ṄWAHA muṅwe na muṅwe, vhathu vha fhiraho milioni dza rathi vha fara lwendo vha tshi ya maḓakani a kule a ngei Shima kha ḽa Dzhapani. Vha ya Zwifhoni * Zwihulwane zwa Ise, hune ha rabelwa mudzimukadzi wa ḓuvha Shinto ane a pfi Amaterasu Omikami nahone o no gwadamelwa lwa miṅwaha i ṱoḓaho u vha 2 000. Vhagwadameli vha thoma nga u ḓikunakisa nga u ṱamba zwanḓa na mulomo. Nga zwenezwo, musi vhe zwifhoni hune ha vha haiden vha a gwadama, u vhanda zwanḓa na u rabela mudzimukadzi. * Shinto u tendela vha gwadameli vhawe vha tshi tevhela vhuṅwe vhurereli nahone vhaṅwe Vhabudda, vhane vha amba uri vha Vhakriste na vhaṅwe, vha vhona zwi songo khakhea u rabela Shinto kha tshenetshi tshifho.

Vhurereli vhunzhi ha shango vhu na zwifho * nahone vhathu vhanzhi vha ya henefho. Kha mashango ane vhathu vha ḓivhidza Vhakriste, hu na kereke na zwifho zwinzhi hune ha rabelwa hone Yesu, Maria na vhakhethwa. Vhaṅwe vha fanaho na vhenevho vha ita zwifho fhethu he ha vha na zwiitea zwa Bivhili kana he ha itea “vhuṱolo” zwenezwino kana he ha vhewa zwithu zwa kale zwa vhurereli. Vhathu vhanzhi vha ya zwifhoni ngauri vha tenda uri thabelo dzavho dzi ḓo pfiwa arali vha rabela vhe fhethu hukhethwa. Kha vhaṅwe u swika zwifhoni ndi u swikelela tshithu tsha ndeme vhukuma tshi sumbedzaho u ḓiṋekedzela havho kha vhurereli.

Naa thabelo na khumbelo zwi nga pfiwa na u fhindulwa khwine arali muthu o rabela zwifhoni? Naa Mudzimu u ḓo takadzwa nga vhane vha ḓiimisela u ya zwifhoni? Naa Vhakriste vha fanela u ya zwifhoni? Phindulo dza dzenedzi mbudziso a dzi nga ri vhudzi fhedzi nḓila ine ra fanela u dzhia ngayo u ya zwifhoni, fhedzi dzi ḓo dovha dza ri thusa u pfesesa vhurabeli vhune ha takadza Mudzimu zwa vhukuma.

Nyambedzano ye Yesu a vha nayo na mufumakadzi wa Musamaria i sumbedza mavhonele a Mudzimu nga ha u gwadamela fhethu hu khethwa kana zwifhoni. Yesu o vha a tshi khou fhira Samaria nahone a awela tshisimani tshine tsha vha tsini na Sikara. O thoma nyambedzano na mufumakadzi we a vha o ḓa u ka maḓi tshisimani. Musi vha tshi khou amba, onoyo mufumakadzi o sumbedza phambano khulwane vhukati ha vhurereli ha Vhayuda na Vhasamaria. O ri: “Vhomakhulukuku washu vho vha vha tshi rabela kha heyi thavha; huno iwe uri vhathu vha fanela u rabela Yerusalema fhedzi.”—Yohane 4:5-9, 20.

Onoyo mufumakadzi o vha a tshi khou amba nga ha Thavha ya Geritsimi ine ya vha khilomithara dza 50 devhula ha Yerusalema. Henefho, Vhasamaria vho vhuya vha vha na thembele he vha vha vha tshi  pembelela vhuṱambo vhu nga ho sa Paseka. Naho zwo ralo, nṱhani ha uri Yesu a ṅaṅisane nae, o amba na onoyo mufumakadzi a ri: “Tenda zwine nda u vhudza zwone, hu ḓo ḓa tshifhinga tshine vhathu vha si tsha ḓo rabela kha heyi thavha kana u rabela ngei Yerusalema.” (Yohane 4:21) Ndi phindulo i mangadzaho vhukuma, zwihulu-hulu i tshi bva kha Muyuda! Ndi ngani u gwadamela Mudzimu thembeleni ya Yerusalema zwo vha zwi tshi ḓo fhela?

Yesu o bvela phanḓa a ri: “Hu ḓo ḓa tshifhinga, nahone tsho no swika, tshine vhagwadameli vha ngoho vha ḓo rabela Khotsi u tendelana na muya na ngoho, ngauri Khotsi u ṱoḓa vha ngaho vhenevho uri vha mu rabele.” (Yohane 4:23) Lwa miṅwaha ya maḓana, Vhayuda vho vha vha tshi dzhia thembele ya Yerusalema sa fhethu ha ndeme hune vha gwadamela hone. Vho vha vha tshi fara lwendo lwa u ya henefho luraru nga ṅwaha, uri vha itele Yehova, Mudzimu wavho tshiṱhavhelo. (Ekisodo 23:14-17) Fhedzi Yesu o amba uri zwenezwi zwoṱhe zwi ḓo shanduka nahone “vhagwadameli vha ngoho” vha ḓo rabela “nga muya na nga ngoho.”

