Kha Vhagalata 2:1-21
2 Ho no fhela miṅwaha ya 14, nda vhuyelela Yerusalema ndi na Baranaba+ na Tito.+
2 Ndo vhuyelela henefho ngauri ndo vha ndo dzumbululelwa nga Murena uri ndi ye. Nda ṱangana na vhanna vhane vha dzhielwa nṱha fhedzi, nda vha vhudza nga ha mafhungo maḓifha ane nda a ḓivhadza dzitshaka. Hu u itela u ḓivha arali mushumo we nda u ita na une nda kha ḓi u ita u si wa fhedzi.
3 Naho Tito+ we a vha e na nṋe e Mugerika, a hu na we a mu kombetshedza uri a fumbiswe.+
4 Zwenezwo zwo ita uri vhahashu vha mazwifhi vhe vha ḓa tshivhidzoni vha ambe zwithu zwivhi,+ vho dzhena tshivhidzoni uri vha ḓivhe nga ha mbofholowo+ ine ra vha nayo nga u vha vhafunziwa vha Kristo Yesu, uri vha ri kombetshedze u tevhedza mulayo,+
5 fhedzi a ro ngo vhuya ra vha thetshelesa,+ uri ni dzule ni na ngoho ye na i wana kha mafhungo maḓifha.
6 Vhenevho vhahashu vhane vha dzhielwa nṱha+ a vho ngo mpfunza zwithu zwiswa. Zwe vha vha vhe zwone kale a si zwa ndeme kha nṋe, ngauri Mudzimu ha ṱaluli.*
7 Zwo fhambanaho na zwenezwo, musi vha tshi ṱhogomela uri ndo kumedzwa u ḓivhadza mafhungo maḓifha kha vha songo fumbaho,+ u fana na Petro we a kumedzwa u ḓivhadza mafhungo maḓifha kha vho fumbaho,
8 ngauri we a ṋea Petro maanḓa a vhuapostola kha vho fumbaho, o ṋea na nṋe maanḓa a u vha muapostola kha dzitshaka;+
9 musi vha tshi ṱhogomela uri Mudzimu o ntsumbedza vhuthu vhuhulu,+ Yakobo,+ Kefa* na Yohane, vha ngaho phuphu, vho khaḓa nṋe na Baranaba,+ vha ri: “Iyani ni huwelele kha dzitshaka, riṋe ri ḓo huwelela kha vho fumbaho.”
10 Zwe vha humbela ndi uri ri dzule ri tshi humbula vha shayaho, zwenezwi ndi zwe nda dzula ndi tshi lwela u zwi ita.+
11 Naho zwo ralo, musi Kefa*+ a tshi ḓa Antiokia,+ ndo mu kaidza uri zwe a ita zwo khakhea.
12 Musi hu sa athu u ḓa vhaṅwe vhathu vha bvaho kha Yakobo,+ o vha a tshi anzela u ḽa na vha dzitshaka;+ fhedzi musi vha tshi swika, a litsha u ita nga u ralo, a ḓifhambanya navho, a tshi ofha vho fumbiswaho.+
13 Na Vhayuda vhoṱhe vho mu edzisa kha wonoyo muhoyo, lwe na Baranaba a vho edzisa wonoyo muhoyo.
14 Fhedzi musi ndi tshi vhona uri a vha khou tevhela ngoho ye na i wana kha mafhungo maḓifha,+ nda amba na Kefa* phanḓa ha vhoṱhe nda ri: “Arali u Muyuda, u tshi tshila u fana na vha dzitshaka, u sa tshili u fana na Vhayuda, u nga kombetshedza hani vhathu vha dzitshaka uri vha tevhele mikhuvha ya Vhayuda?”+
15 Riṋe ro bebwaho ri Vhayuda, a ri fani na vha dzitshaka vhane vha ita tshivhi.
16 Ri a zwi ḓivha uri muthu ha vhidzwi o lugaho nga nṱhani ha u tevhedza mulayo, fhedzi u vhidzwa o lugaho+ nga u tenda Kristo Yesu.+ Ndi ngazwo ri tshi tenda Kristo Yesu, uri ri vhidzwe vho lugaho nga u tenda Kristo, hu si nga u tevhedza mulayo, ngauri a hu na ane a ḓo pfi o luga nga u tevhedza mulayo.+
17 Arali na riṋe ra wanwa ri vhaitazwivhi ngeno ri tshi ṱoḓa u itwa vho lugaho nga nṱhani ha Kristo, naa zwenezwo zwi amba uri Kristo a nga ita uri ri ite tshivhi? Na khathihi!
18 Arali ndi tshi fhaṱulula zwe nda thutha, ndi vha ndi tshi khou pfuka mulayo.
19 Ngauri ndo fa siani ḽa mulayo ndi tshi itiswa nga wonoyo mulayo,+ uri ndi kone u tshilela Mudzimu.
20 Ndo ombelwa kha danda na Kristo.+ A thi tsha ḓitshilela,+ fhedzi ndi Kristo ane a khou tshila e na vhuthihi na nṋe. Zwino ndi tshila ndi tshi tenda Murwa wa Mudzimu,+ we a mpfuna na u ḓiṋekedzela a tshi itela nṋe.+
21 A thi hani vhuthu vhuhulu ha Mudzimu,+ arali muthu a tshi itwa o lugaho nga u tevhedza mulayo, zwi amba uri Kristo o fela mahala.+
Ṱhaluso dzi re magumoni a siaṱari
^ Thevhedz., “Mudzimu ha sedzi mbonalo ya muthu.”
^ U dovha a pfi Petro.
^ U dovha a pfi Petro.
^ U dovha a pfi Petro.
