Kha Vhagalata 5:1-26
5 Ro vhofhololwa nga Kristo uri ri vhe na mbofholowo. Nga zwenezwo, imani no khwaṱha,+ ni songo tsha hwala dzhogo ya vhupuli.+
2 Nṋe Paulo ndi khou ni vhudza uri arali na fumbiswa, Kristo a nga si ni vhuyedze nga tshithu.+
3 Zwiṅwe hafhu, ndi humbudza ane a khou fumbiswa uri u tea u tevhedza Mulayo woṱhe.+
4 No fhambanywa na Kristo, inwi vhane na lingedza u ḓiita vho lugaho nga u tevhedza mulayo;+ ni kule na vhuthu vhuhulu hawe.
5 Riṋe ro lindela na u fhulufhela u dzhiiwa sa vho lugaho nga nṱhani ha maanḓa a Mudzimu na nga lutendo.
6 Kha vha re na vhuthihi na Kristo Yesu, u fumba kana u sa fumba a si zwa ndeme,+ zwa ndeme ndi u vha na lutendo lune lwa sumbedzwa nga u vha na lufuno.
7 No vha ni tshi khou gidima zwavhuḓi.+ Ndi nnyi we a ni thivhela uri ni si tsha thetshelesa ngoho?
8 Yeneyi pfunzo a i bvi kha Ane a ni vhidza.
9 Mbiliso ṱhukhu i kukumusa fuḽauru yoṱhe.+
10 Ndi fhulufhela uri inwi vha re na vhuthihi na Murena+ ni ḓo tendelana na nṋe; fhedzi ane a ni dina,+ u ḓo haṱulwa nga nḓila yo teaho.
11 Vhahashu, arali ndi tshi kha ḓi huwelela nga ha u fumba, vho vha vha sa ḓo ntovhola. Musi ndi tshi funza nga ha danda*+ ho vha hu sa ḓo vha na ane a khukhulisea.
12 Ndi tama uri vhanna vhane vha khou lingedza u ni thithisa vha ḓifhahule.*
13 Vhahashu, no vhidzelwa u vha vho vhofholowaho; fhedzi ni songo shumisa yeneyo mbofholowo uri ni fushe nyemulo dza ṋama,+ tshaṋu nga hu vhe u shumelana nga lufuno.+
14 Ngauri Mulayo woṱhe wo katelwa kha maipfi ane a ri: “U tea u funa muhura wau vhunga u tshi ḓifuna.”+
15 Arali ni tshi dzula ni tshi lumana na u ḽana,+ ni ṱhogomele ni sa ḓo fhedzana.+
16 Fhedzi ndi ri, Dzulani ni tshi livhiswa nga muya mukhethwa+ uri ni si emule zwa ṋama.+
17 Ngauri ṋama i lwa na muya mukhethwa nga nṱhani ha nyemulo dzayo, na muya mukhethwa u lwa na ṋama; zwenezwi a zwi anḓani, uri ni si ite zwithu zwine na ṱoḓa u zwi ita.+
18 Arali ni tshi livhiswa nga muya mukhethwa, a ni ho nga fhasi ha mulayo.
19 Mishumo ya ṋama i khagala, ndi u ḓifara luvhi nga zwa vhudzekani,*+ vhuyaḓa, u ita tshivhi u sa shoni,*+
20 u rabela midzimu ya zwifanyiso, vhungome,*+ vhuswina, dzinndwa, vivho, u sinyuwa, u vhangisana, dziphambano, u vhumba zwigwada,
21 vhutshivha, vhudakwa,+ zwimima zwi sa langei, na zwithu zwi fanaho na zwenezwi.+ Ndi khou dzula ndo ni sevha nga ha zwenezwi zwithu, samusi ndo dzula ndo ni sevha nga hazwo, uri vhane vha ita zwenezwo zwithu a vha nga ḽi ifa ḽa Muvhuso wa Mudzimu.+
22 Fhedzi zwi aṋwiwaho nga muya mukhethwa ndi lufuno, dakalo, mulalo, u sa fhela mbilu, vhuthu, vhuḓi,+ lutendo,
23 u vuḓa na u ḓifara.+ Mulayo a u lwi na zwithu zwo raloho.
24 Zwiṅwe hafhu, vha re vha Kristo Yesu vha vhulaya* lutamo luhulu na nyemulo dza ṋama.+
25 Arali ri tshi tshila u tendelana na muya mukhethwa, kha ri dzule ri tshi tshila u tendelana nawo.+
26 Ri songo ḓikukumusa,+ u ṱaṱisana+ na u tshivhana.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “ḓithene; vha vhe khombe,” zwine zwa ḓo ita uri vha si tsha fanelea u tevhela mulayo une vha ṱoḓa vhaṅwe vha tshi u tevhela.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
^ Kana “vhuloi.”
^ Thevhedz., “vha ombela kha danda.”