Thembele ya Vhayuda yo vha i tshifhaṱo tsha vhukuma fhethu hune vhathu vha dzula hone. Fhedzi muya na ngoho a si zwithu zwi vhonalaho kana zwine zwa vha huṅwe fhethu. Nga zwenezwo, Yesu o vha a tshi khou ṱalutshedza uri vhurabeli ha Vhakriste vha ngoho a ho ngo ḓitika nga tshifhaṱo kana huṅwe fhethu, hu sa londwi uri ndi Thavha ya Geritsimi, thembele ya Yerusalema kana huṅwe fhethu hukhethwa.

Kha nyambedzano yawe na mufumakadzi wa Musamaria, Yesu o dovha a amba uri “hu ḓo ḓa tshifhinga” tshine ha ḓo shanduka nḓila ine Mudzimu a gwadamelwa ngayo. Tshi ḓo ḓa lini? Tshifhinga tsho swika tshee Yesu a fhelisa maitele a vhurabeli ha Vhayuda o thewaho kha Mulayo wa Mushe nga tshiṱhavhelo tsha lufu lwawe. (Vharoma 10:4) Naho zwo ralo, Yesu o dovha a ri: “Tshifhinga . . . tsho no swika.” Ndi ngani? Ngauri sa Messia o vha o no kuvhanganya vhafunziwa vhe vha vha vha tshi ḓo thetshelesa ndaela ye a i amba, a ri: “Mudzimu ndi Muya, nahone vha mu rabelaho vha fanela uri vha mu rabele nga muya na nga ngoho.” (Yohane 4:24) Nga zwenezwo, zwi amba mini u rabela nga muya na nga ngoho?

Musi Yesu a tshi amba nga ha u rabela nga muya, o vha a sa khou amba nga ha miṅwe mimuya ya vhurabeli. Nṱhani hazwo, o vha a tshi khou amba nga ha u livhiswa nga muya mukhethwa wa Mudzimu, une wa ri thusa u pfesesa Maṅwalo. (1 Vhakorinta 2:9-12) Nahone ngoho ye Yesu a vha a tshi khou amba nga hayo ndi nḓivho yo teaho ya pfunzo dza Bivhili.  Nṱhani ha u gwadamela fhethu ho khetheaho, vhurabeli hashu vhu ḓo ṱanganedzea kha Mudzimu arali vhu tshi tshimbidzana na zwine Bivhili ya zwi funza nahone vhu tshi livhiswa nga muya mukhethwa.

Vhakriste vha fanela u dzhia hani u ya zwifhoni? Vha fanela u dzhiela nṱha ndaela ya Yesu ya uri vhagwadameli vha ngoho vha rabela Mudzimu nga muya na nga ngoho nahone zwi khagala uri vhurabeli vhune ha itwa zwifhoni kana fhethu ho khetheaho a si ha ndeme kha Khotsi ashu wa ṱaḓulu. Zwiṅwe hafhu, Bivhili i ri sumbedza mavhonele a Mudzimu nga ha u gwadamela midzimu ya zwifanyiso. I ri: “Shavhelani kule ha midzimu ya zwifanyiso” nahone “thanyelani midzimu i sili.” (1 Vhakorinta 10:14; 1 Yohane 5:21) Nga zwenezwo, Mukriste wa ngoho a nga si ye u gwadamela fhethu hune ha dzhiiwa hu hukhethwa kana hune ha ṱuṱuwedzwa u gwadamela midzimu ya zwifanyiso. Ngauralo, musi zwi tshi ḓa kha mafhungo a zwifho, Vhakriste vha ngoho vha iledza u ya henefho.

Naho zwo ralo, zwenezwi a zwi ambi uri Ipfi ḽa Mudzimu ḽi thivhela muthu a tshi rabela, u guda kana u elekanya e huṅwe fhethu. Fhethu ho dzudzanyeaho ha vhurabeli na hu re na tshirunzi, ndi fhethu ho teaho u guda na u haseledza zwithu zwa muya. A zwo ngo khakhea u itela mufu tombo ḽa tshihumbudzo. Zwenezwi zwi nga vha zwi tshi sokou vha nḓila ya u humbula mufu. Naho zwo ralo, u dzhia fhethu ho raloho sa fhethu hukhethwa kana u gwadamela zwifanyiso kana zwiṅwe zwithu zwa kale zwi ḓo vha zwi sa tshimbidzani na maipfi a Yesu.

Nga zwenezwo, a no ngo fanela u ya zwifhoni ni tshi fulufhela uri Mudzimu u ḓo pfa thabelo dzaṋu musi ni henefho. Na Mudzimu a nga si ni takalele kana u ni fhaṱutshedza musi ni tshi ya zwifhoni. Bivhili i ri vhudza uri Yehova Mudzimu ndi “Murena wa ḽiṱaḓulu na ḽifhasi, a sa dzuliho thembeleni dzo fhaṱwaho nga zwanḓa.” Fhedzi zwenezwi a zwi ambi uri Mudzimu u kule na riṋe. Ri nga mu rabela nahone a ri pfa huṅwe na huṅwe hune ra vha hone ngauri ha “kule na muṅwe na muṅwe washu.”—Mishumo 17:24-27.