“Nda vhona khuluṋoni i fhethu hayo ṱaḓulu, hu na we a vha o dzula khayo. We a vha o dzula khayo o vha a tshi nga tombo ḽi ṱoḓaho u fana na daimane na tombo ḽitswuku ḽa thengokhulu, u mona na khuluṋoni ho vha hu na musengavhadzimu une wa fana na emeralidi.”—Nzumbululo 4:2, 3.

“Nda vhona hu tshi nga mulilo, hó tangwa nga lupenyo. Zwa nga musinga-vhadzimu une wa vhonala makoleni musi mvula yó na; lupenyo lwe lwa mu tanga lwa nga zwenezwo. Ndi zwone zwa vhugala ha Yehova zwe zwa vhonala.”—Hesekiele 1:26, 27.

Enea mabono o sumbedzwa muapostola Yohane na muporofita Hesekiele uri vha ambe nga ha vhugala ha Yehova Mudzimu wa Ṱaḓulu-Ṱaḓulu, nga zwenezwo, ri nga kona u vhona nga maṱo a muhumbulo tombo ḽi ṱoḓaho u fana na daimane, musengavhadzimu na Khosi yo dzulaho kha khuluṋoni. A ri vhudza uri Yehova u a mangadza, u na lufuno na mulalo.

Enea mabono a Mudzimu a tshimbidzana na maipfi o ṅwalwaho nga mupsalme ane a ri: “Ngauri Yehova ndi Muhulu, Murendiwa-vhukuma; ndi Ene o fanelwaho nga u ofhiwa kha midzimu yoṱhe. Ngauri midzimu yoṱhe ya Vha-nnḓa ndi zwifanyiso. Á vha Yehova, ndi Ene we a vhumba [ḽiṱaḓulu]. Vhuhosi na vhurena zwo livhana Ene; maanḓa na vhugala ndi zwi re nḓuni khethwa yawe.”—Psalme ya 96:4-6.

Naho Yehova e Ramaanḓaoṱhe, u ri ramba uri ri ambe nae nga thabelo nahone u ri khwaṱhisedza uri u ḓo ri thetshelesa. (Psalme ya 65:2) Mudzimu u a ri funa nahone u na ndavha na riṋe, zwenezwo zwo ita uri muapostola Yohane a ṅwale uri: “Mudzimu ndi lufuno.”—1 Yohane 4:8.

“Stefano a lavhelesa ṱaḓulu o ḓala muya mukhethwa, nahone a vhona vhugala ha Mudzimu na Yesu o ima thungo ya tshanḓa tsha u ḽa tsha Mudzimu, nahone a ri: ‘Vhonani! Ḽiṱaḓulu ḽo vulea nahone Murwa-muthu o ima thungo ya tshanḓa tsha u ḽa tsha Mudzimu.’”—Mishumo 7:55, 56.

Nga u ṱavhanya musi Stefano o no vhona ḽeneḽo bono, Yesu o vhulahwa nga vhathu vhe Stefano a vha a tshi khou amba navho—vharangaphanḓa vha Vhayuda. Ḽeneḽo bono ḽi khwaṱhisedza uri Yesu o vha a  tshi khou tshila na uri o vuswa vhafuni nahone u khou huliswa. Muapostola Paulo o ṅwala nga ha zwenezwo, a ri: “[Yehova o] vusa [Yesu] vhafuni nahone a mu dzudza kha tshanḓa tshawe tsha u ḽa ngei ṱaḓulu, u fhira mivhuso yoṱhe na vhuvhusi na maanḓa na vhurena na madzina oṱhe ane a ḓo bulwa, hu si kha ano maitele a zwithu fhedzi, fhedzi na kha a ḓaho.”—Vhaefesa 1:20, 21.

Zwiṅwe zwine zwa ṱalusa vhuimo hawe vhuhulwane, Bivhili i sumbedza uri Yesu u fana na Yehova vha na ndavha na vhathu. Kha vhuḓinḓa hawe ha kha ḽifhasi, Yesu o fhodza vha lwalaho na u vusa vhafu. Ngauri Yesu o ri fela, o sumbedza uri u funa Mudzimu na vhathu. (Vhaefesa 2:4, 5) Yesu o dzula kha tshanḓa tsha u ḽa tsha Mudzimu nahone hu si kale u ḓo shumisa maanḓa awe u ḓisela vhathu phaṱhutshedzo nnzhi fhethu hoṱhe.

