Musi ni tshi pfa maipfi ane a ri “Vhufhelo vhu tsini!” hu ḓa mini muhumbuloni waṋu? Naa ni humbula nga ha mufunzi a tshi khou amba na tshivhidzo nga u fhisea o fara Bivhili? Kana naa ni humbula nga ha mukalaha wa madebvu o ima khonani ya bada, o ambara phura-phura ndapfu yo vhofhiwaho nga thambo khunduni, o fara na bodo ine ya vha na mulaedza u ambaho nga ha ḓuvha ḽa khaṱhulo? U humbula nga ha zwenezwo zwithu zwi nga ita uri vhathu vha vhilaele, ngeno vhaṅwe vha tshi nga timatima kana u takala.

Bivhili i ri: ‘Vhufhelo vhu ḓo ḓa.’ (Mateo 24:14) Tshiitea tshi fanaho tshi dovha tsha vhidzwa “ḓuvha ḽihulu ḽa Mudzimu” na “Haramagedo.” (Nzumbululo 16:14, 16) Ndi ngoho uri vhurereli ho hanganea nga ha enea mafhungo nahone hu vha na nyofho. Naho zwo ralo, Bivhili i bvisela khagala mafhungo a vhufhelo—i dzumbulula zwine ha vha zwone na zwine ha si vhe zwone. Ipfi ḽa Mudzimu ḽi dovha ḽa ri thusa u vhona arali vhufhelo vhu tsini. Zwa ndeme vhukuma, ḽi ri funza nḓila ine ra nga tshidzwa ngayo! Tsha u thoma, kha ri khakhulule mihumbulo yo khakheaho nahone ri wane ṱhalutshedzo. U ya nga Bivhili, “vhufhelo” vhu amba mini?

1. VHUFHELO A SI MULILO MUHULU UNE WA ḒO FHELISA ḼIFHASI.

   Bivhili i ri: “[Mudzimu o] fhaṱa ḽifhasi kha miteo yaḽo; a ḽi nga dzinginyei lini na lini.” (Psalme ya 104:5) Lwonolwo luṅwalo na maṅwe a ri khwaṱhisedza uri Mudzimu ha nga fhelisi ḽifhasi kana u tendela ḽi tshi fheliswa—na luthihi!—Muhuweleli 1:4; Yesaya 45:18.

2. VHUFHELO A SI TSHIITEA TSHI SONGO DZUDZANYWAHO TSHINE TSHA SOKOU ITEA.

   Bivhili i dzumbulula uri vhufhelo ho dzudzanywa—Mudzimu o vhu vhetshela tshifhinga tsho livhaho. Ri a vhala: “A hu na ane a ḓivha nga ha ḽeneḽo ḓuvha kana tshifhinga, na vharuṅwa vha re ṱaḓulu na Murwa a vha ḽi ḓivhi, ḽi ḓivhiwa nga Khotsi fhedzi. Dzulani no fhaṱuwa ngauri a ni ḓivhi uri tshifhinga tsho vhewaho tshi lini.” (Marko 13:32, 33) Vhukuma, Mudzimu (“Khotsi”) o dzudzanya kokotolo “tshifhinga tsho vhewaho” tshine a ḓo ḓisa ngatsho vhufhelo.

3. A SI VHATHU VHANE VHA ITA URI VHUFHELO VHU VHE HONE KANA MATOMBO ANE A WA A TSHI BVA TSHIKHALANI.

   Ndi mini zwine zwa ḓo ḓisa vhufhelo? Nzumbululo 19:11 i ri: “Nda vhona ḽiṱaḓulu ḽo vulea, nda vhona bere tshena. We a vha o i ṋamela o vha a tshi pfi A Fulufhedzeaho na Wa Ngoho.” Ndimana 19 i bvela phanḓa i tshi ri: “Nda vhona ḽivhanda na mahosi a ḽifhasi na mmbi dzavho vho kuvhangana uri vha lwe na o ṋamelaho bere na mmbi yawe.” (Nzumbululo 19:11-21) Naho luambo lwo shumiswaho henefha lu lwa pfanyisedzo, ri nga kona u pfesesa zwo engedzeaho: Mudzimu u ḓo rumela mmbi ya vharuṅwa u itela u fhelisa maswina awe.

