Nga March 2020, musi World Health Organization i tshi ḓivhadza nga ha dziedzi ḽa Corona, vhathu vho vha vha sa vhuyi vha humbula uri hu ḓo vhuya ha fhela ṅwaha tshenetshi tshitzhili tshi tshi kha ḓi vha hone. Vhathu vhanzhi u katela na Ṱhanzi dza Yehova vho kwamea nga ḽeneḽi dziedzi. Ḽo kwama mutakalo wavho, nḓila ine vha ḓipfa ngayo, ḽa vha kwama na kha sia ḽa zwa masheleni. Ṱhanzi dza Yehova vho dzudzanya hani u thusa kha tshenetshi tshiwo?

 Komiti ya u Dzudzanya ya Tshigwada tshi Langaho tsha Ṱhanzi dza Yehova, yo livhisa Komiti dzi fhiraho 950 dza u Thusa vho Welwaho nga Khombo u itela u thusa kha dziedzi ḽa Corona u mona na shango ḽoṱhe. Kha vhuṅwe vhuimo, ho dzudzanywa uri vhathu vha thuswe nga vhathu vha hune vha dzula hone. Kha vhuṅwe vhuimo Ṱhanzi dzo thuswa nga muvhuso. Dzenedzo Komiti dza u Thusa vho Welwaho nga Khombo, dzo dovha dza dzudzanya u thusa fhethu hunzhi.

 Sa tsumbo, ṱhogomelani zwe zwa itea ngei Paraguay. Iṅwe gurannḓa yo vhiga uri dziedzi ḽa Corona ḽo kwama ikonomi, “zwenezwo zwo ita uri vhathu vhanzhi ngei Paraguay vha sike nga nḓala mahayani avho.” Fhedzi Komiti ya ngei Paraguay ya u Thusa vho Welwaho, yo vha yo no thoma u isa zwithu zwine vha nga zwi shumisa lwa vhege mbili. Zwenezwo zwithu zwo vha zwi tshi katela zwiḽiwa zwo eḓanaho, zwithu zwa u kunakisa, zwithu zwa u ṱamba zwine zwa nga kona u shumiswa nga vhathu vhaṋa muṱani. Phasela iṅwe na iṅwe yo vha i tshi ṱoḓa u lingana tshelede i ṱoḓaho u vha R411.47.

 Vhenevho vhathu vhane vha khou thusa vha ḓitsireledza hani uri vha si farwe nga Corona? Vha ambara mimasiki nahone a vha sendelesi tsini na vhaṅwe. Vha ita vhungoho ha uri khamphani dzine vha renga khadzo zwiḽiwa dzi lugiselela zwenezwo zwiḽiwa fhethu ho kunaho na u dzhia vhukando ha uri vhathu vha dzule vho tsireledzea. Zwenezwo zwi katela u ita vhungoho ha uri vhathu vhane vha khou isa dzenedzo phasela vha ambare zwithu zwine zwa ḓo vha tsireledza, vha kunakise zwiendedzi zwavho na u zwi fafadzela mishonga ya u vhulaya zwitzhili. Zwiṅwe hafhu, vha ita vhungoho ha uri dzenedzo phasela dzi vhewe fhethu ho fafadzelwaho mushonga wa u vhulaya zwitzhili. Tsha u fhedza, vhane vha khou isa dzenedzo phasela a vha sendelesi tsini na vhahashu vhane vha khou ṱanganedza dzenedzo phasela.

 U bva nga January 2021, Komiti ya u Dzudzanya yo tenda uri hu shumiswe tshelede i fhiraho R342 919 750, u itela u thusa kha dziedzi ḽa Corona. Ofisi dza davhi na Komiti dza u Thusa vho Welwaho nga Khombo, dzi shumisa yeneyi miṋeelo nga vhuṱali na u ita zwine dza nga kona u itela u wana zwithu zwine dza nga zwi renga nga mutengo wa fhasi. Sa tsumbo, vhahashu vha ngei Chile vhane vha dzudzanya mushumo wa u thusa vho welwaho nga khombo, vho vha vha tshi khou ṱoḓa u renga ṋawa (nḓodzi) dzi linganaho khilogramu dza 750. Fhedzi mutengo wa dzenedzo ṋawa wo mbo ḓi gonya nga ṅwedzi u tevhelaho! Musi ho no fhela awara mbili vho tendelana uri vha ḓo renga dzenedzo ṋawa nga mutengo wa nṱha, murengisi o mbo ḓi vha vhudza uri muṅwe muthu o humisa ṋawa dze a vha o dzi renga. Zwino nṱhani ha u vha rengisela dzenedzo ṋawa nga mutengo wa nṱha we vha vha vho tendelaho ngawo, o mbo ḓi vha rengisela dzenedzo ṋawa dzo humiswaho nga mutengo wa fhasi.

