Yesaya 40:1-31
40 “Khuthadzani vhathu vhanga, vha khuthadzeni,” u ralo Mudzimu waṋu.+
2 “Kwengweledzani* Yerusalema,Ni u ḓivhadze uri mushumo wawo wa khombe-khombe wo fhela,Uri mulandu wawo wo lifhiwa.+
Tshanḓa tsha Yehova tsho mu pfisa vhuṱungu ho eḓanaho zwivhi zwawe zwoṱhe.”+
3 Hu na muthu ane a khou vhidzelela e sogani, u ri:
“Khurani* nḓila ya Yehova!+
Kunakiselani Mudzimu washu nḓila khulwane+ yavhuḓi sogani.+
4 Magovha oṱhe nga a ḓadzwe,Thavha dzoṱhe na zwikwara zwoṱhe nga zwi itwe mudavhi.
Fhethu hu re na matombo nga hu khuriwe,Na fhethu hu re na magodi-godi hu vhe na nḓila yavhuḓi.+
5 Vhugala ha Yehova vhu ḓo dzumbululwa,+Vhathu vhoṱhe vha ḓo zwi vhona,+Ngauri ho amba Yehova.”
6 Thetshelesani! Muṅwe muthu u ri: “Vhidzelelani!”
Muṅwe a vhudzisa a ri: “Ndi vhidzelele ndi ri mini?”
“Vhathu vhoṱhe vha nga hatsi vhudala.
Lufuno lwavho lwoṱhe lu sa shanduki lu nga maluvha a tsimuni.+
7 Hatsi vhudala vhu a oma,Maluvha a a puta,+Ngauri a khou vhudzulwa nga mufemo* wa Yehova.+
Ngangoho vhathu ndi hatsi vhudala.
8 Hatsi vhudala vhu a oma,Maluvha a a puta,Fhedzi ipfi ḽa Mudzimu washu ḽi dzula ḽi hone* lini na lini.”+
9 Gonya thavha ndapfu,Iwe mufumakadzi ane a khou ḓisa mafhungo maḓifha Tsioni.+
Huwelela nga maanḓa,Iwe mufumakadzi ane a khou ḓisa mafhungo maḓifha Yerusalema.
Huwelela, u songo ofha.
Ḓivhadza miḓi ya Yuda u ri: “Mudzimu waṋu ngoyu.”+
10 Yehova Murena Muvhusahoṱhe u ḓo ḓa e na maanḓa,Tshanḓa tshawe tshi ḓo vhusa tshi tshi itela ene.+
Ndi ene ane a vha na malamba awe,Na malamba ane a a ṋea a phanḓa hawe.+
11 U ḓo ṱhogomela* sambi ḽawe sa mulisa.+
U ḓo kuvhanganya ngwana nga tshanḓa tshawe,U ḓo dzi takula a dzi vhea kha khana yawe.
U ḓo dededza dzine dza kha ḓi mamisa.+
12 Ndi nnyi we a kala maḓi oṱhe a lwanzhe a re tshanḓani tshawe+Na u kala ḽiṱaḓulu nga vhuphara ha tshanḓa tshawe?*
Ndi nnyi we a kuvhanganya buse ḽa ḽifhasi+Kana u kala tshileme tsha dzithavhaNa tsha zwikwara?
13 Ndi nnyi we a kala* muya wa Yehova,Ndi nnyi ane a nga mu eletshedza?+
14 O ambedzana na nnyi uri a wane ṱhalukanyo,O funzwa nga nnyi khaṱhulo yo teaho,O funzwa nga nnyi nḓivho,Kana u sumbedzwa nḓila ya ṱhalukanyo ya vhukuma?+
15 Tshaka dzi fana na shotha ḽi bvaho kha mvuvhelo,Dzi dzhiiwa sa buse ḽi kha tshikalo.+
U takulela nṱha zwiṱangadzime sa buse.
16 Na ḓaka ḽa Libanoni a ḽi eḓani uri mulilo u dzule u tshi khou duga,*Na phukha dzaḽo a dzi eḓani tshifhiwa tsha u fhiswa.
