Kha Vhagalata 6:1-18
6 Vhahashu, arali muthu a ita vhukhakhi a songo zwi ṱhogomela, inwi vhane na livhiswa nga muya mukhethwa ni lingedze u mu khakhulula nga vhuthu.+ Fhedzi ni ṱhogomele+ uri na inwi ni si lingwe.+
2 Dzulani ni tshi ṱhaḓulana mihwalo,+ ni ḓo vha ni tshi khou tevhedza mulayo wa Kristo.+
3 Ngauri ane a humbula uri u wa ndeme ngeno e si tshithu,+ u khou ḓifhura.
4 Fhedzi muthu nga a ṱolisise mishumo yawe,+ ndi hone a tshi ḓo takalela zwe a shuma, a sa ḓivhambedzi na muṅwe muthu.+
5 Ngauri muṅwe na muṅwe u ḓo hwala vhuḓifhinduleli hawe.+
6 Zwiṅwe hafhu, ane a funzwa fhungo nga a kovhele zwithu zwoṱhe zwivhuya o mu funzaho.+
7 Ni songo fhurwa: Mudzimu ni nga si mu fhure. Ngauri muthu u ḓo kaṋa zwe a zwala;+
8 ane a zwala kha ṋama u ḓo kaṋa u sina kha ṋama, fhedzi ane a zwala kha muya mukhethwa u ḓo kaṋa vhutshilo vhu sa fheli kha muya mukhethwa.+
9 Ri songo litsha u ita zwo lugaho, ngauri nga tshifhinga tsho teaho ri ḓo kaṋa arali ri sa neti.+
10 Arali zwi tshi konadzea, kha ri thuse vhathu vhoṱhe, zwihuluhulu vhatendi nga riṋe.
11 Ndo ni ṅwalela zwenezwi nga tshanḓa tshanga, vhonani uri ndi maḽeḓere mahulu lungafhani!
12 Vhoṱhe vhane vha ni kombetshedza u fumba ndi vhane vha ṱoḓa u takalelwa nga vhathu, fhedzi vha ita zwenezwi uri vha si tovholelwe Kristo.*
13 Ngauri vhane vha fumbiswa a vha tevhedzi Mulayo,+ fhedzi vha ṱoḓa inwi ni tshi fumbiswa uri vha kone u zuwa nga zwo itwaho kha muvhili waṋu.
14 Fhedzi a thi ṱoḓi u zuwa, nga nnḓa ha u zuwa nga ha danda* ḽa Murena washu Yesu Kristo,+ we ngae nda vhona shango ḽo ombelwa, na shango ḽa vhona nṋe ndo ombelwa.
15 Ngauri u fumba kana u sa fumba+ a si zwa ndeme, zwa ndeme ndi tsiko ntswa.+
16 Ngavhe vhoṱhe vhane vha tshila u tendelana na zwenezwo, vha tshi khathutshelwa na u vha na mulalo, vhenevho ndi Isiraele wa Mudzimu.+
17 Hu songo tsha vha na ane a ndina, ngauri ndi na mavhadzi ane a sumbedza uri ndi mulanda wa Yesu.+
18 Vhahashu, ngavhe Murena washu Yesu Kristo a tshi ni sumbedza vhuthu vhuhulu samusi ni tshi khou ḓifara zwavhuḓi. Amen.
Ṱhaluso dzi re magumoni a siaṱari
^ Thevhedz., “danda ḽa Kristo.”
^ Sedzani Mutevhe Wa Ṱhalutshedzo Ya Maipfi.
