Miṅwahani yo fhiraho, Rúbia, wahashu wa tshisadzini a re na miṅwaha ya 30, o dalela Sandra, muvulanḓila we a vha a tshi khou shuma tshivhidzoni tshiṱuku ngei tshipembe ha Brazil. Musi o dalela henefho, ho itea zwiṅwe zwithu zwe zwa takadza vhukuma Rúbia na zwe zwa shandula vhutshilo hawe. Ho itea mini? Kha ri pfe uri Rúbia u ri mini ene muṋe.

“Sandra o ṱuwa na nṋe musi ri tshi ya u dalela muṅwe mufumakadzi we a vha a tshi guda nae Bivhili. Musi ri tshi khou guda nae, onoyo mufumakadzi o ri: ‘Sandra, hu na vhaṅwe vhafumakadzi vhararu vhane nda shuma navho vhane vha khou ṱoḓa u guda Bivhili, fhedzi ndo vha vhudza uri vha fanela u thoma vha lindela. Ndi a zwi ḓivha uri a ni na tshikhala tsha u gudisa vhaṅwe vhathu uno ṅwaha.’ A tho ngo kholwa zwe nda zwi pfa. Zwo vha zwi sa pfali uri vhathu vhane vha khou ṱoḓa u ḓivha Yehova vha fanela u thoma  vha lindela uri vha kone u farelwa pfunzo ya Bivhili! Tshivhidzoni tsha hashu, zwo vha zwi tshi konḓa u wana pfunzo nthihi fhedzi ya Bivhili. Nga tshenetsho tshifhinga, ndi henefho hayani ha mugudiswa wa Bivhili, ndo pfa ndi na lutamo luhulwane lwa u thusa vhathu vha ḓoroboni yeneyo ṱhukhu. Nga u ṱavhanya nga murahu ha zwenezwo, ndo mbo ḓi pfuluwa ḓoroboni khulwane he nda vha ndi tshi dzula hone, nda yo dzula ḓoroboni ṱhukhu ye Sandra a vha a tshi khou vula nḓila khayo.”

Ho vha na mvelelo dzifhio? Rúbia o ri: “Hu sa athu fhela miṅwedzi mivhili ndo no pfulutshela henefho, ndo vha ndi na pfunzo dza Bivhili dza 15—nahone hu sa athu fhela tshifhinga tshilapfu, vhathu vho vha vha tshi vho fanela u thoma vha lindela u itela u guda na nṋe, sa zwe zwa itea kha Sandra!”

Wahashu wa tshinnani ane a pfi Diego, a re miṅwahani ya vhu-20, o dalela vhavulanḓila vha si gathi vhane vha khou shuma ngei Prudentópolis, ḓoroboni ṱhukhu i re tshipembe ha Brazil. Musi o vha dalela o kwamiwa vhukuma nga zwe a zwi vhona, zwi re zwone ndi uri zwo mu ṱuṱuwedza uri a ṱolisise vhuḓinḓa hawe. O ri: “Ndo vha ndi tshi khou ṱanganela zwavhuḓi tshivhidzoni tsha hashu, ndi tshi fhedza awara dzi si gathi ṅwedzi muṅwe na muṅwe vhuḓinḓani ha tsimu. Fhedzi musi ndi tshi dalela vhenevho vhavulanḓila nahone ndi tshi thetshelesa tshenzhelo dzavho, ndo mbo ḓi thoma u vhambedza dakalo ḽavho na mavhonele anga a u sa dzhiela nṱha vhuḓinḓa. Musi ndi tshi vhona nḓila ye vha vha vho takala ngayo, ndo tama uri ngavhe na nṋe vhutshilo hanga vhu na ndivho u fana na havho.” Musi o no vhuyelela hayani, Diego o mbo ḓi thoma u vula nḓila.

