“Ndo lingedza u vhala Bivhili fhedzi ndi pfa i tshi nteledzisa ngauri yo lapfesa.”​—Briana ane a vha na miṅwaha ya 15.

Naa ni ḓipfa nga u ralo? Arali zwo ralo heyi thero i nga ni thusa.

•  Ndi ngani ndi tshi fanela u vhala Bivhili?

•  Ndi nga i vhala hani Bivhili?

•  Zwine vhaṅwe vhaswa vha amba

Naa ni vhona u nga u vhala Bivhili zwi a bora? Zwi a pfesesea arali ni tshi ḓipfa nga yeneyo nḓila. Ni nga dzhia Bivhili sa bugu i re na mabambiri manzhi-manzhi o ṅwalwaho nga maipfi maṱuku a si na na zwinepe. Ni nga vhona u nga TV na dzividio ndi zwone zwine zwa takadza.

Kha ri ri no wana bogisi ḽa kale ḽine ḽa hwala zwithu zwa thengo khulu, naa ni nga si ṱoḓe u ḓivha zwi re nga ngomu haḽo?

Bivhili yo hwala madzanga ane a nga ni ṋea vhuṱali vhune ha nga ni thusa uri

• Ni itea phetho dzavhuḓi

• Ni anḓane na vhabebi vhaṋu

• Ni wane khonani dzavhuḓi

• Ni sedzane na mitsiko

Ndi ngani bugu ya kale nga u tou rali i tshi nga ri thusa ṋamusi? Ndi ngauri “Maṅwalo oṱhe o hevhedzwa nga Mudzimu.” (2 Timotheo 3:16) Zwi amba uri vhulivhisi vhu re Bivhilini vhu bva kha muthu wa khwiṋe khwiṋe u fhira vhoṱhe.

Iṅwe nḓila ndi nga u i vhala yoṱhe. Zwenezwi zwi nga ni thusa u ḓivha uri Bivhili i amba nga ha mini. Hu na nḓila nnzhi dza u vhala Bivhili. Ṱhogomelani nḓila mbili dzi tevhelaho:

•   Ni nga vhala bugu dza 66 nga u tevhekanya hadzo, u bva kha Genesi u swika kha Nzumbululo.

•   Ni nga vhala Bivhili nga u tevhekanya ha zwiitea nga nḓila ine zwa tshimbidzana ngayo.

Zwine na nga ita: Ṱhumetshedzo ya A7 kha Ṱhalutshedzelo Ya Shango Ḽiswa i sumbedza zwiitea zwihulwane zwa vhutshilo ha Yesu ha musi e kha ḽifhasi.

Iṅwe nḓila ya u vhala Bivhili ndi nga u livhisa ṱhogomelo kha zwiitea zwine zwa tshimbidzana na zwine na khou sedzana nazwo. Sa tsumbo:

• Ni nga takalela u wana khonani dzavhuḓi? Vhalani mafhungo a Yonathani na Davida. (1 Samuele, ndima 18-20) Gudani uri ndi mini zwo itaho uri Yonathani a ṱoḓe u vha khonani ya Davida.

• Naa ni ṱoḓa u ḓivha nḓila dza u kunda milingo? Vhalani nga ha nḓila ye Yosefa a kunda ngayo milingo. (Genesi ndima 39)

• Ni nga takalela u ḓivha uri u rabela zwi nga ni thusa hani? Vhalani nga ha Nehemia. (Nehemia, ndima 2) Sedzani uri thabelo ya Nehemia yo thusa hani.

Zwine na nga ita: Musi ni tshi vhala Bivhili itani vhungoho ha uri hune na vha hone a hu na phosho.

Nḓila ya vhuraru ya u vhala Bivhili, ndi nga u khetha tshiitea kana phisalema na i vhala, nga murahu na ḓivhudzisa uri i ni kwama hani. Ni tshi fhedza u vhala ni nga ḓivhudzisa mbudziso dzi ngaho hedzi:

•   Ndi ngani Yehova o ita uri enea mafhungo a ṅwalwe Bivhilini?

•   Enea mafhungo a ngudisa mini nga ha nḓila ine Yehova a vha ngayo kana nḓila ine a ita ngayo zwithu?

•   Ndi nga shumisa hani zwenezwi zwithu vhutshiloni hanga?

Zwine na nga ita: Ṅwalani ḓuvha ḽine na ḓo thoma ngaḽo u vhala Bivhili yaṋu.