḽa Kanana.”+ Ndi khou humbela uri u ntendele ndi ye ndi vhulunge khotsi anga, nga murahu ndi ḓo vhuya.’”
6 Farao a fhindula a ri: “Ita zwe wa ana+ u ye u vhulunge khotsi au.”
7 Yosefa a ya a vhulunga khotsi awe e na vhashumeli vha Farao vhoṱhe, vhahulwane+ vha nnḓu yawe na vhahulwane vhoṱhe vha shangoni ḽa Egipita
8 na muṱa woṱhe wa Yosefa, vhakomana vhawe na muṱa wa khotsi awe.+ Ho vha ho sala vhana vhavho vhaṱuku na nngu dzavho na kholomo dzavho fhedzi shangoni ḽa Gosheni.
9 A ṱuwa na dzigariki+ na vhaṋameli vha bere, vho vha vhe tshigwada tshihulu vhukuma.
10 Musi vha tshi swika fhethu hune ha fhefherwa hone* ngei Atadi tsini na dzingu ḽa Yorodane, vha vusa tshililo tshihulu tshi ṱungufhadzaho; vha bvela phanḓa vha tshi lilela khotsi awe maḓuvha a sumbe.
11 Musi Vhakanana vha dzulaho kha ḽeneḽo shango vha tshi vha vhona vha tshi khou lila fhethu hune ha fhefherwa hone* ngei Atadi, vha ri: “Hetshi ndi tshililo tshihulu tsha Vhaegipita!” Ndi ngazwo henefho fhethu ho vhidzwa Abele-miziraimi,* hune ha vha tsini na dzingu ḽa Yorodane.
12 Ngauralo, vharwa vhawe vha ita zwoṱhe zwe a vha laedza zwone.+
13 Vharwa vhawe vha mu isa shangoni ḽa Kanana, vha mu vhulunga bakoni ḽi re tsimuni ya Makapela, tsimu i re phanḓa ha Mamure ye Abrahamu a i renga kha Efuroni wa Muhethe uri hu vhe mavhiḓa.+
14 Musi Yosefa o no vhulunga khotsi awe, a humela Egipita na vhakomana vhawe na vhoṱhe vhe a ṱuwa navho musi a tshi ya u vhulunga khotsi awe.
15 Nga murahu ha lufu lwa khotsi avho, vhakomana vha Yosefa vha ri: “Yosefa a nga vha o ri fara nga mbilu a tshi ḓo ri lifhedza vhuvhi hoṱhe he ra mu ita hone.”+
16 Vha ruma muthu a ya a amba na Yosefa haya maipfi: “Musi khotsi au a sa athu u fa o amba uri:
17 ‘Ni fanela u amba na Yosefa na ri: “Ndi a u humbela uri u hangwele vhakomana vhau vhutshinyi havho he vha u itela hone.”’ Zwino ri khou humbela uri u hangwele vhashumeli vha Mudzimu wa khotsi au vhutshinyi havho.” Yosefa a lila musi vha tshi amba nae.
18 Nga murahu ha zwenezwo, vhakomana vhawe vha ḓa vha gwadama vha ri: “Ri vhalanda vhau!”+
19 Yosefa a amba navho a ri: “Ni songo ofha. Naa ndi nga ḓivhea vhuimoni ha Mudzimu?
20 Naho no vha ni tshi khou ṱoḓa u nkhuvhadza,+ Mudzimu o vha o dzudzanya uri zwi vhe zwivhuya u itela uri hu tshidzwe vhathu vhanzhi, samusi a tshi khou zwi ita ṋamusi.+
21 Zwino ni songo ofha. Ndi ḓo bvela phanḓa ndi tshi ṋea inwi na vhana vhaṋu zwiḽiwa.”+ Nga zwenezwo, a vha khuthadza a amba navho nga vhulenda.
22 Yosefa a bvela phanḓa a tshi dzula Egipita, ene na muṱa wa khotsi awe, Yosefa a tshila miṅwaha ya 110.
23 Yosefa a vhona vhaḓuhulu vha Efuraimi,+ na vharwa vha Maxiri,+ murwa wa Manase. Vho vha vha tshi tou nga vhana vha Yosefa, vha tshi farwa zwavhuḓi.*
24 Yosefa a vhudza vhakomana vhawe a ri: “Ndi khou fa; fhedzi Mudzimu u ḓo ni thusa zwa vhukuma,+ u ḓo ni bvisa kha heḽi shango a ni isa kha shango ḽe a anela Abrahamu, Isaka na Yakobo.”+
25 Yosefa a anisa vharwa vha Isiraele a ri: “Mudzimu u ḓo ni thusa zwa vhukuma. Ngauralo, musi ni tshi ṱuwa ni tea u hwala marambo anga na ṱuwa nao fhano.”+
26 Yosefa a fa e na miṅwaha ya 110, vha ḓodza tshitumbu tshawe mishonga+ uri tshi si sine, vha mu dzhenisa bogisini ḽa vhafu henefho Egipita.
Ṱhaluso dzi re magumoni a siaṱari
^ Kana “swika luvhatani.”
^ Kana “lila luvhatani.”
^ Zwine zwa amba uri “Tshililo Tsha Vhaegipita.”
^ Thevhedz., “Vho bebelwa magonani a Yosefa.”
