Tshiṅwe tsha zwithu zwe Ṱhanzi Dza Yehova vha zwi lavhelela uno ṅwaha ndi u ṱalela Tshipiḓa tsha u thoma tsha vidio ya Vhutshilo Ha Yesu. Vhathu vha dzimiḽioni vho no ḓi ḽi ṱalela ḽeneḽi ḽitambwa nahone hu tshee ho tou bviswa tshipiḓa tsha u thoma fhedzi kha zwa 18 zwine zwa ḓo bviswa. Ndi mushumo ufhio une vhahashu vha khou u ita u itela u bveledza yeneyi vidio nahone ndi mini zwe na zwi ita u itela u vha thusa?

 Davhini ḽa Australasia hune vhunzhi ha zwipiḓa zwa ḽitambwa ḽa Vhutshilo Ha Yesu zwa khou rekhodelwa hone, hu vha hu na vhathu vha ṱoḓaho u vha 50 u ya kha 80 musi hu tshi rekhodiwa tshiitea tshiṅwe na tshiṅwe. a Hu vha hu na vhahashu vhane vha khou shuma u lugiselela vhathu zwiḽiwa zwa nga masiari, zwa madekwana na zwimuṋemuṋe. Vhenevho vhahashu vha dzula vho lugisa uri ndi mini zwine vha ḓo zwi bika hu tshee nga phanḓa. Esther ane a shuma kha muhasho wa zwiḽiwa u ri: “Ri renga zwiḽiwa zwo fhambanaho fhethu hu sa fani uri ri kone u wana zwiḽiwa zwa vhuimo ha nṱha nga mitengo i fareaho. Ri dzula ri tshi shandula zwine ra zwi bika na nḓila ine ra bika ngayo uri ri si tambise zwiḽiwa.” Ḓuvha ḽiṋwe na ḽiṅwe, hu shumiswa R72 kha muthu muṅwe na muṅwe uri vhathu vhoṱhe vha kone u wana zwiḽiwa.

 Vhatambi na vhaṅwe vhashumi a vha ṱoḓi zwiḽiwa fhedzi, vha ṱoḓa na u tsireledzwa kha ḓuvha. Ngei Australia kanzhi ḓuvha ḽi vha ḽi tshi khou fhisa, nahone hu a vha na mufhiso wo kalulaho une wa vha khombo. U itela u tsireledza vhahashu kha ḓuvha, vhahashu vha ita madennde na fhethu ho khudaho hune vhahashu vha nga ya vha dzula hone u itela u awela na u ita vhungoho ha uri hu dzule hu na sunscreen, dziambureḽa na maḓi. Kevin ane a shuma kha muhasho wa Audio na Vidio u ri: “Vhunzhi ha vhahashu vhane vha ita wonoyo mushumo ndi vhane vha ḓa u thusa Bethele vha tshi khou bva vhe mahayani. Vha ita wonoyo mushumo na miṅwe minzhi nga u ḓiṱukufhadza nahone vho takala. Wonoyu mushumo wa u bveledza ḽeneḽi ḽitambwa wo vha u tshi ḓo dzhia tshifhinga tshilapfu arali vho vha vha sa khou ri thusa.”

 U itela uri zwiṅwe zwa zwithu zwine zwa khou rekhodiwa zwi vhonale u nga ndi zwa vhukuma, vhahashu vha tea u ya u rekhoda huṅwe fhethu hune ha vha kule na davhi ḽashu. U itela u rekhoda zwiitea zwine zwa sumbedza nḓila ye zwithu zwa vha zwi ngayo tshifhingani tsha Bivhili hu sa athu vha na muḓagasi, tshigonṱiri na nnḓu dza ano maḓuvha, vhahashu vha tea u tshimbila lwendo lulapfu u ya u rekhoda fhethu hu re kule vhukuma. Zwiambaro zwa vhatambi na zwishumiswa zwi tea u pakiwa zwa iswa fhethu hune ha ḓo vha hu khou rekhodelwa hone. Musi hu sa athu u thoma u rekhodiwa, vhahashu vha a ita vhungoho ha uri hu na dzi generator, maḓi a u nwa na mabunga. Vhatambi na vhaṅwe vhashumi vha dzula miḓini ya vhahashu vhane vha dzula tsini na hune ha vha hu khou rekhodelwa hone na dzihodelani.

