Bivhili a si bugu ya vhulivhisi ha zwa ngalafho. Fhedzi i na nyeletshedzo ine ya nga thusa muthu ane a khou sedzana na thaidzo ya vhulwadze ha muhumbulo. Ṱhogomelani tsumbo dzi tevhelaho.

“Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho.”​—MATEO 9:12.

Bivhili i a tendelana na uri ri nga ṱoḓa thuso ya zwa ngalafho. Vhathu vhanzhi vhane vha vha na vhulwadze ha thaidzo ya muhumbulo vho wana thuso nga u guda mafhungo o teaho nga ha vhulwadze vhune vha vha naho na nga u ya kha madokotela.

‘Nyonyoloso i a vhuyedza.’​—1 TIMOTHEO 4:8.

U fhedza tshifhinga ni tshi khou ita zwithu zwine zwa ita uri ni vhe na mutakalo wavhuḓi zwi nga ni thusa uri ni vhe na muhumbulo wo takalaho. Zwenezwi zwi katela u dzula ni tshi ita nyonyoloso, u ḽa zwiḽiwa zwi re na mutakalo na u eḓela lwo linganaho.

“Mbilu yo takalaho ndi mushonga wavhuḓi, fhedzi musi yo ṱungufhala zwi fhedza nungo.”​—MIRERO 17:22.

U vhala mafhungo a ṱuṱuwedzaho a bvaho Bivhilini na u ḓivhetshela zwipikwa zwine na nga kona u zwi swikelela zwi nga ita uri ni takale. Arali na livhisa  ṱhogomelo kha zwithu zwavhuḓi zwine zwa khou itea vhutshiloni haṋu na kha uri zwithu zwi ḓo vha khwiṋe tshifhingani tshi ḓaho, zwi nga ni thusa uri ni kone u sedzana na thaidzo ya vhulwadze ha muhumbulo.

“Vhuṱali vhu na vha ḓiṱukufhadzaho.”​—MIRERO 11:2.

Khamusi ni nga vha ni sa koni u ita zwithu zwoṱhe zwine na tama u zwi ita nga inwi muṋe, nga zwenezwo, ni tea u tenda u thuswa nga vhaṅwe. Khonani dzaṋu na vha muṱani waṋu vha nga vha vha tshi khou ṱoḓa u ni thusa, fhedzi vha nga vha vha sa ḓivhi uri vha ite mini. Vha vhudzeni uri ndi zwifhio zwine na nga takalela uri vha ni thuse ngazwo. Ni songo lavhelela uri vha ni thuse nga zwithu zwine vha nga si kone u zwi ita nahone ni dzule ni tshi livhuwa thuso ine vha ni ṋea.

Nicole a a re na vhulwadze ha bipolar disorder o ri: “Ndo pfa ndi sa khou ḓipfa zwavhuḓi, nga zwenezwo, nda amba na dokotela. O kona u wanulusa uri ndi khou lwala mini. Zwenezwi zwo nthusa uri ndi kone u ḓivha vhulwadze hanga na uri ndi kone u ḓivha uri hu na ndila dzifhio dza u vhu lafha na nḓila ine nda nga ḓiṱhogomela ngayo.”

Peter ane a vha na vhulwadze ha mutsiko wa muhumbulo (depression) o ri: “U vhala Bivhili ḓuvha ḽiṅwe na ḽiṅwe ndi na mufumakadzi wanga zwi nthusa uri ndi thome ḓuvha ḽiṅwe na ḽiṅwe ndo takala ndi tshi khou humbula zwithu zwavhuḓi. Kanzhi musi ndi sa khou ḓipfa zwavhuḓi, hu vha na ndimana ine ya nkhuthadza.”

Ji-yoo ane a vha na thaidzo ya u sa kona u langa nḓila ine a ḽa ngayo o ri: “Zwo nkonḓela u vhudza vhaṅwe nga ha vhulwadze hanga ngauri ndo pfa ndi tshi shona. Khonani yanga o nthetshelesa nga vhuthu, a lingedza u pfesesa nḓila ine nda khou ḓipfa ngayo. O nthusa uri ndi ḓipfe ndi khwiṋe na uri ndi ḓivhe uri a thi ndoṱhe.”

Timothy ane a vha na vhulwadze ha obsessive-compulsive disorder o ri: “Bivhili yo nthusa uri ndi kone u linganyisela zwavhuḓi musi zwi tshi ḓa kha mushumo na tshifhinga tsha u awela. Vhuṱali hayo ho nthusa uri ndi kone u sedzana na thaidzo musi zwi tshi ḓa kha nḓila ine nda ḓipfa ngayo.”