NAA Yehova o vha a tshi ḓo thusa vhathu u ri vha ṱalule Messia o fulufhedziswaho? Ee. Ṱhogomelani zwe Mudzimu a zwi ita. Nga murahu ha maḓana maṋa a miṅwaha musi Maṅwalo a Luheberu o no fhela, muḓini wa Nazareta, devhula ha vunḓu ḽa Galilea, musidzana ane a pfi Maria o dalelwa nga nḓila i mangadzaho. Muruṅwa ane a pfi Gabriele o ḓa khae nahone a mu vhudza uri Mudzimu o vha a tshi ḓo shumisa maanḓa awe a shumaho, muya wawe mukhethwa, u mu ita uri a bebe murwa, naho o vha a sa ḓivhi munna. Onoyo murwa o vha a tshi ḓo vha Khosi yo dzulaho yo fulufhedziswa ine ya ḓo vhusa nga hu sa fheli! O vha a tshi ḓo vha Murwa wa Mudzimu, ane vhutshilo hawe ha ṱaḓulu ha ḓo fhiriselwa mbumbeloni ya Maria.

Nga u ḓiṱukufhadza Maria o mbo ḓi ṱanganedza yeneyo khumbelo. Yosefa muvhaḓi we a vha o mu fulufhedzisa u mu vhinga, o mbo ḓi mu vhinga nga murahu ha uri Mudzimu a rume muruṅwa u itela u mu khwaṱhisedza zwe zwa ita uri Maria a vhifhe muvhilini. Naho zwo ralo, hu pfi mini nga vhuporofita he ha dzula ho amba uri Messia o vha a tshi ḓo bebwa Betlehema? (Mixa 5:2) Wonoyo muḓi wo vha u kule na Nazareta nga khilomithara dza 140!

Muvhusi wa Roma o laedza uri hu vhaliwe vhathu. Vhathu vho vha vha tshi tea u ṅwaliswa he vha bebelwa hone. Yosefa na Maria vho bebelwa Betlehema, nga zwenezwo Yosefa na Maria vho vha vha tshi fanela u fara lwendo lwa u ya Betlehema. (Luka 2:3) Maria o bebela tshitaleni, a vhea ṅwana mukungwani. Mudzimu o rumela vharuṅwa vhanzhi uri vha vhudze tshigwada tsha vhalisa vha re thavhani uri ṅwana o bebwaho ndi Messia o fulufhedziswaho kana Kristo.

Nga murahu, na vhaṅwe vhathu vho vha vha tshi fanela u ṋea vhuṱanzi ha uri Yesu ndi Messia o fulufhedziswaho. Muporofita Yesaya o dzula o amba uri hu ḓo vha na munna ane a ḓo lugiselela Messia mushumo wa ndeme. (Yesaya 40:3) Onoyo murangaphanḓa ho vha hu Yohane Mulovhedzi. Musi a tshi vhona Yesu o ri: “Vhonani Ngwana ya Mudzimu yo hwalaho zwivhi zwa shango.” Vhaṅwe vhafunziwa vha Yohane vho mbo ḓi tevhela Yesu. Muṅwe wavho o ri: “Ro wana Messia.”—Yohane 1:29, 36, 41.

Ho vha hu na vhuṅwe vhuṱanzi ho engedzeaho. Musi Yohane a tshi lovhedza Yesu, Yehova nga dzawe o amba e ṱaḓulu. A tshi shumisa muya mukhethwa, o khetha Yesu uri a vhe Messia nahone a ri: “Ndi ene Murwa-mufunwa wanga uyu, ané nda mu takalela.” (Mateo 3:16, 17) Messia o fulufhedziswaho o swika!

Zwenezwi zwo itea lini? Nga ṅwaha wa 29 C.E., musi hu tshi tou fhela miṅwaha ya 483 ye ya dzula yo ambiwa nga Daniele. Vhukuma, zwenezwi ndi vhuṱanzi vhu sa hanedzei ha uri Yesu ndi Messia, kana Kristo. Naho zwo ralo, ndi mulaedza ufhio une a ḓo u ḓivhadza musi e kha ḽifhasi?

—Enea mafhungo a wanala kha bugu ya Mateo dzindima 1 u ya kha 3; Marko ndima ya 1; Luka ndima ya 2; Yohane ndima ya 1.