Evangeli Ya Mateo 10:1-42
10 A vhidza vhafunziwa vhawe vha 12 a vha ṋea maanḓa a u langa madimoni,+ uri vha a pandele na u fhodza malwadze oṱhe na maṱungu oṱhe.
2 Madzina a vhaapostola vha 12 ndi haya:+ Wa u thoma ndi Simoni ane a vhidzwa Petro+ na Andrea+ murathu wawe; na Yakobo murwa wa Sebedeo na murathu wawe Yohane;+
3 Filipo na Baratholomeo;+ Thomasi+ na Mateo+ wa muthelisi; Yakobo murwa wa Alifeo; na Thadeo;
4 Simoni wa Kanania* na Yudasi Iskariote we nga murahu a fheṱa Yesu.+
5 Yesu a ruma vhenevho vha 12, a vha laya a ri:+ “Ni songo ya kha vha dzitshaka, ni songo ya miḓini ya Samaria;+
6 nṱhani hazwo, bvelani phanḓa ni tshi ya kha nngu dzo xelaho dza vha nnḓu ya Isiraele.+
7 Musi ni tshi khou tshimbila, ni huwelele ni ri: ‘Muvhuso wa ṱaḓulu u tsini.’+
8 Ni fhodze vha lwalaho+ na vha mapele, ni vuse vho faho, ni pandele na madimoni. No ṋewa mahala, ṋeani nga mahala.
9 Ni songo fara musuku, siḽiva kana koporo,+
10 kana mbuvha, kana zwiṅwe zwiambaro,* kana thovho,* kana lubaḓa,+ ngauri mushumi o tewa nga u ṋewa zwiḽiwa.+
11 “Musi ni tshi dzhena muḓini kana muḓanani naho u ufhio, ni ṱoḓe a faneleaho, ni dzule henefho u swika ni tshi ṱuwa.+
12 Ni tshi dzhena nḓuni, ni lumelise vha re nḓuni.
13 Arali yeneyo nnḓu i tshi fanelea, mulalo waṋu u vhe khayo;+ arali i sa fanelei, mulalo waṋu u humele kha inwi.
14 Hoṱhe hune na si ṱanganedzwe kana hune na si thetsheleswe, ni fhufhure buse ḽi re milenzheni yaṋu musi ni tshi ṱuwa kha yeneyo nnḓu kana muḓi.+
15 Ngoho ndi a ni vhudza ndi ri, zwine zwa ḓo wela wonoyo muḓi nga Ḓuvha ḽa Khaṱhulo zwi ḓo fhira zwe zwa wela muḓi wa Sodoma na Gomora.+
16 “Ndi ni ruma sa nngu dzi yaho vhukati ha maṱarelwa;* ngauralo, ṱalifhani sa ṋowa, ni vuḓe sa maivha.+
17 Ni thanyele vhathu, ngauri vha ḓo ni isa khothe,+ vha ni rwa+ sinagogoni dzavho.+
18 Vha ḓo ni isa kha vhavhusi na kha mahosi+ nga nṱhani hanga, uri ni kone u ṱanziela khavho na kha dzitshaka.+
19 Naho zwo ralo, musi vha tshi ni isa kha vhavhusi, ni songo vhilaela uri ni ḓo amba hani kana uri ni ḓo ri mini, zwine na ḓo zwi amba ni ḓo zwi vhudzwa nga tshenetsho tshifhinga;+
20 ngauri a si inwi ni ambaho, fhedzi ndi muya wa Khotsi aṋu u ambaho kha inwi.+
21 Zwiṅwe hafhu, mukomana u ḓo vhulayisa murathu, khotsi a vhulayisa ṅwana, vhana vha ḓo lwa na vhabebi vha vha vhulayisa.+
22 Ni ḓo vhengiwa nga vhathu vhoṱhe nga nṱhani ha dzina ḽanga,+ fhedzi we a konḓelela* u swika vhufheloni u ḓo tshidzwa.+
23 Musi vha tshi ni tovhola kha muṅwe muḓi ni shavhele kha muṅwe;+ ngoho ndi a ni vhudza uri, Murwa muthu u ḓo vhuya ni sa athu u ṱanganya miḓi yoṱhe ya Isiraele.
