Evangeli Ya Yohane 17:1-26
17 Musi Yesu o no amba zwenezwo, a lavhelesa ṱaḓulu a ri: “Khotsi, tshifhinga tsho swika. Hulisa murwa wau uri na murwa wau a u hulise,+
2 samusi wo mu ṋea maanḓa a u langa vhathu vhoṱhe,+ uri a ṋee vhathu vhoṱhe vhe wa mu ṋea vhone vhutshilo vhu sa fheli.+
3 Vha ḓo wana vhutshilo vhu sa fheli,+ arali vha ḓivha* iwe Mudzimu wa ngoho u woṱhe+ na u ḓivha Yesu Kristo we wa mu ruma.+
4 Ndo u hulisa fhano shangoni+ nga u fhedza mushumo we wa nṋea wone uri ndi u ite.+
5 Khotsi, nkhulise u fana na zwiḽa ndi tsini hau musi shango ḽi sa athu u vha hone.+
6 “Ndo ḓivhadza dzina ḽau kha vhathu vhe wa nṋea vhone vha tshi bva shangoni.+ Vho vha vhe vhau, zwino wo nṋea vhone, vho tevhedza* zwe wa zwi amba.
7 Zwino vha vho ḓivha uri zwithu zwoṱhe zwe wa nṋea zwi bva ha iwe;
8 ngauri ndo vha vhudza zwe wa mmbudza,+ vho zwi ṱanganedza, vha a zwi ḓivha uri ndo ḓa sa muimeleli wau.+ Vho tenda uri ndi iwe wo nthumaho.+
9 Ndi a vha humbelela; a thi humbeleli shango, fhedzi ndi humbelela vhe wa nṋea vhone, ngauri ndi vhau;
10 zwithu zwanga zwoṱhe ndi zwau, zwau ndi zwanga,+ ndo huliswa vhukati havho.
11 “Ndi khou ṱuwa shangoni, fhedzi vhone vha shangoni,+ hone nṋe ndi khou ḓa kha iwe. Khotsi Mukhethwa, vha tsireledze+ u tshi itela dzina ḽau ḽe wa nṋea ḽone, uri vha vhe vhathihi* samusi na riṋe ri vhathihi.*+
12 Musi ndi navho ndo vha ndi tshi vha tsireledza+ ndi tshi itela dzina ḽau ḽe wa nṋea ḽone; ndo vha tsireledza, a hu na na muthihi o fheliswaho+ nga nnḓa ha murwa we ha pfi u ḓo fheliswa,+ uri hu itee zwo ṅwaliwaho kha luṅwalo.+
13 Fhedzi zwino ndi khou ḓa kha iwe, ndi khou amba zwenezwi zwithu fhano shangoni uri vha kone u takala samusi na nṋe ndo takala.+
14 Ndo vha vhudza zwe wa mmbudza, fhedzi shango ḽo vha vhenga, ngauri a vha tshipiḓa tsha shango,+ vhunga na nṋe ndi si tshipiḓa tsha shango.
15 “A thi humbeli uri u vha bvise shangoni, fhedzi ndi humbela uri u vha tsireledze kha muvhi.+
16 A vha tshipiḓa tsha shango+ vhunga na nṋe ndi si tshipiḓa tsha shango.+
17 Vha ite vhakhethwa* nga mafhungo ngoho au;+ mafhungo au ndi a ngoho.+
18 Samusi wo nthuma shangoni, na nṋe ndi khou vha ruma shangoni.+
19 Ndi dzula ndi mukhethwa ndi tshi itela vhone, uri na vhone vha itwe vhakhethwa nga ngoho.
20 “A thi humbeleli vhenevha fhedzi, ndi humbelela na vhane vha tenda nge vha pfa nga vhenevha,
21 uri na vhone vha vhe vhathihi,+ samusi iwe Khotsi u na vhuthihi na nṋe, na nṋe ndi na vhuthihi na iwe,+ uri vha vhe na vhuthihi na riṋe, uri shango ḽi tende zwa uri wo nthuma.
22 Ndo vha hulisa samusi na nṋe wo nkhulisa, uri na vhone vha vhe na vhuthihi samusi na riṋe ri na vhuthihi.+
23 Nṋe ndi na vhuthihi navho na iwe u na vhuthihi na nṋe, uri na vhone vha vhe vhathihi, uri shango ḽi ḓivhe uri wo nthuma na uri u a vha funa samusi wo mpfuna.
24 Khotsi, ndi ṱoḓa uri vhathu vhe wa nṋea vhone na vhone vha vhe na nṋe hune nda vha hone,+ uri vha vhone nḓila ye wa nkhulisa ngayo, ngauri wo mpfuna shango ḽi sa athu u vha hone.+
25 Iwe Khotsi o lugaho, shango a ḽi u ḓivhi,+ fhedzi nṋe ndi a u ḓivha,+ na vhenevha vha a zwi ḓivha uri ndo rumiwa nga iwe.
26 Ndo vha ḓivhadza dzina ḽau, ndi ḓo dzula ndi tshi ḽi ḓivhadza,+ uri vha fune vhaṅwe vhathu nga nḓila ye wa mpfuna ngayo na uri ndi vhe na vhuthihi navho.”+
Ṱhaluso dzi re magumoni a siaṱari
^ Kana “arali vha bvela phanḓa vha tshi ḓivha.” Ḽiiti “ḓivha” nga Tshigerika ḽi sumbedza uri ndi nyito i bvelaho phanḓa.
^ Kana “thetshelesa.”
^ Kana “uri vha vhe na vhuthihi.”
^ Kana “riṋe ri na vhuthihi.”
^ Kana “Ita uri vha fhambane na vhaṅwe.”
