STÙDIO 27
CÀNTICO 73 Dane coraio
Gàpia coraio compagno a Zadoche
‘Zadoche l’era un bravo e coraioso gióveno.’ — 1 CRÓ. 12:28.
COSSA CHE NDAREMO IMPARAR?
Ndaremo veder come che el esémpio de Zadoche ne giuta a gaver coraio.
1-2. Chi che l’era Zadoche? (1 Cróniche 12:22, 26-28)
PROA pensar in quel che ga sucedesto quando Davi l’è deventà rè de Israel. Ghen’era de pi de 340 mila òmini nei monti darente Ebron. Par tre giorni, lori i se parlea, i ridea insieme e i lodea a Geovà con càntichi. (1 Cró. 12:39) Insieme a quela mùcia de gente, ghen’era un gióveno de nome Zadoche. Anca se lu no’l fusse una persona tanto importante in quela època, Geovà el ga volesto che el so esémpio el fusse scrito nela Bìblia. (Ledi 1 Cróniche 12:22, a 26-28. b) Ma chi che l’era Zadoche?
2 Zadoche l’era un sasserdote che el laorea insieme a Abiatar, el prinsipal sasserdote. Geovà ghe ga giutà a gaver tanta sabedoria e a capir quel che ghe piasea. (2 Sam. 15:27) Par quela, le persone ghe domandea consili a Zadoche quando ghe ocorea. Zadoche anca el gavea tanto coraio. In questo stùdio, ndemo imparar sora el so coraio.
3. (a) Parché che noantri ghemo bisogno de coraio? (b) Cossa che ndaremo imparar in questo stùdio?
3 In questi ùltimi giorni, Sàtana l’è drio proar finir fora cola nostra fede in Geovà come mai prima. (1 Pie. 5:8) Par quela, ne ocore gaver tanto coraio intanto che spetemo che Geovà el finissa con Sàtana e questo bruto mondo. (Sal. 31:24) Adesso, ndemo veder de che tre maniere podemo gaver coraio compagno a Zadoche.
SÌPIA LEAL AL REGNO DE DIO
4. Parché che ghemo bisogno de coraio par seitar leai al Regno de Dio? (Varda anca el ritrato.)
4 Noantri volemo esser leai al Regno de Dio. Ma, par seitar leai, ne toca gaver tanto coraio. (Mat. 6:33) Par esémpio, in questo bruto mondo, ghemo bisogno de coraio par seitar a far quel che Geovà el dise che l’è giusto e a predicar sora le bone notìssie. (1 Tes. 2:2) E come le persone no le ze mia intese sora la polìtica, pol esser che ne fà fadiga no meterse nele robe dei governi. (Gio. 18:36) Par quela, tanti dei nostri fradei i perde capital, i ciapa bote o i ze metesti in preson parché no i se mete nela polìtica e gnanca i va ale guere.
Cossa che te fè quando i altri i parla sora el governo che ghe piase? (Varda el paràgrafo 4.)
5. Parché che Zadoche el gavea bisogno de coraio par giutar Davi?
5 Quando Davi l’è deventà rè, Zadoche l’è ndato a Ebron. Ma invesse de ndar lì sol par far festa insieme ai israeliti, lu l’è ndato pronto par la guera. (1 Cró. 12:38) Lu el volea difender Davi e anca la nassion de Israel dei so nemighi. Pol esser che Zadoche no’l gavea tanta speriensa come un soldà, ma lu l’era pròpio coraioso.
6. Come che Davi l’è stà un bel esémpio de coraio par Zadoche? (Salmo 138:3)
6 Ma cossa ga giutà Zadoche a gaver tanto coraio? Lu l’era sempre insieme de persone brave e coraiose e el ga imparà de quel che lore le fea. Una de queste persone l’è stà Davi. Davi sempre el se fidea in Geovà quando el ndea lotar contra i so nemighi, e el ga mostrà tanto coraio quando el ga comandà el esèrsito de Israel. (Sal. 28:7; ledi Salmo 138:3. c) Par quela che tuti i israeliti i volea che lu el fusse el so rè. (1 Cró. 11:1, 2) Ma ghen’era ancora altre persone intorno a Zadoche, come Geoiada, Benaia, che l’era fiol de Geoiada, e altri 22 paroni de tribo che i ze restadi dela banda de Davi. (1 Cró. 11:22-25; 12:26-28) Questi òmini i era dessididi a proteger Davi e giutarlo a deventar rè de Israel.
7. (a) Che bei esempi de coraio ghemo ancoi? (b) De acordo col vìdeo, cossa che te ghè imparà col esémpio del fradel Nsilu?