“[Nṋe muporofita Daniele] nde’ ndi tshi khou lavhelesa ha vhuya ha vhewa zwidzulo; ha dzula [Yehova] Wa-Kale Wa-Maḓuvha. . . . O vha e na [vhaḓinḓa] vha maḓana a maḓana na maḓana, phanḓa hawe hó ima mavhuthu na mavhuthu a sá vhalei.”—Daniele 7:9, 10.

Kha ḽeneḽo bono ḽa ṱaḓulu, Daniele ho ngo vhona muruṅwa muthihi fhedzi, fhedzi o vhona vharuṅwa vhanzhi. Ḽeneḽo ḽi nga vha ḽo vha ḽi bono ḽi ofhisaho vhukuma. Vharuṅwa ndi vhathu vha muya, vho ṱalifhaho na vha re na maanḓa. Kha vharuṅwa, hu na vhaserafe na vhakerube. Bivhili i amba nga ha vharuṅwa lu fhiraho 250.

Vharuṅwa a vho ngo vhuya vha thoma vha tshila kha ḽifhasi. Mudzimu o sika vharuṅwa a sa athu u sika vhathu. Musi hu tshi sikwa ḽifhasi, vharuṅwa vho zwi vhona nahone vha khana nga dakalo.—Yobo 38:4-7.

Vharuṅwa vha dovha vha shumela Mudzimu nga u shela mulenzhe kha mushumo wa ndeme vhukuma une wa itwa ḽifhasini ḽoṱhe ṋamusi, wonoyo ndi mushumo wa u huwelela mafhungo maḓifha a Muvhuso wa Mudzimu. (Mateo 24:14) U shela havho mulenzhe kha wonoyo mushumo zwo dzumbululwa kha bono ḽe ḽa vhonwa nga muapostola Yohane, we a ṅwala uri: “Nda vhona muṅwe muruṅwa a tshi khou fhufha a tshi buḓekanya ḽiṱaḓulu, e na mafhungo maḓifha a lini na lini ane a fanela u a ḓivhadza vhane vha dzula kha ḽifhasi, kha tshaka dzoṱhe, mirafho yoṱhe, na ndimi dzoṱhe na vhathu vhoṱhe.” (Nzumbululo 14:6) Naho vharuṅwa vha si tsha amba na vhathu ṋamusi sa zwe vha vha vha tshi zwi ita  tshifhingani tsho fhiraho, fhedzi vha thusa u livhisa vhane vha huwelela mafhungo maḓifha kha vhathu vha mbilu dzavhuḓi.

“Ha vuwa nndwa ngei ṱaḓulu: Mikaele [Yesu Kristo] na vharuṅwa vhawe vha lwa na ḽiḽa ḽigweṋa, huno ḽigweṋa na vharuṅwa vhaḽo vha lwa fhedzi vha kundwa, vha si tsha wana fhethu ha u dzula ngei ṱaḓulu. Ngauralo, ḽigweṋa ḽihulu ḽa poswa fhasi, ḽiṋowa ḽa kale na kale, ḽine ḽa vhidzwa u pfi Diabolo na Sathane, ḽine ḽa khou xedza ḽifhasi ḽoṱhe; ḽo poswa kha ḽifhasi, na vharuṅwa vhaḽo vha poswa kha ḽifhasi naḽo.”—Nzumbululo 12:7-9.

Ṱaḓulu ho vha hu si na mulalo. Kha ḓivhazwakale ya vhathu, muṅwe wa vharuṅwa o ṱoḓa u gwadamelwa, a shandukela Yehova nahone a vhidzwa Sathane zwine zwa amba “Muhanedzi.” Vhaṅwe vharuṅwa vho ṱanganela nae kha honoho vhushandukwa nahone vha vhidzwa madimoni. Nga nṱhani ha vhuvhi havho, vho shandukela Yehova nahone vha xedza vhathu vhanzhi uri vha si tsha tevhela vhulivhisi ha Yehova.

