Col matrimònio, se fà su una nova fameia. Anca se gavé sempre de amar e rispetar i vostri genitori, adesso par valtri la roba pi importante del mondo la ze el vostro sposo o sposa. Arquanti parenti i cata difìcile acetar questo. Ma i prinsipi dela Bìblia i pol giutarve a mantegner la pace coi parenti e a far pi forte la vostra nova fameia.

COSSA CHE LA BÌBLIA LA DISE: “Daghe onor a to pare e to mare.” (Efesi 6:2) No importa la età, gavé sempre de darghe onor e rispeto ai vostri genitori. Gavé de capir che anca el vostro sposo o sposa, come fiol o fiola, ga de darghe atension ai so genitori. “El amor no l’è mia geloso”; alora no gavé mai de veder come una minassa la relassion del vostro sposo o sposa coi so genitori. — 1 Corinti 13:4; Gàlati 5:26.

COSSA CHE PODÉ FAR:

• No sté mia dir robe come: “La to fameia la sbrontola sempre de mi” o “To mare mai la ghe piase quel che mi fao”.

• Sforséve par veder le robe come che el to sposo o sposa le vede.

COSSA CHE LA BÌBLIA LA DISE: “El omo el assarà so pare e so mare e el se unirà ala so sposa e i due i deventerà una sola carne.” (Génesi 2:24) Dopo che ve sé maridadi, fursi i vostri genitori i cata che i ga ancora de tender de valtri, e magari i vol interessarse del vostro matrimònio pi de quel che i gavaria de far.

Valtri come sposo e sposa gavé de dessider insieme che lìmiti darghe ai vostri genitori. Dopo gavé de dirlo a lori con amor. Podé esser sinsieri e ciari ma con rispeto. (Proverbi 15:1) Con umiltà, passiensa e bontà podé gaver una bela relassion coi vostri parenti e seitar a ‘soportarve un al altro con amor’. — Efesi 4:2.

COSSA CHE PODÉ FAR:

• Se caté che i vostri parenti i se mete massa nela vostra vita, parlé col vostro sposo o sposa quando sé tranquili.

• Gavé de dessider insieme come ndaré infrontar questo problema.