1. U FHELISWA HA MIVHUSO YA VHATHU YO KUNDELWAHO.

   Bivhili i a ṱalutshedza: “Ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na Iini, une vhuhosi hawo ha sa ḓo wetshela  kha luṅwe lushaka. Wonoyo u ḓo pwashakanya mivhuso yoṱhe wa i lozwa; wone uṋe wa ima lini na lini.” (Daniele 2:44) Sa zwe zwa ambiwa mathomoni kha mbuno 3, hu ḓo vha na u fheliswa ha “mahosi a ḽifhasi na mmbi dzavho,” vhane vha ḓo vha vho “kuvhangana uri vha lwe na o ṋamelaho bere na mmbi yawe.”—Nzumbululo 19:19.

2. U FHELISWA HA NNDWA, VHUVEMU NA U SHAYEA HA KHAṰHULOKWAYO.

   “[Mudzimu] u dzivhisa dzinndwa migumoni ya ḽifhasi.” (Psalme ya 46:9) “Ngauri vhalugi vha ḓo dzula shango; vhane vha ḓo sala ndi avho vha si na mulandu. Vhavhi vhone tshavho ndi u lovha shangoni, vha mashandukwa vha tupulwa khaḽo.” (Mirero 2:21, 22) “Vhonani! Zwoṱhe ndi zwi ita zwiswa.”—Nzumbululo 21:4, 5.

3. U FHELISWA HA VHURERELI HE HA SI THETSHELESE MUDZIMU NA VHU FHURAHO VHATHU.

   “Vhaporofita vha porofita mazwifhi; vho-tshifhé vha shumisana navho. . . . Zwa matshelo zwi tshi ḓo ḓa ni ḓo ita hani?” (Yeremia 5:31) “Vhanzhi vha ḓo amba na nṋe nga ḽeneḽo ḓuvha vha ri: ‘Murena, Murena, naa a ro ngo porofita dzinani ḽau, ra pandela madimoni dzinani ḽau, ra ita mishumo ya maanḓa dzinani ḽau?’ Naho zwo ralo, ndi ḓo vha vhudza nda ri: A thi ni ḓivhi! Nṱutsheleni, inwi vhadzia-vhutshinyi!”—Mateo 7:21-23.

4. U FHELISWA HA VHATHU VHANE VHA ṰUṰUWEDZA NA U TIKEDZA VHUIMO HA ZWINO HA SHANGO.

   Yesu Kristo o ri: “Hoyu ndi wone mutheo wa khaṱhulo, wa uri tshedza tsho ḓa shangoni; fhedzi vhathu vha funa swiswi nṱhani ha tshedza, ngauri mishumo yavho yo vha i mivhi.” (Yohane 3:19) Bivhili i ṱalusa u fheliswa ha shango ha u thoma ha misini ya munna a fulufhedzeaho Noaxe. “Shango ḽa tshenetsho tshifhinga ḽo lozwiwa musi ḽi tshi kumbiwa nga maḓi. Nga ḽeneḽo ipfi maṱaḓulu na ḽifhasi zwine zwa vha hone zwino zwo vhulungelwa mulilo nahone zwo vhetshelwa ḓuvha ḽa khaṱhulo na u lozwiwa ha vhathu vha sa ofhi Mudzimu.”—2 Petro 3:5-7.

Ṱhogomelani uri u ḓa ha “ḓuvha ḽa khaṱhulo na u lozwiwa” zwi vhambedzwa na u fheliswa ha “shango” ḽa misini ya Noaxe. Ndi shango ḽifhio ḽe ḽa fheliswa? Pulanete yashu a yo ngo fheliswa; ho fheliswa “vhathu vha sa ofhi Mudzimu”—maswina a Mudzimu—ndi vhone vhe vha “lozwiwa.” Tshifhingani tsha u ḓa ha “ḓuvha ḽa khaṱhulo” ḽa Mudzimu, vhane vha khetha u vha maswina a Mudzimu na vhone vha ḓo fheliswa. Fhedzi khonani dza Mudzimu dzi ḓo tshidzwa u fana na Noaxe na muṱa wawe.—Mateo 24:37-42.

Edzani u humbula nḓila ine ḽino ḽifhasi ḽa ḓo vha ḽavhuḓi ngayo musi Mudzimu o no fhelisa ṱhuṱhuwedzo yoṱhe mmbi! Vhukuma, mulaedza wa Bivhili nga ha vhufhelo ndi mafhungo maḓifha hu si mavhi. Naho zwo ralo, ni nga ḓivhudzisa uri: ‘Naa Bivhili i a ri vhudza uri vhufhelo vhu ḓo ḓa lini? Naa vhu nga vha vhu tsini? Ndi nga ponyoka hani?’