17 Tshaka dzoṱhe u dzi dzhia dzi si tshithu phanḓa hawe;+U dzi dzhia dzi si tshithu, u dzi dzhia dzi si tshithu tsha vhukuma.+
18 Ndi nnyi ane na nga mu vhambedza na Mudzimu?+
Ni nga mu fanyisa na mini?+
19 Mutsila u ita mudzimu wa tshifanyiso,Ane a ita zwithu nga tsimbi* a tshi ḓodza musuku,+A tshi khavhisa nga ngeḓane dza siḽiva.
20 U nanga muri uri u vhe muṋeelo,+Muri une wa sa ḓo sina.
A ṱoḓa mutsila a re na vhukoniUri a vhaḓe tshifanyiso tshi sa wi.+
21 Naa a ni zwi ḓivhi?
Naa a ni athu u zwi pfa?
Naa a no ngo vhudzwa u bva mathomoni?
Naa a ni athu u pfesesa u bva tshee ḽifhasi ḽa thewa?+
22 Hu na Ane a dzula nṱha ha ḽifhasi ḽo itaho gumba,*+Vha dzulaho khaḽo vha nga nzie.
U ṱharamudza ḽiṱaḓulu u fana na labi ḽavhuḓi,A ḽi atha u fana na dennde ḽa u dzula khaḽo.+
23 U tsitsa vhaḓinḓa vhahulwane vha sala vhe si tshithuA ita uri vhahaṱuli* vha ḽifhasi vha sale vhe si tshithu tsha vhukuma.
24 Vha tshi kha ḓi bva u ṱavhiwa,Vha tshi kha ḓi bva u zwaliwa,Vha sa athu u ṱoka midzi kha ḽifhasi,Vha a vhudzulwa, vha puta,Muya wa vha hwala sa maṱanga.+
25 “Ni nga nnyeḓanyisa na nnyi?” u ralo Mukhethwa.
26 “Lavhelesa ṱaḓulu u vhone.
Ndi nnyi o sikaho zwenezwi zwithu?+
Ndi Ane a zwi bvisa zwi zwinzhi vhunga mmbi;U zwi vhidza zwoṱhe nga madzina.+
Nga nṱhani ha maanḓa awe mahulu na maanḓa awe a mangadzaho,+A hu na na tshithihi tshazwo tsho ṱahelaho.
27 Iwe Yakobo, Iwe Isiraele, ndi ngani u tshi ri,‘Yehova ha vhoni nḓila yanga,Mudzimu ha na ndavha nazwo musi ndi tshi haṱulwa nga nḓila i songo teaho’?+
28 Naa a ni zwi ḓivhi? Naa a ni athu u zwi pfa?
Yehova, Musiki wa magumo a ḽifhasi, ndi Mudzimu wa lini na lini.+
Ha neti kana u kulea nungo.+
Ṱhalukanyo yawe a i pfesesei.+
29 O netaho u mu ṋea maanḓaA si na nungo u mu ṋea maanḓa manzhi.+
30 Vhatukana vha ḓo neta na u kulea nungo,Vhaṱhannga vha ḓo khukhulwa vha wa,
31 Fhedzi vhane vha fhulufhela Yehova vha ḓo dovha vha wana maanḓa.
Vha ḓo takuwa nga phapha sa goni.+
Vha ḓo gidima vha sa kulei nungo;Vha ḓo tshimbila vha sa neti.”+
Ṱhaluso dzi re magumoni a siaṱari
^ Kana “Ṱuṱuwedzani.”
^ Kana “Lugisani.”
^ Kana “muya.”
^ Kana “Fhedzi zwine Mudzimu washu a zwi amba zwi dzula zwi hone.”
^ Kana “lisa.”
^ Ndi tshikhala tsha u bva kha gunwe u ya kha munwe muṱuku musi tshanḓa tsho putululwa. Sedzani Ṱhume. B14.
^ Kana khamusi, “pfesesa.”
^ Kana “ḽi nga si kone u vha na khuni dzo eḓanaho.”
^ Kana “Mufuli wa tsimbi.”
^ Kana “bulumbu; bola; khungulu; mutengelele; tshitendeledzi.”
^ Kana “vhavhusi.”
