Evangeli Ya Mateo 22:1-46
22 Yesu a dovha a amba navho nga zwifanyiso, a ri:
2 “Muvhuso wa ṱaḓulu u nga fanyiswa na khosi ye ya itela murwa wayo munyanya wa mbingano.+
3 Yeneyo khosi ya ruma vhalanda vhayo uri vha vhidze vho rambiwaho munyanyani, fhedzi vho vha vha sa ṱoḓi u ḓa.+
4 Ya dovha ya ruma vhaṅwe vhalanda, ya ri, ‘Vhudzani vho rambiwaho ni ri: “Ndo lugiselela zwiḽiwa, ndo ṱhavha kholomo na zwifuwo zwo nonaho, zwithu zwoṱhe zwo luga. Iḓani munyanyani.”’
5 Fhedzi vha si vhe na ndavha nazwo, muṅwe a ya tsimuni yawe, muṅwe a ya binduni ḽawe;+
6 vhaṅwe vha fara vhalanda vhawe, vha vha rwa vha vha vhulaya.
7 “Khosi ya sinyuwa zwihulu, ya ruma mmbi yayo uri i ye i vhulaye vhaḽa vhavhulayi na u fhisa muḓi wavho.+
8 Ya amba na vhalanda vhayo ya ri, ‘Munyanya wo dzudzanyiwa, fhedzi vho rambiwaho a vha fanelei.+
9 Iyani nḓilani dzine dza bvela nnḓa ha muḓi, ni rambe ane na mu wana uri a ḓe munyanyani.’+
10 Vhenevho vhalanda vha ya dzinḓilani vha ramba vhoṱhe vho vha wanaho, vhavhi na vhavhuya; fhethu hune munyanya wa khou itelwa hone ha ḓala nga vhaeni.*
11 “Musi khosi i tshi ḓa u sedza vhaeni ya vhona munna we a vha a songo ambara zwiambaro zwa munyanya.
12 Ya amba nae ya ri, ‘Wahashu, wo dzhena hani fhano u songo ambara zwiambaro zwa munyanya?’ A si fhindule.
13 Khosi ya vhudza vhalanda vhayo ya ri, ‘Mu vhofheni milenzhe na zwanḓa ni mu pose nnḓa swiswini. Henefho ndi hune a ḓo lila na u shenganya maṋo.’
14 “Ngauri vho rambiwaho ndi vhanzhi, fhedzi vho nangiwaho ndi vhaṱuku.”
15 Vhafarisei vha ya vha langana uri vha mu fashe nga zwine a zwi amba.+
16 Vha rumela vhafunziwa vhavho khae vhe na vhatevheli vha Herode,+ vha ri: “Mufunzi, ri a zwi ḓivha uri a u zwifhi, u funza nḓila ya ngoho ya Mudzimu na uri a u ṱoḓi u takadza muthu, ngauri a u sedzi zwine muthu a vha zwone.
17 Ri vhudze, u zwi vhona hani? Naa zwo tea uri ri badele Kesare muthelo?”
18 Nge Yesu a vha a tshi ḓivha vhuvhi havho, a amba navho a ri: “Ndi ngani ni tshi nndinga inwi vha re na muhoyo?
19 Ntsumbedzeni tshelede ine na thela ngayo.” Vha mu ḓisela dinari.*
20 A vha vhudzisa a ri: “Tshifanyiso itshi na dzina iḽi ndi zwa nnyi?”
21 Vhone vha ri: “Ndi zwa Kesare.” Ene a ri: “Kesare mu ṋeeni zwi re zwawe, na Mudzimu ni mu ṋee zwi re zwawe.”+
22 Musi vha tshi pfa zwenezwo vha mangala, vha ṱuwa vha mu sia.
23 Nga ḽeneḽo ḓuvha, ha ḓa Vhasadukei vhane vha tenda uri vhathu a vha nga vuswi,+ vha ri:+
24 “Mufunzi, Mushe o ri: ‘Arali munna a fa a si na vhana, murathu wawe u fanela u vhinga onoyo mufumakadzi uri a bebele mukomana wawe vhana.’+
25 Ho vha hu na vhanna vha sumbe vha re vhana vha muthu.* Wa u thoma a vhinga, a fa a si na ṅwana, wa vhuvhili a vhinga mufumakadzi wawe.
