TSHIFHINGANI tsha mahosi a Isiraele na Yuda, ho vha hu na tshigwada tsha vhanna vho khetheaho—vhane vha vha vhaporofita. Vhenevho vho vha vhe vhanna vha re na lutendo luhulwane na tshivhindi vhe vha ḓivhadza khaṱulo dza Mudzimu. Ṱhogomelani mbuno nṋa dza ndeme dze vhaporofita vha Mudzimu vha dzi ḓivhadza.

1. U fheliswa ha Yerusalema. Hu tshee nga phanḓa, vhaporofita vha Mudzimu—Yesaya na Yeremia—vho mbo ḓi thoma u sevha uri Yerusalema u ḓo fheliswa nahone wa dzula u shubi. Nga hu pfalaho, vho sumbedza zwo itaho uri Mudzimu a vha sinyutshele. U amba havho uri vho vha vhe vhathu vha Mudzimu zwo vhonala zwi si zwone nga ṅwambo wa uri vho vha vha tshi ṱanganela kha vhurabeli ha mazwifhi, vhuvhi, na vhuvemu.—2 Dzikhosi 21:10-15; Yesaya 3:1-8, 16-26; Yeremia 2:1–3:13.

2. U vusuluswa ha vhurabeli ho kunaho. Nga murahu ha miṅwaha ya 70 vhe vhuthubwani vhathu vha Mudzimu vho vhofhololwa Babele. Vho vha vha tshi fanela u humela shangohaya ḽavho ḽi re shubi na u fhaṱulula thembele ya Yehova ngei Yerusalema. (Yeremia 46:27; Amosi 9:13-15) Miṅwaha ya 200 hu tshee nga phanḓa, Yesaya o dzula o amba nga ha we a vha a tshi ḓo kunda—Korese—ane a ḓo kunda Babele na u tendela vhathu vha Mudzimu vha tshi vusulusa vhurabeli ho kunaho. Yesaya o ṱalusa nḓila i songo ḓoweleaho ye Korese a vha a tshi ḓo kunda ngayo wonoyo muḓi.—Yesaya 44:24–45:3.

3. U swika ha Messia na zwe a zwi tshenzhela. Messia o vha a tshi ḓo bebelwa muḓini wa Betlehema. (Mixa 5:2) O vha a tshi ḓo ḓiṱukufhadza, a ya Yerusalema o ṋamela mbongola. (Sakaria 9:9) Naho o vha e na vhulenda, o vha a sa ḓo vha na bvumo, nahone vhathu vhanzhi vho vha vha tshi ḓo mu landula. (Yesaya 42:1-3; 53:1, 3) O vha a tshi ḓo fa nga nḓila ya tshiṱuhu. Naa zwenezwi zwo vha zwi tshi ḓo vha magumo a vhutshilo ha Messia? Hai, tshiṱhavhelo tshawe tsho vha tshi tshi ḓo ita uri vhathu vhanzhi vha hangwelwe zwivhi. (Yesaya 53:4, 5, 9-12) Ndi u vuswa hawe vhafuni he ha vha hu tshi ḓo khunyeledza zwenezwo.

4. U vhusa ha Messia kha ḽifhasi. Vhathu vha songo fhelelaho a vha koni u ḓivhusa nga mulalo, fhedzi Khosi ya Vhumessia u ḓo vhidzwa Ṋe-mulalo. (Yesaya 9:5-6; Yeremia 10:22, 23) Musi a tshi vhusa, vhathu vhoṱhe vha ḓo vha na mulalo nga tshavho u katela na zwipuka. (Yesaya 11:3-7) A hu tsha ḓo vha na vhulwadze. (Yesaya 33:24) A hu tsha ḓo vha na lufu. (Yesaya 25:8) Musi hu tshi vhusa Messia, vhathu vho faho vha ḓo vuselwa u tshila kha ḽifhasi.—Daniele 12:13.

—Enea mafhungo a wanala kha bugu dza Yesaya, Yeremia, Daniele, Amosi, Mixa, na Sakaria.