 U rekhoda huṅwe fhethu zwi a ḓura, zwi dzhia tshifhinga tshilapfu nahone zwi a netisa. Nga zwenezwo, nga 2023, Tshigwada tshi Langaho tsho tenda uri ri renge video wall ine ra ḓo i shumisa u rekhoda nahone yo vha i tshi khou ḓura R44.7 miḽioni. Tshenetshi tshishumiswa tshi bveledza zwifanyiso zwavhuḓi zwine zwa fana na zwifanyiso zwo dzhiiwaho nnḓa zwa vhukuma, zwa ita uri zwo rekhodiwaho zwi nge zwo rekhodelwa nnḓa. Tshi dovha hafhu tsha ri thusa uri ri si ye u rekhoda huṅwe fhethu zwine zwa ḽa tshelede. Darren ane a vha muraḓo wa Komiti Ya Davhi ya Australasia u ri: “U rekhoda ri tshi shumisa video wall zwi thusa vhatambi uri vha si ṱavhanye vha neta nahone ri a kona u rekhoda tshiitea tshithihi lwo vhalaho. Sa tsumbo, musi ri tshi khou rekhodela nnḓa, ri vha ri tshi tou vha na tshifhinga tshiṱuku tsha u rekhoda tshiitea tsha musi ḓuvha ḽi tshi khou kovhela hu sa athu u vha na swiswi. Fhedzi musi ri tshi shumisa video wall, ri a kona u rekhoda tshiitea tsha musi ḓuvha ḽi tshi khou kovhela lunzhi-lunzhi u vhuya u swika ri tshi wana tshine ra tshi takalela.”

 Hu ṱoḓea vhathu vhanzhi u itela u tamba na u rekhoda tshipiḓa tshiṅwe na tshiṅwe tsha ḽitambwa ḽa Vhutshilo Ha Yesu. Vhenevha vhahashu vha ḓipfa hani nga mushumo une vhahavho vha u ita u itela u vha ṱhogomela?

 Amber ane a dzula Melbourne we a fara lwendo lwa khiḽomithara dza 700 uri a kone u tikedza kha wonoyo mushumo o ṅwala uri: “U bva ndi tshi tou tsa vhuimamabufho, vhahashu vha Bethele vho mpfara zwavhuḓi vhukuma. Vhunzhi havho vho vha vha tshi ita na u nthamba dzirumuni dzavho uri ndi ḽe zwiḽiwa navho kana ri nwe tie. Musi ri fhethu he ra vha ri khou rekhodela hone, vhathu vhoṱhe vho ita uri ndi ḓipfe ndo vhofholowa nahone ndi tshi funwa. Ndo wana phaṱhutshedzo nnzhi musi ndi henengei. A tho ngo vhuya nda pfa zwi muhwalo.”

 Derek ane a khou shuma na vhahashu vhane vha khou bveledza yeneyi vidio u ri: “Vhahashu vha bvaho kha mihasho yo fhambanaho vho ri tikedza u bva ri tshi tou thoma u ita yeneyi vidio. Ndi a livhuwa vhahashu vhe vha shumisa tshifhinga tshavho, thundu dzavho na nungo dzavho u itela u tikedza wonoyu mushumo. Vho tikedza nga u ḓifunela nahone vha na vhuthu. Zwi khagala uri Yehova o vha fhaṱutshedza na u fhaṱutshedza roṱhe vhane ra khou shuma kha wonoyu mushumo. Zwenezwi zwoṱhe zwo ita uri ndi vhe na vhungoho ha uri Yehova ha sokou dzhiela nṱha mvelelo dza mushumo washu, fhedzi u dzhiela nṱha na nḓila ine ra u ita ngayo.”

 Ri khou livhuwa nge na tikedza wonoyu mushumo nga miṋeelo ya vhoiwe, u katela na ye na i ita ni tshi shumisa donate.mt1130.com.