CAPÌTOLO 8

Come che posso gaver veri amighi?

“Se son cativa go de bisogno de parlar con qualchedun, se son triste go de bisogno de qualchedun che el me console, se son contenta me piase dirghe a nantra persona. Mi go pròpio bisogno de gaver amighi.” — Brittany.

SE ga dito che i toseti i ga de bisogno de coleghi par giugar, ma i gióveni i ga de bisogno de amighi. Quala zela la difarensa?

Un colega l’è quel che te fà compagnia.

Un amigo l’è quel che el pensa compagno ti sora quel che l’è giusto e sbalià.

La Bìblia la dise anca che “un vero amigo el ama tuto el tempo e el deventa come un fradel quando ghen’è situassion difìcile”. (Proverbi 17:17) Qua no l’è drio dir sol de un colega par giugar.

Una verità: Intanto che te vien grando te ghè bisogno de amighi

1. che i gàpie bone qualità

2. che i gàpie boni valori

3. che i te giute far quel che l’è giusto

Domanda: Come catar amighi cossita? Vedemo queste tre robe.

1 — Bone qualità

Cossa te ghè de saver. Gnanca tuti quei che i dise che i ze amighi i ze amighi de verità. La Bìblia la dise che ghen’è amighi che “i ze pronti par finirse fora un colaltro”. (Proverbi 18:24) Questo podaria esser fadiga de creder. Ma proa pensar: gheto mai bio un amigo che el ga fato finta esser to amigo? O che el ga parlà qualcossa che no l’è mia vero o che el te ga parlà par de drio? Fursi pol esser che te ghè perso un poco la confiansa dei to amighi. a Ma ricòrdate che el pi importante no l’è quante amicìssie che te ghè ma come che le ze.

Cossa te pol far. Scoli amighi che i gàpie qualità che te volarissi gaver.

“Tuti i pensa bele robe sora la me amiga Fiona. Mi vui che i parle ben anca de mi. Vui gaver una bona reputassion come ela. Questa la ze una roba che me piase tanto.” — Yvette, 17 ani.

Proa far questo.

1. Ledi Gàlati 5:22, 23.

2. Domandate: ‘I me amighi i ga qualità che fà parte del fruto del spìrito?’

3. Scrivi soto el nome dei to meio amighi. Nte una banda scrivi una qualità che cada un el ga.

Nome

․․․․․

Qualità

․․․․․

Sugestion: Se te te ricordi sol de robe rugne, fursi saria ora de ndar in serca de amighi meio!

2 — Boni valori

Quel che te ghè de saver. Se te sì tanto ansioso de far amighi, fursi sarà pi fadiga far bone scòlie. La Bìblia la dise che la persona che la va insieme coi stùpidi no la finirà ben. (Proverbi 13:20) La parola “stùpidi” no vol mia dir persone che a scola le ga note basse o no le ze mia inteligente. Pitosto, le ze persone che no le ghe dà valor al saver e no le ghe bada se quel che le fà l’è giusto o nò. No l’è questo el tipo de amighi che te ghè de bisogno!

Cossa te pol far. Fà bone scòlie. No stà far amicìssia col primo che riva. (Salmo 26:4) Questo no vol dir che te ghè de giulgar le persone, ma che te ghè de capir “la difarensa intrà la persona giusta e la persona rugna, intrà quel che el serve a Dio e quel che no lo serve mia.” — Malachia 3:18.

“Ringràssio i me genitori che i me ga giutà a catar fora amighi dela me età e che i ga una bona amicìssia con Geovà.” — Christopher, 13 ani.

Rispondi a queste domande:

Quando son con i me amighi resto preocupà che lori i me fae far robe sbaliade?

□ Si

□ Nò

Fao fadiga mostrarghe i me amighi ai me genitori parché cato che a lori fursi no i ghe piaseria?

□ Si

□ Nò

Sugestion: Se te ghè rispondesto ‘Si’ a queste domande, va in serca de amighi con meio valori e che i sìpie boni esempi.

