Nzumbululo I Yaho Kha Yohane 18:1-24
18 Nga murahu ha zwenezwi, nda vhona muṅwe muruṅwa a re na maanḓa mahulu a tshi tsa a tshi bva ṱaḓulu, ḽifhasi ḽa vhonetshelwa nga vhugala hawe.
2 A vhidzelela a ri: “O wa! O wa Babele Ḽihulu,+ o no vha vhudzulo ha madimoni, ha mimuya yoṱhe i re na tshika, zwiṱaha zwa zwiṋoni zwoṱhe zwi re na tshika na zwi vhengwaho.+
3 O ita uri tshaka dzoṱhe dzi kambiwe nga waini yawe ine ya ita uri vhathu vha tame u ḓifara luvhi nga zwa vhudzekani,*+ mahosi oṱhe a ḽifhasi o ḓifara luvhi nga u ita nae zwa vhudzekani,+ na vharengisi vho pfuma nga nṱhani ha zwithu zwinzhi zwi ḓuraho zwi sa mu shonisi zwe a zwi wana.”
4 Nda pfa ḽiṅwe ipfi ḽi tshi bva ṱaḓulu ḽi tshi ri: “Ibvani khae vhathu vhanga,+ arali ni sa ṱoḓi u ita zwivhi nae, ni sa ṱoḓi u rwiwa nga ṱhamu dzawe.+
5 Zwivhi zwawe ndi zwinzhi, a zwi vhalei,+ Mudzimu u ḓo mu haṱulela zwivhi zwawe.*+
6 U mu lifhedze kha zwe a ita vhaṅwe,+ u mu lifhedze kavhili;+ u mu ṱanganyisele kavhili+ kha tshinwelo tshawe.+
7 U mu tambudze a lile ngauri u a ḓihudza, ha shoniswi nga zwithu zwinzhi zwi ḓuraho zwe a zwi wana. U dzula a tshi ri: ‘Ndo dzula sa khosi ya mufumakadzi, a thi tshilikadzi, a thi nga ḓo vhuya nda ṱungufhala.’+
8 Ndi ngazwo a tshi ḓo ḓelwa nga ṱhamu, lufu, u ṱungufhala na nḓala nga ḓuvha ḽithihi, u ḓo fhiswa tshoṱhe nga mulilo+ ngauri Yehova* Mudzimu we a mu haṱula u na maanḓa.+
9 “Mahosi a ḽifhasi e a ḓifara luvhi nga u ita nae zwa vhudzekani* na o ṱanganelaho nae kha zwithu zwinzhi zwi ḓuraho zwi sa mu shonisi zwe a zwi wana, a ḓo ṱungufhala, a mu lilela musi a tshi vhona vhutsi ha musi a tshi khou fhiswa.
10 A ḓo ima kule a tshi ofha u tambudzwa u fana nae, a ḓo ri, ‘Yawee, yawee, iwe Babele muḓi muhulu+ u re na maanḓa, khaṱhulo yau yo swika nga awara nthihi!’
11 “Zwiṅwe hafhu, vharengisi vho ṱungufhala, vha khou mu lilela ngauri a hu na ane a renga thundu dzavho
12 dza musuku, siḽiva, matombo a mutengo muhulu, vhulungu, malabi a ḽinene, malabi a phephulu, malabi a siliga, malabi matswuku-tswuku; na zwoṱhe zwo itwaho nga thanda i nukhelelaho, nga ṋanga dza nḓou, nga thanda dza mutengo muhulu, koporo, tsimbi, mavhuḽu;
13 na sinamoni, zwilungi* zwa India, zwioro, mapfura a nukhelelaho, zwioro zwitshena, waini, mapfura a muṱwari, fuḽauru, goroi, kholomo, nngu, bere, gariki, vhalanda na vhathu.
14 Wo dzhielwa zwithu zwavhuḓi* zwe wa vha u tshi zwi tama, a u tsha ḓo dovha wa wana zwiḽiwa na zwithu zwa maṱeleṱele ngauri zwo ngalangala.
15 “Vho rengisaho zwenezwo zwithu, vha pfuma nga nṱhani hawe, vha ḓo imela kule vha tshi ofha u tambudzwa nae, vha ḓo ṱungufhala na u lila,
16 vha ri, ‘Yawee, yawee, muḓi muhulu wo ambaraho malabi a ḽinene, a phephulu na matswuku-tswuku, wo khavhiswaho zwihulu nga musuku na matombo a mutengo muhulu na vhulungu,+
17 ngauri lwonolwo lupfumo luhulu lwo fhela nga awara nthihi!’
“Vhatshimbidzi vhoṱhe vha zwikepe na vhaṋameli vhoṱhe, vhashumi vha tshikepeni na vhoṱhe vha shumaho lwanzheni, vha imela kule
18 musi vha tshi vhona vhutsi ha musi a tshi khou swa, vha vhidzelela vha ri: ‘Ndi ufhio muṅwe muḓi muhulu u fanaho na uyu?’
19 Vha ḓishela mavu kha ṱhoho, vha vhidzelela vho ṱungufhala vha tshi khou lila, vha ri: ‘Yawee, yawee, muḓi muhulu we vhoṱhe vha re na zwikepe vha pfumiswa ngawo ngauri wo fheliswa nga awara nthihi!’+
20 “Iwe ḽiṱaḓulu,+ na inwi vhakhethwa+ na vhaapostola na vhaporofita, takalelani zwe zwa itea khae, ngauri Mudzimu o mu haṱula a tshi itela inwi!”+
21 Muṅwe muruṅwa a re na maanḓa a takula tombo ḽi ngaho guyo ḽihulu a ḽi posa lwanzheni, a ri: “Na Babele muḓi muhulu u ḓo poswa lwanzheni nga u ṱavhanya nga yeneyi nḓila, a u tsha ḓo dovha wa wanala.+
22 Kha iwe Babele a hu tsha ḓo pfala muthu a tshi khou imba, a tshi khou lidza haripa, u lidza muzika kana u lidza tshiṱiringo kana phalaphala. A hu tsha ḓo vha na muvhaḓi ane a ita mushumo naho u ufhio kana u kuya.
23 A hu tsha ḓo vha na tshedza tsha luvhone lune lwa ḓo dovha lwa vhonetshela, a hu tsha ḓo pfala ipfi ḽa mukwasha na ḽa muselwa. Ngauri vharengisi vhau vho vha vhe na vhuimo ha nṱha kha ḽifhasi ngauri wo xedza tshaka dzoṱhe nga vhungome hau.+
24 Khae ho wanala malofha a vhaporofita na a vhakhethwa na vhoṱhe+ vhe vha vhulawa kha ḽifhasi.”+
Ṱhaluso dzi re magumoni a siaṱari
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Kana “vhutshinyi hawe.”
^ Sedzani Mutevhe Wa Ṱhalutshedzo Ya Maipfi.
^ Kana “zwipaisisi.”
^ Thevhedz., “mitshelo yavhuḓi.”