U fana na Diego, naa ni muswa wa Ṱhanzi ane a ṱanganela mushumoni wa u huwelela na ane a ya miṱanganoni ya Vhukriste, fhedzi ni vhona u nga vhuḓinḓa haṋu a vhu takadzi? Arali zwo ralo, naa ni nga ita tshanduko vhutshiloni haṋu dzine dza ḓo ni ṋea tshibuli tsha u ḓiphina nga dakalo ḽa u shuma fhethu hu re na ṱhoḓea khulwane ya vhahuweleli vha Muvhuso? Zwi a pfesesea uri zwi nga konḓa u humbula nga ha u ṱutshela vhutshilo havhuḓi no vhu ḓowelaho. Naho zwo ralo, vhaswa vhanzhi vho khetha u ita nga u ralo. Vho shandula zwipikwa zwavho na zwine vha zwi tama vha tshi itela u shumela Yehova nga vhuḓalo. Kha ri ṱhogomele tsumbo ya Bruno.

Miṅwahani i si gathi yo fhiraho, Bruno, ane zwino a vha na miṅwaha ya 28, o guda tshikoloni tsha muzika tshi ḓivheaho  vhukuma, nahone o vha e na tshipikwa tsha u vha mugudisi wa zwilidzo zwa muzika. Zwi re zwone ndi uri o ita mvelaphanḓa yavhuḓi vhukuma kha ngudo dzawe, nahone zwifhinga zwo vhalaho o vhuya a rambiwa uri a lange khonsathi ya vhalidzi vha zwilidzo. Zwo vha zwi tshi fulufhedzisa uri u ḓo vha na vhumatshelo havhuḓi, fhedzi Bruno o ri: “Naho zwo ralo, ndo vha ndi tshi pfa u nga hu na zwine zwa khou ṱahela vhutshiloni hanga. Ndo vha ndo ḓiṋekedza kha Yehova, fhedzi ndi sa khou mu shumela nga mbilu yoṱhe, nahone zwenezwo zwo vha zwi tshi ita uri ndi si takale. Ndo vhudza Yehova maḓipfele anga nga thabelo, nda dovha nda amba na vhahulwane tshivhidzoni. Musi ndo no humbula nga ho dzikaho nga enea mafhungo, ndo ita phetho ya uri vhuḓinḓa hanga ndi ha ndeme u fhira muzika, nda mbo ḓi litsha tshikolo tsha muzika, nda pfulutshela fhethu hu re na ṱhoḓea khulwane ya vhahuweleli vha Muvhuso.” Phetho yawe yo mu vhuyedza hani?

Bruno o pfulutshela ḓoroboni ya Guapiara (i re na vhadzulapo vha ṱoḓaho u vha 7 000), i re khilomithara dza 260 u bva ḓoroboni ya São Paulo. Yo vha i tshanduko khulwane. O ri: “Ndo pfulutshela kha nnḓu ṱhukhu i si na firidzhi, thelevishini, kana Inthanethe. Naho zwo ralo, nnḓu yeneyo i na zwiṅwe zwithu zwe nda vha ndi si nazwo mathomoni—ngade ya miroho na tsimu!” Musi a tshi khou shuma kha tshenetsho tshivhidzo tshiṱuku, luthihi nga vhege Bruno o vha a tshi paka bege yawe ya zwiḽiwa, maḓi, na khandiso a ya u huwelela mahayani nga thuthuthu yawe. Vhathu vhanzhi vha henefho vho vha vha sa athu vhuya vha pfa mafhungo maḓifha. O ri: “Ndo vha ndi na pfunzo dza Bivhili dza 18. Zwo ntakadza vhukuma u vhona vhenevha vhagudiswa vha tshi ita tshanduko vhutshiloni havho.” O dovha a ri: “Nga tshenetsho tshifhinga, ndo zwi ṱhogomela uri ndo wana tshithu tshe tsha vha tshi tshi khou ṱahela vhutshiloni hanga—u ḓipfa ndo fushea nga ho dzikaho zwine zwa ḓiswa nga u vhea Muvhuso u thoma vhutshiloni hau. Ndo vha ndi sa ḓo vhuya nda tshenzhela dakalo ḽeneḽi arali ndi vhe ndo tovhola zwithu zwi vhonalaho.” Bruno o ḓitikedza hani nga zwa dzitshelede musi e ngei Guapiara? A tshi ṅweṅwela o ri: “Nga u gudisa vhathu u tamba kaṱara.” Nga iṅwe nḓila o vha a tshi kha ḓi vha makone.

