Mishumo Ya Vhaapostola 24:1-27
24 Nga murahu ha maḓuvha maṱanu, tshifhe muhulu Anania,+ vhaṅwe vhahulwane na muambeli* ane a pfi Teritulo, vha ḓa vha vhudza muvhusi+ mulandu une vha khou pomoka Paulo.
2 Musi Teritulo a tshi vhidzwa, a pomoka Paulo, a ri:
“Samusi ḽo lala nga nṱhani hau, hu tshi khou vha na tshanduko kha lwonolwu lushaka lwashu ngauri u dzula u tshi ri humbulela,
3 iwe Thovhela Felikisi, zwenezwi zwoṱhe ri a zwi livhuwa vhukuma.
4 Fhedzi a thi ṱoḓi u u fareledza. Ndi a u humbela, ri sumbedze vhuthu nga u ri thetshelesa zwiṱuku.
5 Ri ṱoḓa u u vhudza uri hoyu munna u vusa bonyongo,+ u ita uri Vhayuda vhoṱhe u mona na ḽifhasi vha lwe na muvhuso,+ u ranga phanḓa tshigwada tsha Vhanazaretha.+
6 O lingedza na u tshikafhadza thembele, ndi ngazwo ro mu fara.+
7 * ——
8 Musi u tshi mu sengisa, u ḓo vhona uri zwine ra khou zwi amba ndi ngoho.”
9 Vhayuda vha tshi pfa zwenezwo, na vhone vha sema Paulo, vha amba uri zwenezwo zwithu ndi ngoho.
10 Musi muvhusi a tshi tenda nga ṱhoho uri a ambe, Paulo a ri:
“Ndi a zwi ḓivha uri wo no fhedza miṅwaha minzhi u muhaṱuli wa holu lushaka, ndi ngazwo ndi tshi ḓiimelela nga tshivhindi.+
11 Samusi u tshi nga wana vhuṱanzi, ndi tshee ndo tou fhedza maḓuvha a 12 u bva tshee nda ya Yerusalema u rabela;+
12 a vho ngo vhuya vha nngwana ndi tshi khou ṱaṱa khani na muthu thembeleni kana ndo vusa bonyongo sinagogoni kana muḓini woṱhe.
13 A vha na vhuṱanzi ha zwine vha khou mpomoka zwone zwino.
14 Fhedzi ndi a tenda uri ndi tshila u ya nga zwine vha zwi vhidza tshigwada, ndi tshi itela Mudzimu wa vhomakhulukuku washu mushumo mukhethwa,+ ngauri ndi tenda zwoṱhe zwo ṅwaliwaho Mulayoni na kha bugu dza Vhaporofita.+
15 Nṋe na havha vhathu ri na fhulufhelo ḽa uri Mudzimu u ḓo vusa+ vho lugaho na vha songo lugaho.+
16 Ndi ngazwo ndi tshi lwela u dzula ndi na luvalo lwo kunaho* phanḓa ha Mudzimu na vhathu.+
17 Nga murahu ha miṅwaha minzhi, ndo ḓa nda ṋea vhathu vha lushaka lwa hashu tshelede ya u vha thusa,+ na u ṋekedza zwiṱhavhelo.
18 Vho nngwana thembeleni ndi tshi kha ḓi ita zwenezwo, musi ndo no fhedza u ḓikunakisa nga lwa mulayo,+ ndi si na gogo kana ndi sa khou vusa bonyongo. Ho vha hu na vhaṅwe Vhayuda vha bvaho vunduni ḽa Asia,
19 ndi vhone vhe vha vha vho fanela vho ḓa phanḓa hau u itela u mpomoka, arali hu na zwine vha nga mpomoka ngazwo.+
20 Tendela vhenevha vhathu vha ambe vhukhakhi he vha vhu wana musi vha tshi ntsengisa phanḓa ha Sanihedrini,*
21 tshine vha nga mpomoka ndi uri ndo ima phanḓa havho nda vhidzelela nda ri: ‘Ndi khou haṱulwa ngauri ndi tenda uri vhafu vha ḓo vuswa!’”+
22 Nge Felikisi a vha a tshi ḓivha zwavhuḓi mafhungo a yeneyi Nḓila,+ a vha balanganya a ri: “Ndi ḓo dzhia phetho nga ha enea mafhungo musi mulangammbi Lisia a tshi swika.”
23 A vhudza muhulwane wa maswole uri a dzule o mu linda, fhedzi a mu ṋee mbofholowo, a tendele vhahawe vha tshi mu ṋea zwine a zwi shaya.
24 Ho no fhela maḓuvha, Felikisi a swika na mufumakadzi wawe Drusilla wa Muyuda, a vhidza Paulo uri a mu thetshelese musi a tshi amba nga ha u tenda Kristo Yesu.+
25 Musi Paulo a tshi amba nga ha u luga, u ḓifara, na nga ha khaṱhulo ine ya khou ḓa,+ Felikisi a tshuwa, a ri: “U nga ṱuwa, ndi ḓo dovha nda u vhidza musi ndi tshi wana tshifhinga.”
26 O vha a tshi fhulufhela uri Paulo u ḓo mu ṋea tshelede. Ndi ngazwo o vha a tshi mu vhidza lunzhi-lunzhi uri a ambe nae.
27 Nga murahu ha miṅwaha mivhili, Portio Festo a vha muvhusi vhudzuloni ha Felikisi; nga tshenetsho tshifhinga Paulo o vha a tshee dzhele ngauri Felikisi o vha a tshi ṱoḓa u takadza Vhayuda.+
Ṱhaluso dzi re magumoni a siaṱari
^ Kana “ramilayo.”
^ Kana “lu si na mulandu.”
^ Sanihedrini ndi khothe khulwane ya Vhayuda.
