Mi volea un mondo sensa ingiustìssia

Ursula Menne la conta la so stòria

Sempre go volesto tanto veder tute le persone esser tratade con giustìssia, par quela son stata metesta in preson nela Alemagna Oriental Comunista. E, par la me sorpresa, l’è stà lì che go imparà sora un mondo sensa ingiustìssia. Vao spiegar meio.

MI SON nassesta in 1922 nela cità de Halle, nela Alemagna, che la ga de pi de 1.200 ani de stòria scrita. La ze intorno de 200 km al sudoeste de Berlin e la ze stata una dele prime cità ndove la religion protestante la ze deventada forte. La me sorela, Käthe, la ze nassesta in 1923. El me pare el laorea nel esèrsito e la me mare la cantea nel teatro.

La me voia de finir cole ingiustìssie la ze vegnesta del me pare. Par esémpio, quando lu l’è ndà via del esèrsito, el ga comprà un mercà. E la pi granda parte de quei che ndea comprar là i era poareti. Lori i ghe fea pecà, par quela, lu el ghe vendea par lori pagar dopo. Ma par via dela so generosità, el mercà l’è ndà a bancarota. Mi gavaria de ver imparà con questa speriensa che lotar contra la ingiustìssia l’è pi fadiga de quel che se pensa. Ma l’è difìcile far i gióveni perder la voia che i ga de cambiar el mondo.

Dela me mare l’è vegnesto el don dela arte. L’è stà con ela che mi e la Käthe ghemo imparà sora mùsica, cantar e balar. Mi ero una toseta piena de vita, e mi e me sorela gaveino una bela vita, fin 1939.

El scomìnsio de un tormento

Dopo del insegno fondamental, mi go fato un corso de balè, ndove go anca imparà la Ausdruckstanz, che vol dir dansa de spression, che la Mary Wigman la insegnea. Ela la ze stata una dele persone che ga scominsià la dansa spressionista, una maniera de balar che el artista el dopera la dansa par spressar i so sentimenti. Anca go scominsià a pintar quadri, cossita la me vita de tosa la ze stata piena de alegria e de emossion, e mi go imparà tante robe. Ma tuto l’è cambià in 1939 quando la Seconda Guera Mondial la ga scominsià. Nantro bruto colpo l’è stà in 1941, quando el me pare l’è morto de tuberculose.

La guera la ze un tormento. Mi gavea sol 17 ani quando la ga scominsià e me parea che el mondo l’era restà mato. Go visto tante persone, che fin quel tempo le era normai, perderse drio le idee del Nazismo. Tanti i ze deventadi poareti, e ze vegnesta la morte e la destrussion. Nela guera, le bombe le ga fato tanto dano ala nostra casa e go perso tanti dela me fameia.

In 1945, nel fin dela guera, mi, me mama e me sorela ancora èrino de star in Halle. Ma mi ero belche maridada e gavea una toseta, sol che el me matrimònio no’l ndea ben. Mi e me sposo se ghemo spartio, e me ga tocà laorar con dansa e pintura par comprar quel che mi e me fiola gaveino de bisogno.

Dopo dela guera, la Alemagna la ze stata spartia in quatro tochi e la nostra cità la ze restada ndove la Union Soviètica la governea. Alora, tuti ghe ga tocà costumarse col comunismo. In 1949, la Alemagna Oriental, ndove èrino de star, la ze deventada la Repùblica Democràtica Alemana (RDA).

La vita soto el Governo Comunista

In quei ani, me mama la ze restada malada e me ga tocà tenderla. Mi go scominsià a laorar nte un scritòrio del governo. Intanto che laorea lì, mi go cognossesto arquanti studianti che no i era mia de acordo col governo. Lori i proea far le persone darghe atension ale ingiustìssie del governo. Par esémpio, el pare de un gióveno el gavea fato parte del partido nazista. E par quela, una università no la ga assà quel gióveno studiar lì. Mi cognossea tanto ben quel gióveno, parché sempre soneino mùsiche insieme. Mi me domandea: ‘Parché che lu el gavea de pagar par quel che so pare el gavea fato de sbalià?’ Go scominsià a passar ancora de pi tempo con quei studianti e go dessidio ndar con lori nei so protesti. Una volta, go fin tacà foieti ntele scale davanti de un tribunal.

El me senso de giustìssia l’è stà ancora de pi ofendesto par via de arquante carte che mi go bio de scriver nel me laoro come secretària dela Comission Regional de Pace. Una volta, par motivi polìtichi, la comission la ga volesto mandar material de propaganda comunista par un omo vècio che l’era de star nela Alemagna Ossidental, sol par far le autorità gaver dubi sora quel omo. Son restada tanto cativa cola ingiustìssia che i volea far a quel omo che go sconto i materiai nel scritòrio. Cossita, lori mai i ze stati mandadi.

“La pedo persona de questo posto” la me ga dato speransa

In giugno de 1951, due òmini i ze vegnesti rento el me scritòrio e i ga dito: “Te sì presa.” I me ga metesto nela preson che i ciamea de Roter Ochser, o Boi Rosso. Un ano dopo, son stata condanada par un crime contra el Stado. Un studiante el me ga tradio e el ga contà ala Stasi, la polìssia secreta, sora el me protesto coi foieti. Son stata condanada a 6 ani de preson. In quel tempo, son restada malada e i me ga metesto nel ospedal dela preson, insieme de 40 done. Dopo de veder tanta gente avelia, son restada in pànico. Son ndata svelta ala porta e ghe go dato un pugno.

