Mishumo Ya Vhaapostola 5:1-42
5 Muṅwe munna we a vha a tshi pfi Anania na mufumakadzi wawe Safira, vha rengisa tsimu.
2 Fhedzi Anania a dzumba iṅwe tshelede mufumakadzi wawe a tshi zwi ḓivha, iṅwe a i isa kha vhaapostola.+
3 Fhedzi Petro a ri: “Anania, ndi ngani Saṱhane o u ṱuṱuwedza uri u zwifhele+ muya mukhethwa+ nga u dzumba iṅwe tshelede ya tsimu?
4 Musi u sa athu u rengisa tsimu, naa yo vha i si yau? Musi wo no i rengisa, naa tshelede yo vha i sa ḓo dzula i yau? Ndi ngani wo humbula u ita zwithu zwo raloho mbiluni yau? A wo ngo zwifhela vhathu, wo zwifhela Mudzimu.”
5 Musi Anania a tshi pfa zwenezwo, a wela fhasi a fa. Vhoṱhe vhe vha zwi pfa vha ofha zwihulu.
6 Vhaṱhannga vha ḓa vha mu putela nga malabi, vha mu hwala vha ya vha mu vhulunga.
7 Musi ho no fhela awara dzi ṱoḓaho u vha tharu ha dzhena mufumakadzi wawe, a sa ḓivhi zwe zwa itea.
8 Petro a ri: “Mmbudze, naa iwe na munna wau no rengisa tsimu na wana yeneyi tshelede fhedzi?” Ene a ri: “Ee, ndi yeneyo fhedzi.”
9 Petro a ri: “Ndi ngani iwe na munna wau no langana u linga muya wa Yehova?* Vhe vha vhulunga munna wau vho ima muṋangoni, vha ḓo u hwalela nnḓa.”
10 Nga u ṱavhanya a wela milenzheni ya Petro a fa. Musi vhaṱhannga vha tshi dzhena vha wana o fa, vha mu hwalela nnḓa, vha mu vhulunga tsini na munna wawe.
11 Nga nṱhani ha zwenezwo, vhoṱhe tshivhidzoni na vhoṱhe vhe vha pfa nga ha zwenezwo vha ofha zwihulu.
12 Zwiṅwe hafhu, vhaapostola vha bvela phanḓa vha tshi ita vhuṱolo vhunzhi na zwithu zwi mangadzaho vhukati ha vhathu;+ vhoṱhe vho vha vha tshi kuvhangana Phasedzhini ya Salomo.+
13 Naho zwo ralo, vhaṅwe vho vha vha si na tshivhindi tsha u vha vhafunziwa; fhedzi vho vha vha tshi vha hulisa.
14 Vhanna na vhafumakadzi vhanzhi vha tenda Murena, vha vha vhafunziwa.+
15 Vha ḓisa na vhalwadze, vha vha vhea nḓilani vho vha ladza kha vhulalo, uri musi Petro a tshi fhira nga henefho, vhaṅwe vhavho vha welwe nga murunzi wawe.+
16 Vhathu vhanzhi vha bvaho miḓini i re tsini na Yerusalema vho vha vha tshi kuvhangana tshifhinga tshoṱhe, vha tshi ḓisa vhalwadze na vhane vha tambudzwa nga madimoni, vha fhodzwa vhoṱhe.
17 Fhedzi tshifhe muhulu na vhoṱhe vhe a vha e navho, vha tshigwada tsha Vhasadukei, vha vha na vivho.
18 Vha fara vhaapostola vha vha isa dzhele.+
19 Muruṅwa wa Yehova* a ḓa vhusiku a vula mavothi a dzhele,+ a vha bvisa, a ri:
20 “Iyani thembeleni ni bvele phanḓa ni tshi vhudza vhathu nga ha mafhungo oṱhe a vhuno vhutshilo.”
21 Musi vho no pfa zwenezwo, vha dzhena thembeleni nga matsheloni-tsheloni vha thoma u funza.
Musi tshifhe muhulu na vhe a vha e navho vha tshi swika, vha vhidza na miraḓo ya Sanihedrini* na tshigwada tshoṱhe tsha vhanna vhahulwane vha Isiraele, vha ruma vhaḓinḓa dzhele uri vha ḓise vhaapostola.