 Musi vhahashu vha tshi ya u dzhia dzenedzo ṋawa, murengisi o vha pomoka uri vha khou ṋea vhathu zwiḽiwa nga nḓila i songo teaho, u fana na zwine zwa itwa nga maṅwe madzangano. Vhahashu vho mbo ḓi rabela nahone nga murahu vha vhudza onoyo murengisi uri ho sedzuluswa muṅwe na muṅwe tshivhidzoni u itela u vhona vhane vha khou ṱoḓa thuso zwa vhukuma. Vhahashu vho dovha vha mu vhudza uri samusi mvelele dza vhathu vhane vha khou thuswa dzi sa fani, muṅwe na muṅwe u khou thuswa u ya nga zwine a zwi ṱoḓa muṱani wawe. Vho khwaṱhisedza onoyo murengisi uri vhathu vhane vha ṋeela tshelede na u shuma u itela u thusa Ṱhanzi dza Yehova vha zwi ita nga u tou ḓifunela. O vha o mangala. Onoyo murengisi o mbo ḓi vha rengisela ṋawa nga mutengo we vha vha vho tendelana ngawo. O dovha a vha ṋea dziṅwe ṋawa dzi linganaho khilogramu dza 400 nga mahala musi vha tshi dovha vha ḓa u renga.

 Vhaṅwe mukegulu vha tshilikadzi vhane vha pfi Vho-Lusu vha ngei Liberia, vha dzula na vhathu vhaṱanu muṱani wavho. Musi vha tshi khou ḽa zwiḽiwa zwa nga matsheloni na u vhala ndimana ya ḓuvha, muḓuhulu wa Vho-Lusu a re na miṅwaha ya sumbe o vhona uri a hu tshee na zwiḽiwa. O vhudzisa a ri: “Ri ḓo ḽa mini?” Vho-Lusu vho vhudza muḓuhulu wavho uri vho no rabela kha Yehova uri a vha thuse nahone vha na vhungoho ha uri u ḓo vha thusa. Nga ḽeneḽo ḓuvha nga masiari, Vho-Lusu vho founelwa nga vhahulwane vha tshivhidzo uri vha ḓe vha dzhie zwiḽiwa. Vho-Lusu vho ri: “Muḓuhulu wanga o amba uri u a tenda uri Yehova u a pfa na u fhindula thabelo ngauri o fhindula yanga.”

 Muṅwe mufumakadzi wa Democratic Republic ya Congo u dzula tsini na muṅwe muṱa wa Dziṱhanzi. Musi a tshi vhona wonoyo muṱa wa Ṱhanzi dza Yehova u tshi khou ṋewa zwiḽiwa nga vhatendi ngavho, o ri: “Ri khou ḓo vha Ṱhanzi dza Yehova musi Corona i tshi fhela ngauri vho ṱhogomela vhahavho nga zwifhinga zwi konḓaho.” Munna wawe o mu vhudzisa a ri: “Ni khou ṱoḓa u vha Ṱhanzi ya Yehova nga nṱhani ha uri ni khou ṱoḓa zwiḽiwa?” O fhindula a ri: “Hai, fhedzi zwenezwo zwiḽiwa ndi vhuṱanzi ha uri vha a funana zwa vhukuma.”

 Nga nṱhani ha miṋeelo ya vhoiwe i bvaho mbiluni, Ṱhanzi dza Yehova vha khou kona u thusa nga u bonya ha iṱo vhahashu vhane vha khou ṱoḓa thuso kha tshino tshifhinga tsha dziedzi ḽa Corona. Ri a livhuwa miṋeelo ine ya ṋeelwa hu tshi shumiswa nḓila dzo sumbedzwaho kha donate.mt1130.com.