Kha Vhahevheru 13:1-25
13 Dzulani ni tshi funana sa vharathu na vhakomana.+
2 Ni si hangwe u ṱanganedza vhaeni,*+ ngauri vhaṅwe vho ṱanganedza vharuṅwa vha sa zwi ḓivhi.+
3 Ni dzule ni tshi humbula vha re dzhele,*+ zwi nge no valelwa navho.+ Ni dzule ni tshi humbula na vhane vha tambudzwa, zwi nge ni khou tambudzwa navho.
4 Mbingano kha i vhe i ṱhonifheaho kha vhoṱhe, i songo tshikafhadzwa,+ ngauri Mudzimu u ḓo haṱula phombwe na vhane vha ḓifara luvhi nga zwa vhudzekani.*+
5 Ni songo funa tshelede,+ fhedzi fusheani nga zwine na vha nazwo.+ Ngauri o ri: “Ndi nga si vhuye nda ni ṱutshela, ndi nga si vhuye nda ni laṱa.”+
6 Uri ri ambe ri na fhulufhelo ri ri: “Yehova* ndi muthusi wanga; a thi nga ofhi. Muthu a nga nnyita mini?”+
7 Ni humbule vhane vha ni ranga phanḓa,+ vhe vha ni vhudza ipfi ḽa Mudzimu, ni elekanye nga ha zwithu zwavhuḓi zwe vha zwi ita, ni edzise lutendo lwavho.+
8 Yesu Kristo ha shanduki, u kha ḓi vha onouḽa wa mulovha, ṋamusi na nga hu sa fheli.
9 Ni songo xedzwa nga pfunzo ni sa dzi ḓivhi na dzo fhambanaho, ngauri ndi khwine u vha na mbilu yo khwaṱhiswaho nga vhuthu vhuhulu nṱhani ha u khwaṱhiswa nga u tevhedza milayo ya zwiḽiwa i sa vha vhuyedzi nga tshithu.+
10 Ri na aḽeṱare. Fhedzi vhane vha ita mushumo mukhethwa denndeni, a vha fanelei* u ḽa zwi re khayo.+
11 Ngauri mitumbu ya zwipuka zwe zwa vha zwi tshi ṋekedzwa nga vhenevho vhathu, yo vha i tshi fhiswa nnḓa ha madennde, ngeno tshifhe muhulu a tshi isa malofha a zwenezwo zwipuka fhethu hukhethwa uri vha hangwelwe zwivhi.+
12 Ndi ngazwo na Yesu o tambudzwa nnḓa ha khoro ya muḓi+ uri vhathu vha itwe vhakhethwa nga malofha awe.+
13 Nga zwenezwo, kha ri ye khae nnḓa ha madennde, ri tshi konḓelela u nyadziwa samusi na ene o nyadziwa,+
14 ngauri a ri na muḓi une wa ḓo dzula u hone, fhedzi ri lindela une wa khou ḓa ri sa fheli mbilu.+
15 Kha ri dzule ri tshi renda Mudzimu nga Yesu.+ Zwenezwi zwi tou nga tshiṱhavhelo tshine ra tshi ṋekedza Mudzimu. Ri shumisa milomo+ yashu u ḓivhadza vhathu dzina ḽawe.+
16 Zwiṅwe hafhu, ni songo hangwa u ita zwivhuya na u kovhela vhaṅwe,+ ngauri Mudzimu u takadzwa nga zwenezwo zwiṱhavhelo.+
17 Ni thetshelese vhane vha ni ranga phanḓa,+ ni ḓiṱukufhadze khavho,+ ngauri vha khou ni linda, Mudzimu u ḓo vha haṱula.+ Arali na ita zwenezwo, vha ḓo ita mushumo wavho vho takala, vha songo ṱungufhala. Arali na sa thetshelesa zwi ḓo ni vhaisa.
18 Bvelani phanḓa ni tshi ri rabelela, ngauri ri fhulufhela uri ri na luvalo lwo kunaho,* samusi ri tshi tama u fhulufhedzea kha zwithu zwoṱhe.+
19 Fhedzi ndi a ni ṱuṱuwedza zwihulu uri ni rabele uri ndi ḓe kha inwi nga u ṱavhanya.
20 Mudzimu wa mulalo o vusa Murena Yesu vhafuni. Yesu a ṋekedza Mudzimu malofha a mulanga wa tshoṱhe. Ndi mulisa wa nngu muhulwane.+ Ngavhe Mudzimu wa mulalo
21 a tshi ni ṋea zwithu zwoṱhe zwavhuḓi uri ni kone u ita zwine a funa, a tshi shumisa Yesu Kristo uri ri ite zwine zwa mu takadza vhukuma. Mudzimu ndi ene o tewaho nga u rendwa lini na lini. Amen.
22 Vhahashu, zwino ndi a ni ṱuṱuwedza uri ni thetshelese ni sa fheli mbilu enea maipfi a u ni ṱuṱuwedza ngauri ndo ni ṅwalela vhurifhi vhupfufhi.
23 Ḓivhani uri wahashu Timotheo o vhofhololwa. Ndi ḓo ḓa nae u ni vhona, arali a ṱavhanya u swika.
24 Ni lumelise vhoṱhe vhane vha ni ranga phanḓa na vhakhethwa vhoṱhe. Vhahashu vha re fhano Italia+ vha a ni lumelisa.
25 Ngavhe noṱhe ni tshi vha na vhuthu vhuhulu ha Mudzimu.
Ṱhaluso dzi re magumoni a siaṱari
^ Kana “u sumbedza vhatsinda vhuthu.”
^ Thevhedz., “vho vhofhiwaho nga ngeḓane.”
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Kana “a vha na maanḓa a.”
^ Kana “lwavhuḓi.”
