NGUDO 36
Fhulufhedzeani Kha Zwithu Zwoṱhe
Muṅwe na muṅwe u ṱoḓa u vha na khonani dzi fhulufhedzeaho. Na Yehova u lavhelela uri khonani dzawe dzi fhulufhedzee. Fhedzi zwenezwi a zwo ngo leluwa ngauri ri tshila shangoni ḽine vhathu vhanzhi a vha fhulufhedzei. Ri ḓo vhuyelwa nga mini arali ra fhulufhedzea kha zwithu zwoṱhe?
1. Ndi tshifhio tshiitisi tsha ndeme tsha uri ri fhulufhedzee?
Musi ri tshi fhulufhedzea kha vhaṅwe, ri sumbedza Yehova uri ri a mu funa na u mu ṱhonifha. Humbulani hezwi: Yehova u ḓivha zwoṱhe zwine ra zwi humbula na zwine ra zwi ita. (Vhahevheru 4:13) U a zwi vhona musi ri tshi khetha u fhulufhedzea nahone zwi a mu takadza. Ipfini ḽawe ri vhala uri: “Yehova u vhenga wa vhufhura, fhedzi U vha khonani ya tsini-tsini na o lugaho.”—Mirero 3:32.
2. Ri nga fhulufhedzea hani tshifhinga tshoṱhe?
Yehova u ri: “Ni songo zwifhelana.” (Sakaria 8:16, 17) Zwi amba mini zwenezwi? A ro ngo tea u zwifha musi ri tshi amba na vha muṱani washu, vhane ra shuma navho, vhahashu tshivhidzoni kana vhashumeli vha muvhuso. Vhathu vhane vha fhulufhedzea a vha tswi kana u fhura vhaṅwe. (Vhalani Mirero 24:28 na Vhaefesa 4:28.) Vha badela mithelo tshifhinga tshoṱhe. (Vharoma 13:5-7) Kha zwenezwi zwithu na zwiṅwe, ri “fhulufhedzea kha zwithu zwoṱhe.”—Vhahevheru 13:18.
3. Ri vhuyelwa nga mini musi ri tshi fhulufhedzea?
Vhaṅwe vha ḓo ri fhulufhela arali ri tshi ḓivhelwa u fhulufhedzea. U fana na muṱani u re na lufuno, ri ita uri muṅwe na muṅwe tshivhidzoni a pfe o tsireledzea. Ri vha na luvalo lwo kunaho. Musi ri tshi fhulufhedzea, ri “rendis[a] nga nḓila dzoṱhe pfunzo ya Mudzimu, Mutshidzi washu.” Zwenezwi zwi dovha zwa ita uri vhaṅwe vha ṱoḓe u shumela Yehova.—Tito 2:10.
GUDANI ZWO ENGEDZEAHO
Vhonani uri u fhulufhedzea zwi kwama hani Yehova na inwi, ni gude uri ni nga fhulufhedzea hani kha vhuimo ho fhambanaho vhutshiloni.
4. U fhulufhedzea zwi takadza Yehova
Vhalani Phisalema 44:21 na Maḽeaxi 3:16, ni kone u fhindula mbudziso dzi tevhelaho:
-
Ni vhona u nga ndi ngani ri songo tea u humbula uri ri nga dzumbela Yehova zwiṅwe zwithu?
-
Ni vhona u nga Yehova u ḓipfa hani musi ri tshi khetha u amba ngoho naho zwi tshi konḓa u ita nga u ralo?
Musi vhana vha tshi amba ngoho, vha ita uri vhabebi vhavho vha takale. Musi ri tshi amba ngoho, ri ita uri Yehova a takale
5. Dzulani ni tshi fhulufhedzea tshifhinga tshoṱhe
Vhaṅwe vhathu vha vhona u nga a zwi konadzei uri muthu a dzule a tshi fhulufhedzea. Fhedzi vhonani uri ndi ngani ri tshi tea u fhulufhedzea tshifhinga tshoṱhe. Ṱalelani VIDIO.
Vhalani Vhahevheru 13:18, ni haseledze nga ha uri ri nga fhulufhedzea hani . . .
-
muṱani.
-
mushumoni kana tshikoloni.
-
kana kha vhuṅwe vhuimo.
6. U fhulufhedzea zwi a ri vhuyedza
Nga zwiṅwe zwifhinga, zwi nga vhonala u nga u fhulufhedzea zwi vhanga thaidzo. Fhedzi nga u ya ha tshifhinga, ri ḓo zwi ṱhogomela uri u fhulufhedzea ndi zwithu zwavhuḓisa. Vhalani Phisalema 34:12-16, ni kone u fhindula mbudziso i tevhelaho:
-
U fhulufhedzea zwi nga ita hani uri ni vhe na vhutshilo ha khwine?
-
Munna na mufumakadzi vhane vha fhulufhedzea vha khwaṱhisa mbingano yavho
-
Vhashumi vhane vha fhulufhedzea vha a fhulufhelwa nga vhatholi vhavho
-
Vhadzulapo vhane vha fhulufhedzea vha ḓiitela dzina ḽavhuḓi kha vhashumeli vha muvhuso
VHAṄWE VHATHU VHA AMBA URI: “A zwi na ndavha arali u tshi zwifhanyana.”
-
Ndi ngani ni tshi tenda uri Yehova u vhenga mazwifhi oṱhe?
NO GUDA MINI?
Yehova u ṱoḓa khonani dzawe dzi tshi fhulufhedzea kha zwoṱhe zwine vha zwi amba na u zwi ita.
Ni Kha Ḓi Zwi Humbula?
-
Ni nga fhulufhedzea kha zwithu zwifhio?
-
Ni vhona u nga ndi ngani ri songo tea u humbula uri ri nga dzumbela Yehova zwiṅwe zwithu?
-
Ndi ngani ni tshi ṱoḓa u fhulufhedzea tshifhinga tshoṱhe?
WANANI ZWO ENGEDZEAHO
Vhabebi vha nga gudisa hani vhana vhavho uri vha fhulufhedzee?
Ndi ngani zwi tshi vhuyedza u ita zwe ra fhulufhedzisa?
Vhonani arali ri tshi tea u badela mithelo naho i tshi shumiswa nga nḓila i si yavhuḓi.
“Ndi Ngani Ni Tshi Fanela U Lifha Mithelo?” (Tshiingamo, 1 October 2011)
Ndi mini zwe zwa ṱuṱuwedza muṅwe munna we a vha a sa fhulufhedzei uri a shandule vhutshilo hawe?
“Ndo Guda Uri Yehova U Na Khathutshelo Nahone U A Hangwela” (Tshiingamo, 1 July 2015)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