26 Ha itea zwi fanaho kha wa vhuvhili na wa vhuraru u swika kha wa vhusumbe, vhoṱhe vha fa vha si na ṅwana.
27 Mafheleloni na onoyo mufumakadzi a fa.
28 Musi vhafu vha tshi vuswa, onoyo mufumakadzi u ḓo vha wa nnyi kha vhenevho vha sumbe? Ngauri vhoṱhe vho vha vho mu vhinga.”
29 Yesu a ri: “No khakha, ngauri a ni ḓivhi Maṅwalo kana maanḓa a Mudzimu,+
30 musi vhafu vha tshi vuswa, vhanna a vha nga vhingi na vhafumakadzi a vha nga vhingwi, fhedzi vha ḓo nga vharuṅwa vha ngei ṱaḓulu.+
31 No no vhala nga ha u vuswa ha vhafu. Naa a no ngo vhala zwe Mudzimu a ni vhudza zwone? Musi a tshi ri:
32 ‘Ndi nṋe Mudzimu wa Abrahamu, Mudzimu wa Isaka na Mudzimu wa Yakobo.’+ Ndi Mudzimu wa vha tshilaho, hu si vho faho.”+
33 Musi vhathu vha tshi zwi pfa, vha mangadzwa nga zwe a vha a tshi khou zwi funza.+
34 Musi Vhafarisei vha tshi pfa uri Yesu o kunda Vhasadukei, vha mu ḓela vhoṱhe.
35 Muṅwe wavho ane a ḓivha Mulayo a mu linga nga u vhudzisa uri:
36 “Mufunzi, Mulayo muhulwane kha yoṱhe ndi ufhio?”+
37 A fhindula a ri: “‘U tea u funa Yehova* Mudzimu wau nga mbilu yau yoṱhe na nga zwoṱhe zwine wa vha zwone na nga ṱhalukanyo yau yoṱhe.’+
38 Ndi wone mulayo muhulwane na wa u thoma.
39 Wa vhuvhili une wa fana nawo ndi hoyu: ‘U tea u funa muhura wau vhunga u tshi ḓifuna.’+
40 Mulayo woṱhe na zwe vhaporofita vha zwi amba zwi bva kha yeneyi milayo mivhili.”+
41 Musi Vhafarisei vho kuvhangana, Yesu a vha vhudzisa a ri:+
42 “Ni humbula mini nga ha Kristo? Ndi murwa wa nnyi?” Vha mu fhindula vha ri: “Ndi murwa wa Davida.”+
43 Yesu a vha vhudzisa a ri: “Musi Davida o hevhedzwa nga Mudzimu,+ ndi ngani o mu vhidza Murena, musi a tshi ri,
44 ‘Yehova* o amba na Murena wanga a ri: “Dzula thungo ya tshanḓa tshanga tsha u ḽa, u swika ndi tshi ita uri u kande maswina au”’?*+
45 Arali Davida o mu vhidza Murena, a nga vha hani murwa wawe?”+
46 A ho ngo vha na muthu we a kona u mu fhindula, kana we a mu vhudzisa mbudziso naho i ifhio u bva nga ḽeneḽo ḓuvha.
Ṱhaluso dzi re magumoni a siaṱari
^ Kana “vho dzulaho zwiḽiwani.”
^ Sedzani Ṱhume. B14.
^ Kana “vhana vha mme; vhana vha mme muthihi.”
^ Thevhedz., “ita maswina au vhukando ha milenzhe yau.”