3 — Amighi che i te giuta a far quel che l’è giusto

Quel che te ghè de saver. La Bìblia la dise: “Le brute compagnie le rovina i bruti comportamenti.” (1 Corinti 15:33) Una gióvena de nome Lauren la dise: “I me coleghi de scola sol i me acetea insieme se mi fesse robe che lori i volea. Mi me sentia sola, par quela go dessidio far le robe che lori i fea sol par gaver la so amicìssia.” Lauren la ga capio che quando te ghè vè drio ale altre persone, l’è come se te fussi una pessa del tabulero del xadrez, parché ze i altri che i te comanda. Ti te mèriti de pi de questo!

Cossa te pol far. No stà pi esser amigo de persone che seita voler che te fai quel che lore le vol. Se te fè cossita, te gavarè manco amighi, ma te te sentirè meio e te farè altre amicìssie che le te farà ben. — Romani 12:2.

“Clint l’è un me grando amigo. Lu l’è echilibrà e l’è la persona che me incoraia de pi.” — Jason, 21 ani.

Domandate:

Càmbio la me maniera de vestirme e parlar sol par contentar i me amighi?

□ Si

□ Nò

Vao in posti che no i va mia ben sol parché i me amighi i va?

□ Si

□ Nò

Sugestion: Se te ghè rispondesto ‘Si’ a queste domande, domanda aiuto ai to genitori o a persone pi maure. Se te sì una Testimònia de Geovà, va in serca de un ansiano e dighe che te vol aiuto par scòlier amighi che i te giute a far quel che l’è giusto.

[Nota]

TESTO PRINSIPAL

“Ghen’è un amigo che se taca de pi che un fradel.” — Proverbi 18:24.

UNA IDEA

Fà quel che l’è giusto. Alora, le persone che anca le fà quel che l’è giusto le volerà esser to amighi. Questi i ze i meio amighi!

SAVÉITO QUESTO?

Par Dio tute le persone le ze compagne, ma lu el scòlie ben quei che lu el aceta come ‘òspede nela so tenda’, o sia, i so amighi. — Salmo 15:1-5.

COSSA NDARÒ FAR

Par gaver boni amighi mi vao ․․․․․

Queste le ze arquante persone pi vècie che mi me piaseria cognosser meio: ․․․․․

Me piaseria domandar ai me genitori sora questo assunto: ․․․․․

COSSA PÉNSITO?

● Che qualità te ghe dè de pi valor a un amigo, e parché?

● Cossa che te ghè de far par esser un bon amigo?

[Comentàrio]

“Quando i me genitori i me ga insentivà a assar serti amighi, mi go pensà che no volea pi gaver amighi. Mi era contento con quei che gavea. Ma el so consìlio l’è stà bon. Me go nicorto che ghen’era tanti boni amighi.” — Cole

[Quadro]

Proa far cossita

Parla coi to genitori sora amicìssie. Domàndaghe a lori che tipo de amighi i gavea quando i era dela to età. Sarà che i se ciama grami dei amighi che i ga scoliesto? Se si, parché? Domàndaghe cossa che te pol far par no far i medèsimi sbali.

Fà cognosser i to amighi ai to genitori. Se ti no te ghè caro de far questo, domandate: ‘Parché che me sento cossita?’ Sarà che ghen’è qualcossa dei me amighi che no ghe piaseria ai me genitori? Se l’è questo, te ghè de scòlier meio le to amicìssie.

Scolta con atension. Mostra che te te interessi dei to amighi e che te vol el ben de lori. — Filipensi 2:4.

Perdona. No stà spetar perfession. “Tuti noantri sbaliemo tante volte.” — Tiago 3:2.

No stà voler el amigo sol par ti. No ocore star sempre insieme. I veri amighi i ze quei che te sè che i ze pronti quando te ghè de bisogno. — Eclesiasti 4:9, 10.

[Stampa]

Quando te ghè vè drio ale altre persone, l’è come se te fussi una pessa del tabulero del xadrez, parché ze i altri che i te comanda.