GUY HOLLIS PIERCE, muraḓo wa Tshigwada tshi Langaho tsha Ṱhanzi dza Yehova, o fhedza buḓo ḽawe ḽa vhutshilo ha kha ḽifhasi nga Ḽavhuvhili ḽa 18 March, 2014. O vha e na miṅwaha ya 79 musi fulufhelo ḽawe ḽa u vha muṅwe wa vharathu vha Kristo vho vuswaho ḽi tshi ḓadzea.—Vhaheb. 2:10-12; 1 Pet. 3:18.

Guy Pierce o bebelwa ngei Auburn, California, kha ḽa U.S.A., nga ḽa 6 November, 1934, nahone a lovhedzwa nga 1955. O vhinga mufumakadzi, ane a pfi Penny, nga 1977 nahone vha vha na muṱa. Tshenzhelo yawe sa munna a re na muṱa yo ita uri a vhe khotsi kha vhanzhi. Nga 1982 ene na Penny vho vha vho farakanea mushumoni wa vhuvulanḓila nahone nga 1986 o thoma tshumelo lwa miṅwaha ya 11 sa mulavhelesi wa ḽiisela ngei United States.

Nga 1997, Guy na Penny Pierce vho thoma u shuma sa miraḓo ya muṱa wa Bethele wa ngei United States. Wahashu Pierce o vha a tshi shuma kha Muhasho wa Tshumelo, nahone nga 1998 o nangwa sa muthusi kha Komiti ya Vhashumi vha Tshigwada tshi Langaho. Wahashu Pierce o ḓivhadzwa nga ḽa 2 October, 1999 uri ndi muraḓo wa Tshigwada tshi Langaho, muṱanganoni wa ṅwaha muṅwe na muṅwe wa Watch Tower Bible and Tract Society of Pennsylvania. Miṅwahani ya zwenezwino, o shuma na Komiti dza Vhashumi, Vhaṅwaleli, Vhagandisi na dza u Dzudzanya.

U ṅwethuwa ha Wahashu Pierce na u vha hawe na miswaswo zwo ita uri vhathu vha vhubvo ho fhamba-fhambanaho vha mu takalele. Naho zwo ralo, pfaneleo ye ya ita uri a takalelwe vhukuma nga vhathu ndi lufuno, u ḓiṱukufhadza, u ṱhonifha hawe milayo yo lugaho na maitele na u vha na lutendo lwo fhelelaho kha Yehova. Guy Pierce o amba uri samusi zwi sa konadzei uri ḓuvha ḽi si ṱavhe, zwi nga si konadzee uri mafulufhedziso a Yehova a si ḓadzee nahone o vha a tshi ṱoḓa u vhudza vhathu vhoṱhe yeneyo ngoho.

Wahashu Pierce o vha a sa neti kha u shumela Yehova, o vha a tshi thoma u shuma nga matsheloni-tsheloni nahone a tshi anzela u bvela phanḓa na u shuma na nga madekwana. O tshimbila shango ḽoṱhe u itela u ṱuṱuwedza vhahawe vha tshinnani na vha tshisadzini vha Vhakriste, nahone o vha a tshi ḓiṋea tshifhinga tsha u vha na muraḓo muṅwe na muṅwe wa muṱa wa Bethele na vhaṅwe vhe vha vha vha tshi ṱoḓa u vhumba vhukonani nae, u ṋewa nyeletshedzo na thuso yawe. Naho ho no fhela miṅwaha, vhatendi ngae vha kha ḓi humbula vhuthu hawe, vhukonani na ṱhuṱhuwedzo yawe ya Maṅwalo.

Wahashu na khonani yashu o sia mufumakadzi wawe, vhana vha rathi, u katela vhaḓuhulu na vhaḓuhulu-ḓuhulwana vhawe. O vha e na vhaṅwe vhana vhanzhi vha lwa muya. Nyambo ya tshihumbudzo tsha Wahashu Pierce yo ṋekedzwa ngei Bethele ya Brooklyn nga Mugivhela wa ḽa 22 March, 2014, nga Mark Sanderson, ane a vha muraḓo wa Tshigwada tshi Langaho. Nṱhani ha u amba nga ha zwiṅwe zwithu, o amba nga ha fulufhelo ḽa Wahashu Pierce ḽa u tshila ṱaḓulu nahone a vhala maipfi a Yesu ane a ri: “Nḓuni ya Khotsi anga hu na vhudzulo vhunzhi. . . . Arali nda ya u ni lugisela vhudzulo, ndi ḓo dovha nda vhuya nda ni dzhia, uri hune nṋe nda vha hone na inwi ni vhe henefho. Nahone ni a ḓivha nḓila.”—Yoh. 14:2-4.

Vhukuma, ri ḓo ṱuvha Wahashu Pierce zwihulu. Naho zwo ralo, ri a takala ngauri o vha a tshi “ḓivha nḓila” ya hune a ḓo dzula hone lwa tshoṱhe.