Naa ndi vhutsilu u humbula uri vhafu vha ḓo dovha vha tshila? Muapostola Paulo o vha a sa humbuli ngauralo. O ṅwala uri: “Arali ro fulufhela Kristo kha vhuno vhutshilo fhedzi, ri ḓo ṱungufhala u fhira naho e nnyi. Ngoho ndi ya uri Kristo o vuswa vhafuni, ndi tshiranzhe tsha vho faho.” (1 Vhakorinta 15:19, 20) Paulo o vha a tshi tenda uri mvuwo i ḓo vha hone. Zwenezwo zwo vha zwo khwaṱhisedzwa nga u vuswa ha Yesu. * (Mishumo 17:31) Ndi ngazwo Paulo o vhidza Yesu “tshiranzhe”—o vha ene wa u ranga u vuselwa u tshila tshoṱhe. Arali Yesu o vha e ene wa u ranga u vuswa, nga zwenezwo, zwi a pfala u tenda uri ho vha hu tshi ḓo vuswa na vhaṅwe.

Hetshi ndi tshiṅwe tshiitisi tshine tsha nga ni ita uri ni vhe na vhungoho nga ha fulufhelo ḽa mvuwo. Yehova ndi Mudzimu wa ngoho. ‘Mudzimu ha zwifhi.’ (Tito 1:2) Yehova ha athu u vhuya a amba mazwifhi, nahone a nga si vhuye a zwifha. Naa a nga fulufhedzisa mvuwo, na u sumbedza uri a nga kona u vusa vhathu nahone mafheleloni a si tsha ḓadzisa mafulufhedziso awe? Na khathihi!

Ndi ngani Yehova o ita ndugiselo ya mvuwo ya tshifhingani tshi ḓaho? Ndi ngauri u na lufuno. Yobo o vhudzisa a ri: ‘Arali muthu a fa, naa a nga dovha a tshila?’ A dovha a ri: “Ndi misi U tshi ḓo mbidza nda aravha; ndi misi U tshi ḓo ṱuvha tshivhumbiwa tsha zwanḓa zwau.” (Yobo 14:14, 15) Yobo o vha e na vhungoho ha uri Khotsi awe wa ṱaḓulu u ḓo ṱulutshela u mu vusa. Naa Mudzimu o shanduka? Bivhili i ri: “Ngauri Nṋe Yehova a thi shanduki.” (Maleaxi 3:6) Mudzimu u kha ḓi ṱoḓa u vhona vho faho vha tshi vuswa, vhe na mutakalo wavhuḓi nahone vho takala. Ndi zwine mubebi muṅwe na muṅwe a zwi tama musi o felwa nga ṅwana. Vhukuma, phambano ndi uri Mudzimu u na maanḓa a u ita zwine a zwi funa.—Psalme ya 135:6.

 Yehova u ḓo ṋea Murwa wawe maanḓa a u ḓisela dakalo ḽi sa fheli vhoṱhe vhe vha felwa nga vhafunwa vhavho. Nahone Yesu u ḓipfa hani nga ha mvuwo? Musi a sa athu u vusa Lazaro, Yesu o pfa vhuṱungu he ha vha hu tshi khou pfiwa nga khaladzi na dzikhonani dza Lazaro nahone “a lila.” (Yohane 11:35) Kha tshiṅwe tshiitea, Yesu o ṱangana na tshilikadzi ya ngei Naini, we a vha o felwa nga murwa wawe muthihi fhedzi. Yesu “a mu pfela vhuṱungu nahone a amba nae a ri: ‘Litsha u lila.’” Nga u bonya ha iṱo a vusa murwa wawe. (Luka 7:13) Nga u ralo, Yesu u a pfiswa vhuṱungu nga u bilufhala na lufu. U ḓo takala lungafhani musi a tshi fhelisa zwililo zwa vhathu vhoṱhe nahone vha ḓala dakalo!  

Naa no no vhuya na felwa? Ni nga vha ni tshi vhona u nga lufu ndi thaidzo i si na thandululo. Fhedzi hu na thandululo, Mudzimu u ḓo shumisa Murwa wawe u itela u vusa vhathu. Humbulani uri Mudzimu u ṱoḓa ni tshi vhona yeneyo thandululo. U ṱoḓa ni tshi vha hone u ṱanganedza vhafunwa vhaṋu. Ḓivhoneni ni tshi khou dzudzanya vhumatshelo ha tshoṱhe ni navho, hu si tsheena tshine tsha ḓo dovha tsha ni fhambanya navho!

Lionel, o redzwaho mathomoni, o ri: “Mafheleloni, ndo guda nga ha mvuwo. Mathomoni zwo vha zwi sa tendisei nahone ndo vha ndi sa fulufheli muthu we a mmbudza nga hazwo. Fhedzi, nda ḓiwanela vhuṱanzi Bivhilini nahone nda wana zwi ngoho! Ndo lindela nga maṱo matswuku u dovha nda vhona makhulu wanga.”

Naa ni nga ṱoḓa u ḓivha zwo engedzaho? Ṱhanzi dza Yehova dzi ḓo takalela u ni sumbedza Bivhilini yaṋu uri ndi ngani dzi na vhungoho ha uri tshifhingani tshi ḓaho hu ḓo vha na mvuwo. *