Zwikhokhonono zwa maḓini zwine zwa nambatela kha mutumbu wa tshikepe zwi vhangela vhareili vha zwikepe thaidzo. Zwenezwi zwikhokhonono zwi ita uri tshikepe tshi tshi tshimbile nga luvhilo luṱuku, zwa ita uri tshi shumise mapfura manzhi nahone tshikepe tshi tea u vha tsho pakiwa uri tshi kunakiswe. Vhorasaintsi vha khou ṱoḓa nḓila dza u lugisa yeneyi thaidzo kha mupo.

 Humbulani nga ha hezwi: Vhaṱoḓisisi vho wana uri lukanda lwa khovhe ya vhimbi i vhidzwaho long-finned pilot (Globicephala melas) lu a kona u ḓikunakisa. I na zwigodi-godi zwiṱuku zwine zwa ita uri na zwikhokhonono zwa maḓini zwi balelwe u nambatela kha lukanda lwa yeneyi khovhe. Vhukati ha zwenezwi zwigodi-godi hu na gel kana mapfura o no vhulaya zwenezwi zwikhokhonono na zwitzhili. Musi yeneyi khovhe i tshi ḓuvhudza i mbo ḓi vha na gel ntswa kana mapfura maswa.

 Vhorasaintsi vha ṱoḓa u shumisa maitele a yeneyi khovhe a u ḓikunakisa kha mutumbu wa tshikepe. Kale ho vha hu tshi shumiswa pennde u itela u thivhela zwenezwi zwikhokhonono. Fhedzi dzenedzi pennde dzo mbo ḓi thivhelwa uri dzi si tsha shumiswa ngauri dzi na khombo kha zwithu zwa maḓini. Vhaṱoḓisisi vho humbula uri ndi khwine vha tshi tiba mutumbu wa tshikepe nga ḓaraṱa i re na mabuli i re na khemikhaḽa dzi si na khombo. Musi yeneyo khemikhaḽa i tshi pfa maḓi a lwanzheni i mbo ḓi vha gel kana mapfura a nambatelaho ane a tsireledza mutumbu wa tshikepe. Nga u ya ha tshifhinga, zwi a fhelela, zwa ita uri zwikhokhono zwe zwa vha zwo nambatela zwi bve. Nga murahu, ha bva gel ntswa kana mapfura maswa ane a tsireledza mutumbu wa tshikepe.

 Ndingo dzo itwaho ḽaborothari dzi sumbedza uri zwenezwi zwi nga fhungudza tshivhalo tsha zwikhokhonono zwo no nambatela kha tshikepe. Nahone zwenezwo zwi nga vhuyedza khamphani dzo no langa zwenezwo zwikepe ngauri u isa zwikepe uri zwi kunakiswe zwi a ḓura vhukuma.

 Inwi ni zwi vhona hani? Naa lukanda lwa wonoyu mufuda wa khovhe ya vhimbi lwo no ḓikunakisa lwo sokou bvelela kana lwo tou sikwa?