Kaini ane a vha tanzhe kha vhavhingani vha u thoma, o vhinga muṅwe wa khaladzi dzawe kana shaka ḽa tsini ḽa tshisadzini. Yeneyi phetho i swikelelwa nga u ṱhogomela zwine Bivhili ya zwi amba nga Kaini na muṱa wahawe.

Mafhungo nga ha Kaini na muṱa wahawe

•   Vhathu vhoṱhe ndi vhana vha Adamu na Eva. Mudzimu ‘o ita uri kha muthu muthihi [Adamu] hu bve tshakha dzoṱhe, uri vha dzule ḽifhasini ḽoṱhe.’ (Mishumo 17:26) Eva, mufumakadzi wa Adamu, o vha “mme-a-vhoṱhe vha tshilaho.” (Genesi 3:20) Nga zwenezwo, Kaini u fanela u vha o vhinga muṅwe wa vhana vha Adamu na Eva.

•   Kaini na murathu wawe Abele vho vha vhe vhana vha u thoma vha Eva. (Genesi 4:​1, 2) Musi Kaini a tshi pandelwa nge a vhulaya murathu wawe, o gungula a ri: “Ane a ngwana u ḓo mbulaya.” (Genesi 4:14, NW) Kaini o vha a tshi khou ofha nnyi? Bivhili i amba uri Adamu o mbo ḓi “beba vhatuka na vhananyana.” (Genesi 5:4) Zwi tou vha khagala uri vhenevha vhaṅwe vhana vha Adamu na Eva vho vha vha tshi nga vhulaya Kaini.

•   Mathomoni a ḓivhazwakale ya vhathu, u vhinga kana u vhingwa nga shaka zwo vha zwo ḓowelea. Sa tsumbo, Abrahamu, munna a fulufhedzeaho o vhinga khaladzi awe. (Genesi 20:12) Mbingano dzo raloho dzo thoma u thivhelwa kha Mulayo wa Mushe, we wa vha hone miṅwaha ya maḓana nga murahu ha misini ya Kaini. (Levitiko 18:9, 12, 13) Zwi vhonala u nga vhana vha vhathu vho vhinganaho vhe mashaka nga tshenetsho tshifhinga vho vha vha sa holefhali u fana na zwino.

•   Bivhili i amba nga ha mafhungo a Adamu, Eva na muṱa wavho e ḓivhazwakale ya vhukuma. Zwidodombedzwa zwa mutevhe wa lushaka u swika kha Adamu zwi wanala kha maṅwalwa a vhaḓivhazwakale Esera na Luka, hu si kha bugu ya Genesi fhedzi yo ṅwalwaho nga Mushe. (Genesi 5:3-5; 1 Koronika 1:1-4; Luka 3:38) Vhaṅwali vha Bivhili vha amba nga ha mafhungo a Kaini sa tshiitea tsha ḓivhazwakale.​—Vhaheberu 11:4; 1 Yohane 3:12; Yuda 11.