Iṅwe nḓila ine ya nga ri thusa u sedzana na vhuleme ndi khuthadzo ine ra i wana kha vha muṱa, dzikhonani na vhatendi nga riṋe.

Maipfi a vhulenda na a re na lufuno ane a nga ambiwa nga khonani, a nga fana na mapfura a fhodzaho na ane a homolosa. (Mir. 16:24; 18:24; 25:11) Fhedzi Vhakriste vha ngoho a vha humbuleli vhone vhaṋe fhedzi uri vha ṱoḓa u khuthadziwa. Vha ita vhuḓidini ha u “khuthadza vhaṅwe kha vhuṱungu naho vhu vhufhio nge [na vhone vha] khuthadzwa nga Mudzimu.” (2 Vha-Kor. 1:4; Luka 6:31) Antonio, mulavhelesi wa tshiṱiriki wa ngei Mexico, o tshenzhela zwenezwi.

Musi a tshi wanala e na vhulwadze ha lymphoma, mufuda wa khentsara ya malofha, Antonio o ḓipfa o tsikeledzea vhukuma. Naho zwo ralo, o lingedza nga hune zwa konadzea ngaho u langa maḓipfele awe. Nga nḓila-ḓe? O vha a tshi lingedza u humbula nyimbo dza Muvhuso a imbela nṱha u itela u pfa maipfi a re khadzo na u elekanya nga hao. U rabela hawe a tshi khou ambela nṱha u katela na u vhalela nṱha Bivhili, zwo mu khuthadza vhukuma.

Naho zwo ralo, Antonio o zwi ṱhogomela uri thuso khulwane yo bva kha vhatendi ngae. O ri: “Musi nṋe na mufumakadzi wanga ri tshi ḓipfa ro tsikeledzea, ro vha ri tshi humbela muṅwe wa shaka a re muhulwane tshivhidzoni uri a ḓe u rabela na riṋe. Zwenezwi zwo ri khuthadza vhukuma na u ita uri ri dzike.” O dovha a ri: “Ri livhuha vhukuma thikhedzo ya muṱa washu na ya vhatendi nga riṋe, ye ya ri thusa uri nga tshenetsho tshifhinga tshiṱuku ri kone u lwisana na mavhonele a songo teaho.” O vha a tshi livhuha lungafhani dzenedzo khonani dzi re na lufuno dze dza mu ṱhogomela!

Iṅwe thuso ine ra vha nayo musi ro tsikeledzea, ndi fulufhedziso ḽa u ṋewa muya mukhethwa. Muapostola Petro o amba uri muya mukhethwa wa Mudzimu ndi “tshifhiwa tsha fhedzi.” (Mish. 2:38) Vhungoho ha eneo maipfi ho vhonala musi hu tshi ḓodzwa vhathu vhanzhi nga Pentekoste ya 33 C.E. Naho Petro o vha a tshi khou ambela kha vhaḓodzwa, muya mukhethwa ndi tshifhiwa tshine tsha nga waniwa nga riṋe roṱhe. Muya mukhethwa ndi munzhi-munzhi, nahone zwi nga vha zwavhuḓi uri ri u humbele, u itela uri ri dzule ri nawo nga vhunzhi.—Yes. 40:28-31.

Muapostola Paulo o konḓelela vhuleme vhunzhi, nahone kha tshiṅwe tshiitea, o ṱoḓa na u fa. (2 Vha-Kor. 1:8-10) Naho zwo ralo, Paulo o vha e si na nyofho yo kalulaho ya u fa. O khuthadzwa nga u ḓivha uri Mudzimu o vha a tshi khou mu tikedza. O ṅwala uri: “Nga hu rendwe Mudzimu ane a vha Khotsi a Murena washu Yesu Kristo, ane a vha Khotsi wa u khathutshela hoṱhe na Mudzimu wa u khuthadza hoṱhe, ane a ri khuthadza kha vhuṱungu hashu hoṱhe.” (2 Vha-Kor. 1:3, 4) Paulo ho ngo tendela thaidzo dzawe dzi tshi mu kula nungo. Nṱhani hazwo, milingo ye a i konḓelela yo mu thusa uri a ṱahulele pfaneleo ya u pfela vhaṅwe vhuṱungu, u itela uri a kone u vha khuthadza musi zwi tshi ṱoḓea.

Musi o no fhola, Antonio o kona u vhuyelela mushumoni wawe wa u dalela zwivhidzo. U bva kale o vha a tshi sumbedza dzangalelo kha vhatendi ngae, fhedzi ene na mufumakadzi wawe vho thoma u ita vhuḓidini ho khetheaho ha u dalela na u khuthadza vha lwalaho. Sa tsumbo, musi o dalela muṅwe Mukriste we a vha e na vhulwadze vhuhulwane, Antonio o ṱhogomela uri onoyo wahashu ha ṱoḓi u ya miṱanganoni. Antonio o ri: “A si uri o vha a sa funi Yehova na vhaṅwe vhatendi ngae, fhedzi vhulwadze hawe ho vha ho mu kwama vhukuma maḓipfele lwe a vha a tshi ḓipfa e si wa ndeme.”

U itela uri wahashu a lwalaho a ḓipfe o khuthadziwa, Antonio o mu humbela uri a rabele musi hu na guvhangano ḽa u ḓitakadza. Naho wahashu o ḓipfa a sa fanelei, o tenda u rabela. Antonio o ri: “O rabela zwavhuḓi nga maanḓa, nahone nga murahu o ḓipfa o vusuluswa. O dovha a ḓipfa e wa ndeme.”

Ndi ngoho uri roṱhe ro no vhuya ra tshenzhela vhuṱungu vhuhulwane kana vhuṱuku. Fhedzi samusi Paulo o amba, zwenezwo zwi nga ri thusa uri ri kone u khuthadza vhaṅwe musi hu na ṱhoḓea ya u ita nga u ralo. Nga zwenezwo, ri songo dzhiela fhasi vhuṱungu vhune ha khou pfiwa nga Vhakriste nga riṋe, nahone ri fanela u edzisa Mudzimu washu Yehova, nga u kona u khuthadza vhaṅwe.