Sathane na madimoni awe ndi vhavhi nahone vha na tshiṱuhu. Ndi maswina a vhathu nahone vha shela mulenzhe kha tshengelo i re hone kha ḽifhasi. Sa tsumbo, Sathane o vhulaha thakha na vhalanda vha Yobo munna we a vha a tshi fulufhedzea. Zwiṅwe hafhu, o vhulaha vhana vhoṱhe vha Yobo vha fumi nga u ita uri hu vhe na “ḓumbu ḽihulu” ḽe ḽa pwasha nnḓu ye vha vha vhe khayo. Nga murahu ha zwenezwo, Sathane a rwa Yobo nga “mamota a ṱhoṱhonaho, a bva kha muvhili woṱhe, a guma ṋayoni a guma na kha thovuma.”—Yobo 1:7-19; 2:7.

Naho zwo ralo, Sathane u ḓo fheliswa hu si kale. U bva tshee Sathane a poswa kha ḽifhasi, u a zwi ḓivha uri “o salelwa nga tshifhinga tshiṱuku.” (Nzumbululo 12:12) Sathane u ḓo fheliswa nahone zwenezwo ndi mafhungo a takadzaho.

‘Yesu o rengululela Mudzimu vhathu vha bvaho kha tshaka dzoṱhe na ndimi dzoṱhe, a vha ita muvhuso na vhotshifhe vha Mudzimu washu, na vhane vha ḓo vhusa sa mahosi kha ḽifhasi.’—Nzumbululo 5:9, 10.

Samusi Yesu o vuswa kha ḽifhasi nahone a ya u tshila ṱaḓulu, na vhaṅwe vha ḓo vuswa nga nḓila i fanaho. Yesu o vhudza vhaapostola vhawe vha fulufhedzeaho a ri: “Ndi khou ya u ni lugisela vhudzulo. Zwiṅwe hafhu, . . . ndi ḓo dovha nda vhuya nda ni dzhia, uri hune nṋe nda vha hone na inwi ni vhe henefho.”—Yohane 14:2, 3.

 Vhane vha ya ṱaḓulu vha na tshiitisi tsha u ya henefho. Vhenevho vhathu na Yesu, vha ḓo vhumba Muvhuso une mafheleloni wa ḓo vhusa vhathu vhoṱhe ḽifhasini na u vha ḓisela phaṱhutshedzo. Wonoyu ndi Muvhuso we Yesu a vhudza vhatevheli vhawe uri vha u rabelele musi a tshi vha sumbedza nḓila ine vha fanela u rabela ngayo, o ri: “Khotsi ashu wa ṱaḓulu, dzina ḽau nga ḽi itwe ḽikhethwa. Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.”—Mateo 6:9, 10.

“[Nṋe muapostola Yohane] nda pfa ipfi ḽihulu ḽi tshi bva kha khuluṋoni ḽi tshi ri: ‘Asiyo! Nnḓu ya mulanga ya Mudzimu vhukati ha vhathu, . . . u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.’”—Nzumbululo 21:3, 4.

Honoho vhuporofita vhu sumbedza tshifhinga tshine Muvhuso wa Mudzimu wo vhumbwaho nga Yesu na vhane vha vuselwa u tshila ṱaḓulu, wa ḓo fhelisa ngayo muvhuso wa Sathane nahone wa ita uri ḽifhasi ḽi vhe paradiso. Zwithu zwine zwa ita uri vhathu vha pfe vhuṱungu na u ṱungufhala zwi ḓo vha zwi si tsheeho. Lufu na lwone lu ḓo fheliswa.

Hu ḓo itea mini kha vhathu vhanzhi vho faho vhane vha sa ḓo vuselwa u tshila ṱaḓulu? Tshifhingani tshi ḓaho, vha ḓo dovha vha vuswa nahone vha tshila lwa tshoṱhe kha ḽifhasi ḽa Paradiso.—Luka 23:43.