Mariana, ane zwino a vha miṅwahani yawe ya u fhedza ya vhu-20, o ḓiwana e kha vhuimo vhu fanaho na ha Bruno. O vha e ramilayo, fhedzi naho o vha e na mushumo wa vhuimo ha nṱha, o vha a tshi ḓipfa a songo fushea. O ri: “Ndo vha ndi tshi pfa u nga ndi khou ‘pandamedza muya.’” (Muh. 1:17) Vhahashu vha tshinnani na vha tshisadzini vhanzhi  vho mu ṱuṱuwedza uri a humbule nga ha u vha muvulanḓila. Musi o no humbula nga hazwo, Mariana, u katela na khonani dzawe Bianca, Caroline, na Juliana, vho dzhia phetho ya u yo thusa tshivhidzo tshi re ngei Barra do Bugres, ḓorobo ṱhukhu i re mahayani tsini na Bolivia, hu re kule vhukuma na hayani havho. Ho mbo ḓi itea mini?

Mariana o ri: “Ndo vha ndo ḓiimisela u dzula henefho miṅwedzi miraru fhedzi. Fhedzi musi i tshi fhela, ndo vha ndi na pfunzo dza Bivhili dza 15. Vhenevho vhagudiswa vho vha vha tshi ṱoḓa thuso uri vha kone u ita mvelaphanḓa ngohoni. Nga zwenezwo, a tho ngo vha na tshivhindi tsha u vha vhudza uri ndi khou ṱuwa. Ndo vha ndo tea u dzula.” Nahone vhenevho vhahashu vha tshisadzini vhaṋa, vho mbo ḓi dzula. Naa wonoyu mushumo muswa wa Mariana wo ita uri a ḓipfe o fushea vhutshiloni? O ri: “U shumiswa nga Yehova u itela u thusa vhathu u shandula vhutshilo havho uri vhu vhe khwine zwo ita uri ndi ḓipfe ndo fushea. Ndi phaṱhutshedzo kha nṋe u ḓivha uri zwino ndi khou shumisa tshifhinga na maanḓa anga u ita zwithu zwine zwa vhuyedza.” Caroline o amba nga ha nḓila ine vhenevha vhahashu vhaṋa vha ḓipfa ngayo musi a tshi ri: “Musi ndi tshi ya u eḓela vhusiku, ndi ḓipfa ndo fushea vhukuma ngauri ndi khou shumisa nungo dzanga dzoṱhe u itela u tovhola mushumo une wa tikedza Muvhuso wa Mudzimu. Ndi vhilaela nga maanḓa nga ha nḓila ine nda nga thusa ngayo vhagudiswa vhanga vha Bivhili. Zwi a takadza vhukuma u vhona vha tshi ita mvelaphanḓa. Ndi khou tshenzhela vhungoho ha maipfi ane a ri: ‘Thetshelani ni vhone vhuthu ha Yehova.’”—Ps. 34:8.

Yehova u a takala vhukuma musi a tshi vhona vhaswa vhanzhi shangoni ḽoṱhe vha tshi “phalala vha tshi zwi funa” u itela u huwelela mafhungo maḓifha a Muvhuso fhethu hu re kule! (Ps. 110:3; Mir. 27:11) Yehova u a vha fhaṱutshedza vhenevho vhashumi vha u ḓifunela.—Mir. 10:22.