El guarda el ga domandà: “Vuto che?”

Go osà: “Me toca ndar via de qua! Te pol meterme nela solitària se ghe ocore. Ma assame ndar via de qua!” Ma lu no’l me ga badà. Poco tempo dopo, go visto una dona che la era difarente dele altre. Mi vedea nei so oci che la sentia tanta pace. Alora, me go sentà dela so banda.

Par la me sorpresa, ela la ga dito: “Se te senti darente de mi, l’è meio tenderte. Le altre le pensa che mi son la pedo persona de questo posto parché mi son Testimònia de Geovà.”

In quel tempo, mi no savea che el Stado Comunista el vedea le Testimònie de Geovà come nemighe, ma mi savea che ghen’era due Studianti dela Bìblia (che l’era come le Testimònie de Geovà le era ciamade vanti) che i visitea me pare tante volte quando mi ero una toseta. Fin me ricordo che me pare el ga dito: “I Studianti dela Bìblia i ga rason!”

Go piandesto de alìvio quando go cognossesto quela cara dona, che la gavea nome Berta Brüggemeier. Mi ghe go dito: “Par piaser, parlame sora Geovà.” De quel momento avanti, noantre resteino tanto tempo insieme e parleino tanto sora la Bìblia. Go imparà tante robe. Par esémpio, go imparà che el vero Dio, Geovà, l’è un Dio de amor, giustìssia e pace. Anca go imparà che lu el ndarà indrissar tute le robe brute che le persone rugne le ga fato. El Salmo 37:10, 11 dise: “Ancora un poco, e i rugni no i ghen sarà pi. . . . Ma i mansi i sarà paroni dela tera, e i gavarà tanta alegria par via dela granda pace.”

Libertà!

Son stata liberta in 1956, dopo de sinque ani de preson. Sinque giorni dopo, go scampà via dela RDA par viver nela Alemagna Ossidental. In quel tempo, mi belche gavea due fiole, Hannelore e Sabine, che le ze ndate con mi. Lì, mi e me sposo se ghemo divorsiadi e go catà le Testimònie de Geovà nantra volta. Intanto che studiea la Bìblia, go visto che me tochea far tanti cambiamenti par viver de una maniera che ghe piase a Geovà. Go fato questi cambiamenti e son stata batesada in 1958.

Dopo, me go maridà nantra volta, sol che adesso con una Testimònia de Geovà — Klaus Menne. Mi e Klaus ghemo bio un matrimònio maraveioso e ghemo bio due fioi, Benjamin e Tabia. Ma me despiase dir che Klaus l’è morto nte un assidente fà intorno de 20 ani e me go mai pi maridà. Ma la speransa dela ressuression la me dà tanto consolo, parché mi sò che i morti i tornarà a viver ntel Paradiso, qua ntela tera. (Luca 23:43; Ati 24:15) Nantra roba che la me consola tanto l’è saver che me quatro fioi i serve a Geovà.

Col me stùdio dela Bìblia, go imparà che sol Geovà el pol portar la vera giustìssia. Lu no l’è mia come i umani. Lu el ghe dà atension a tuto quel che sucede con noantri, fin pìcole robe che le persone no le vede mia. Saver che Geovà l’è cossita me dà pace adesso e ancora de pi quando vedo o infronto una ingiustìssia. Eclesiasti 5:8 dise: “No stà spaventarte se quel che el ga autorità nela to region l’è drio far el poareto sofrir, o se no l’è drio dar ale persone el dirito de esser giulgade con giustìssia. Parché qualchedun che el ga ancora de pi autorità che lu l’è drio vardarlo, e sora questi ghen’è anca altri che i ga ancora de pi autorità.” Sicuro che no ghen’è nissun che el ga de pi autorità che el nostro Creador. Ebrei 4:13 mostra che no se pol sconder gnente de Dio, parché lu el vede tuto.

Quel che go imparà in quasi 90 ani de vita

Dele volte le persone le me domanda come l’era la vita soto i governi del Nazismo e del Comunismo. No l’era mia fàcile viver soto gnanca un dei due. Compagno a tuti i altri governi, lori sol i mostra che i umani no i ze mia boni de governarse. La Bìblia la dise de maniera ciara che i òmini i governa altri òmini par el so pròpio mal. — Eclesiasti 8:9.

Quando mi ero gióvena e inossente, mi catea che i umani i saria boni de governar con giustìssia. Ma adesso capisso che sol el nostro Creador el pol far el mondo gaver vera giustìssia. Lu lo farà quando el finirà fora con tute le persone rugne e el ndarà meter el so governo qua ntela Tera nele man del so Fiol, Gesù Cristo, che sempre el fà quel che l’è meio par i altri. La Bìblia la dise sora Gesù: “Ti te ghè amà la giustìssia e te ghè bio òdio de quel che l’è contra la lege.” (Ebrei 1:9) Mi ringràssio tanto a Dio che el me ga ciamà par cognosser questo Rè giusto e bon, e mi son premosa de viver par sempre soto el so governo!

[Ritrato]

Cole me fiole Hannelore e Sabine dopo de rivar ala Alemagna Ossidental

[Ritrato]

Ancoi, col me fiol Benjamin e la so dona, Sandra