24 “Mufunziwa ha fhiri we a mu funza, mulanda ha fhiri muṋe wawe.+
25 Mufunziwa u ḓo farwa nga nḓila i fanaho na ya we a mu funza, mulanda a farwa nga nḓila i fanaho na ya muṋe wawe.+ Arali vhathu vha tshi amba uri muṋe wa nnḓu u pfi Belesebubu,*+ vha nga kundwa hani u vhidza vha nnḓu yawe nga u ralo?
26 Ndi ngazwo ni songo fanela u vha ofha, ngauri a hu na tsho dzumbiwaho tshine tsha sa ḓo dzumbululwa, a hu na tshiphiri tshine tsha sa ḓo bvela khagala.+
27 Zwine nda ni vhudza swiswini, ni zwi ambe tshedzani, zwine na zwi pfa zwi tshi hevhedzwa, ni zwi huwelele ni kha ṱhanga.+
28 Ni songo ofha vhane vha nga ni vhulaya, fhedzi vha si kone u ita uri ni si tshile* tshoṱhe;+ nṱhani hazwo, ni ofhe ane a nga ni fhelisa Gehena.*+
29 Naa zwiṋoni zwiṱuku* zwivhili a zwi rengwi nga peni* nthihi? Naho zwo ralo, a hu na na tshithihi tshazwo tshine tsha ḓo wela fhasi Khotsi aṋu a sa zwi ḓivhi.+
30 Na mavhudzi oṱhe a re ṱhohoni dzaṋu o vhaliwa.
31 Ngauralo, ni songo ofha; ni vha ndeme vhukuma u fhira zwiṋoni zwiṱuku zwinzhi.+
32 “Vhoṱhe vhane vha ntenda phanḓa ha vhathu,+ na nṋe ndi ḓo vha tenda phanḓa ha Khotsi anga a re ṱaḓulu.+
33 Fhedzi ane a nndandula phanḓa ha vhathu, na nṋe ndi ḓo mu landula phanḓa ha Khotsi anga wa ṱaḓulu.+
34 Ni songo humbula uri ndi khou ḓisa mulalo kha ḽifhasi; ndo ḓisa banga hu si mulalo.+
35 Ndo ḓa u fhandekanya vhathu, murwa u ḓo lwa na khotsi awe, ṅwananyana a lwa na mme awe, mazwale a lwa na mazwale wawe.+
36 Maswina a muthu a ḓo vha vha muṱa wawe.
37 Ane a funesa khotsi awe kana mme awe u fhira nṋe ho ngo tewa nga u vha wanga; na ane a funesa murwa wawe kana ṅwananyana wawe u fhira nṋe ho ngo tewa nga u vha wanga.+
38 A sa hwaliho danda* ḽawe a ntsala murahu, ho ngo tewa nga u vha wanga.+
39 Ane a tsireledza vhutshilo* hawe u ḓo fa, ane a fa ngauri u mufunziwa wanga, u ḓo dovha a tshila.+
40 “A ni ṱanganedzaho u ṱanganedza na nṋe, a ṱanganedzaho nṋe, u ṱanganedza na O nthumaho.+
41 Ane a ṱanganedza muporofita u ḓo wana malamba a muporofita,+ ane a ṱanganedza muthu o lugaho u ḓo wana malamba a muthu o lugaho.
42 Na ane a ṋea muṅwe wa avha vhaṱuku maḓi a u nwa ngauri ndi mufunziwa wanga, ngoho ndi a ni vhudza, u ḓo wana malamba awe.”+
Ṱhaluso dzi re magumoni a siaṱari
^ Kana “ane a fhisea.”
^ Kana “phashane, navhula.”
^ Thevhedz., “zwiambaro zwivhili.”
^ Kana “mmbwa dza ḓaka.”
^ Kana “ane a konḓelela.”
^ Zwi ambela kha Saṱhane ane a vha mukololo kana muvhusi wa madimoni.
^ Sedzani Mutevhe Wa Ṱhalutshedzo Ya Maipfi.
^ Thevhedz., “asarioni.” Sedzani Ṱhume. B14.
^ Kana “ṱhongola.”
^ Sedzani Mutevhe Wa Ṱhalutshedzo Ya Maipfi.