22 Fhedzi vhaḓinḓa vha tshi swika vha wana vha siho dzhele. Vha humela murahu vha swika vha vhiga,
23 vha ri: “Ro wana dzhele yo valiwa, vhalindi vho ima miṋangoni, fhedzi musi ri tshi vula ra wana hu si na muthu.”
24 Musi mulanguli wa vhalindi vha thembele na vhahulwane vha vhotshifhe vha tshi zwi pfa vha mangala, vha ḓivhudzisa hune zwenezwo zwithu zwa ḓo fhelela hone.
25 Muṅwe munna a ḓa a ri: “Vhanna vhe na vha valela dzhele vha khou funza vhathu thembeleni.”
26 Mulanguli wa vhalindi vha thembele na vhaḓinḓa vhawe vha ya vha vha dzhia, fhedzi vha si lwe navho, vha tshi ofha uri vhathu vha ḓo vha kanḓa nga matombo.+
27 Vha vha ḓisa vha vha imisa phanḓa ha Sanihedrini. Tshifhe muhulu a vha sengisa
28 a ri: “Ro ni vhudza uri ni songo tsha funza nga ha heḽo dzina,+ naho zwo ralo, no ḓadza Yerusalema nga pfunzo yaṋu, no ḓiimisela u ri vhona mulandu kha lufu lwa hoyu munna.”+
29 Petro na vhaṅwe vhaapostola vha ri: “Ri tea u thetshelesa Mudzimu ane a vha muvhusi nṱhani ha vhathu.+
30 Mudzimu wa vhomakhulukuku washu o vusa Yesu, we na mu vhulaya nga u mu ombela kha danda.*+
31 Mudzimu o mu hulisa nga u mu vhea thungo ya tshanḓa tshawe tsha u ḽa+ uri a vhe Murangaphanḓa Muhulwane+ na Mutshidzi,+ uri Vhaisiraele vha rembuluwe vha hangwelwe zwivhi.+
32 Riṋe ri ṱhanzi dza eneo mafhungo+ khathihi na muya mukhethwa+ we Mudzimu a u ṋea vhane vha mu thetshelesa samusi e muvhusi.”
33 Musi vha tshi pfa zwenezwo, vha sinyuwa vha ṱoḓa u vha vhulaya.
34 Muṅwe munna wa Mufarisei ane a pfi Gamaliele,+ mufunzi wa Mulayo we a vha a tshi ṱhonifhiwa nga vhathu vhoṱhe, a takuwa henefho Sanihedrini, a amba uri vhaapostola vha bviselwe nnḓa lwa tshifhinganyana.
35 A ri: “Inwi vhanna vha Isiraele, ni ṱhogomele zwine na khou ṱoḓa u zwi ita havha vhanna.
36 Tshifhingani tsho fhiraho ho vhuya ha vha na muṅwe munna we a vha a tshi pfi Theuda, we a vha a tshi ḓiita muthu wa ndeme, we a tevhelwa nga vhanna vha ṱoḓaho u vha 400. Fhedzi onoyo munna a vhulawa, vhoṱhe vha mu tevhelaho vha balanganywa.
37 Nga murahu ha onoyo, ha vha na Yudasi wa Galilea misini ya u ṅwaliswa, we a kunga vhathu uri vha mu tevhele. Na onoyo munna a fa, vhoṱhe vha mu tevhelaho vha balanganywa.
38 Samusi zwo ralo, ndi a ni vhudza ndi ri, havha vhathu ni songo vha thithisa, fhedzi vha litsheni. Ngauri zwi ḓo fhela arali hu vhukwila kana mishumo ya vhathu;
39 fhedzi arali zwi tshi bva kha Mudzimu, a ni nga koni u zwi fhelisa.+ Ni ṱhogomele, ngauri ni nga ḓiwana ni tshi khou lwa na Mudzimu.”+
40 Vha thetshelesa nyeletshedzo yawe, vha vhidza vhaapostola, vha vha rwa,+ vha vha vhudza uri vha litshe u amba nga ha dzina ḽa Yesu, vha kona u vha litsha.
41 Vha ṱuwa henefho Sanihedrini vho takala,+ ngauri Mudzimu o tenda vha tshi nyadziwa nga nṱhani ha dzina ḽa Yesu.
42 Vha ḓi dzula vha tshi funza thembeleni na nnḓu nga nnḓu+ ḓuvha ḽiṅwe na ḽiṅwe vha sa litshi na u ḓivhadza mafhungo maḓifha nga ha Kristo Yesu.+
