Ee, Bivhili i na vhuṱanzi vhu pfalaho ha uri Mudzimu u hone. I ri ṱuṱuwedza uri ri vhe na lutendo kha Mudzimu nga u shumisa “ṱhalukanyo”na “vhuṱali hashu,” hu si nga u sokou tenda zwine zwa funziwa nga dzikerekeni. (Vharoma 12:1; 1 Yohane 5:20) Zwithu zwi tevhelaho zwi re Bivhilini zwi sumbedza uri Mudzimu u hone:

•   Nḓila ye ḽifhasi ḽa sikwa ngayo ḽi na zwithu zwi tshilaho zwi sumbedza uri hu na Musiki. Bivhili i ri: “Ndi ngoho uri nnḓu iṅwe na iṅwe i na mufhaṱi, fhedzi o fhaṱaho zwoṱhe ndi Mudzimu.” (Vhahevheru 3:4) Zwo leluwa u pfesesa zwenezwi nahone vhunzhi ha vhathu vho funzeaho vha a zwi tenda. a

•   Zwi a pfala uri ri ṱoḓe u ḓivha uri ro sikelwa mini. Naho ri na zwoṱhe zwine ra zwi ṱoḓa uri ri kone u tshila, a ri fushei u swika ri tshi ḓivha uri ro sikelwa mini. Zwenezwi zwi tshimbidzana na zwine Bivhili ya zwi amba uri ndi u “ṱoḓa u ḓivha Mudzimu.” Zwi a pfala uri ri ṱoḓe u ḓivha Mudzimu na u mu shumela. (Mateo 5:3; Nzumbululo 4:11) Zwenezwi ndi vhuṱanzi ha uri Mudzimu u hone na uri ndi Musiki ane a ri funa, a ṱoḓaho uri ri mu ḓivhe na u mu shumela.​—Mateo 4:4.

•   Vhuporofita vhu re Bivhilini ho ṅwaliwa hu tshee na miṅwaha minzhi uri zwi itee nahone ho itea nga nḓila ye ha porofitiwa ngayo. Nḓila ye honoho vhuporofita ha itea ngayo na nḓila ye ha dodombedzwa ngayo zwi sumbedza uri zwo porofitiwa nga Mudzimu ane a ḓivha zwine vhathu vha sa zwi ḓivhe.​—2 Petro 1:21.

•   Vhaṅwali vha Bivhili vho vha vha tshi ḓivha mafhungo a zwa saintsi e a vha a sa ḓivhiwi nga vhathu vhe vha tshila tshifhingani tshavho. Sa tsumbo, vhathu vhanzhi vha zwifhingani zwa kale, vho vha vha tshi tenda uri Lifhasi ḽo tikwa nga tshipuka, tshi ngaho sa nḓou, nguluvhe ya ḓaka kana mboho. Fhedzi Bivhili i ri Mudzimu o fhahea ‘ḽifhasi tshikhalani.’ (Yobo 26:7) Bivhili i dovha ya amba uri ḽifhasi ḽo ita sa “khungulu.” (Yesaya 40:22, ṱhaluso i re magumoni a siaṱari.) Vhathu vhanzhi vha tenda uri vhaṅwali vha Bivhili vho ḓivha zwenezwi zwithu ngauri vho vhudzwa nga Mudzimu.

•   Bivhili i fhindula vhunzhi ha mbudziso dzi konḓaho. Arali vhathu vha sa wana phindulo dza dzenedzi mbudziso, vha nga zwi dzhia uri a hu na Mudzimu. Sa tsumbo: Arali Mudzimu e na lufuno nahone e Ramaandaoṱhe, ndi ngani shangoni hu na vhuvhi na tshengelo? Ndi ngani kereke dzi tshi ita uri vhathu vha ite zwithu zwivhi nṱhani ha u ita zwivhuya?​—Tito 1:16