7 Noantri podemo gaver coraio se studiemo el esémpio dei servi de Geovà che i ga bio coraio e che i ga seità leai al Regno de Dio. Par esémpio, el nostro Rè Gesù mai el ga acetà meterse nela polìtica del mondo de Sàtana quando l’era qua nela Tera. (Mat. 4:8-11; Gio. 6:14, 15) Lu sempre el ga domandà el aiuto de Geovà par gaver coraio e forsa par far quel che l’è giusto. E ancoi, anca ghemo el esémpio de tanti fradei gióveni che no i aceta mia ndar al esèrsito e gnanca meterse nele robe dei governi. Te pol veder le speriense de questi fradei nel jw.org. d
GIUTA I TO FRADEI
8. Quando che i ansiani i ga bisogno de mostrar coraio?
8 Ne piase tanto giutarse un al altro. (2 Cor. 8:4) Ma, dele volte, ne ocore de coraio par giutar i nostri fradei. Par esémpio, i ansiani i mostra tanto coraio par giutar i so fradei quando ghen’è una guera. Lori ghe ocore de coraio par incoraiar i so fradei, portarghe Bìblie, publicassion, robe de vestir, robe de magnar e catarghe un posto de star. Come i ansiani i ama tanto i so fradei, lori i ze pronti par giutarli con quel che ghe ocore, anca se i mete in rìscio la so vita. (Gio. 15:12, 13) I ansiani che i mostra questo coraio i fà compagno al esémpio de Zadoche.
9. De acordo con 2 Samuel 15:27-29, cossa che Davi el ga domandà a Zadoche? (Varda anca la ilustrassion.)
9 Varda come che Zadoche el ga mostrà lealtà a Davi e el ga protegesto altri israeliti. Absalon, fiol de Davi, el volea copar so pare par esser rè. (2 Sam. 15:12, 13) Alora, Davi el gavea de suito scampar via de Gerusalen. Lu el ga dito ai so servi: “Levé su, ndemo via, senò Absalon ndarà copar tuti noantri!” (2 Sam. 15:14) Ma intanto che lori i era drio ndar via, Davi el se ga nicorto che qualchedun gavea de restar in Gerusalen par dir cossa che Absalon el ndaria far. Alora Davi el ga domandà a Zadoche e altri sasserdoti che i tornesse a Gerusalen par contarghe cossa che l’era drio suceder. (Ledi 2 Samuel 15:27-29.) e Par far quel che Davi ghe gavea domandà, quei sasserdoti i gavea de esser pròpio atenti parché i era drio risciar la so vita. Come cossita? Absalon l’era tanto violento, el pensea sol in lu stesso e el gavea fin tradio so pare. Alora, proa pensar in quel che lu el faria se el savesse che Zadoche e i altri sasserdoti i era tornadi a Gerusalen par veder cossa che lu l’era drio far e proteger Davi.
Davi el ga domandà a Zadoche de far una roba che risciea la so vita (Varda el paràgrafo 9.)
10. Come che Zadoche e altri i ga protegesto Davi?
10 Par salvar la so vita, Davi el ga domandà aiuto a Zadoche e a Usai, nantro amigo leal. (2 Sam. 15:32-37) Alora, Usai el ga fato finta che l’era dela banda de Absalon e el ghe ga dito come che el podaria copar Davi. Ma quel che Usai el gavea dito a Absalon daria tempo par Davi pareciarse. Dopo, Usai el ga dito a Zadoche e a Abiatar quel che Absalon el ndaria far, e lori i ga parlà a Davi. (2 Sam. 17:8-17) Col aiuto de Geovà, Zadoche e altri sasserdoti i ze stati boni de proteger la vita de Davi. — 2 Sam. 17:21, 22.
11. Come che podemo mostrar coraio compagno a Zadoche quando giutemo i nostri fradei?
11 Ma come che te pol mostrar coraio compagno a Zadoche se i to fradei i ze in perìcolo e i ga bisogno de aiuto? (1) Obedissi ale orientassion. Quando sucede una desgràssia l’è importante esser obediente. Alora, sfòrsate de obedir ale orientassion de Betel. (Ebr. 13:17) La organisassion la ne dise come pareciarse par una desgràssia. Alora, i ansiani sempre i ga de leder queste orientassion par saver come giutar i fradei. (1 Cor. 14:33, 40) (2) Gàpia coraio, ma stà atento. (Pro. 22:3) Pensa ben vanti de far qualcossa e no stà risciar la to vita se no ghe ocore pròpio. (3) Fìdate in Geovà. Ricòrdate che Geovà el vol el meio par ti e par i to fradei. Alora, col so aiuto, te sarè bon de giutarli dela meio maniera.
12-13. Cossa che te ghè imparà de quel che ga sucedesto con Viktor e Vitali? (Varda anca el ritrato.)
12 Varda quel che ga sucedesto con Viktor e Vitali, due ansiani che i ga portà àqua e magnar ai so fradei nela Ucrània. Viktor el ga dito: “Dele volte, scolteino tiri pròpio darente de noantri. Ma ndeino in serca de magnar da par tuto. Un fradel che el gavea un mercà el ga dato tante robe par portar a quei che i gavea de bisogno. Cossita, i fradei i ga bio qualcossa de magnar par un tempo. Ma, intanto che èrino drio meter quel magnar rento el nostro camignon, una bomba la ze cascada intorno de 20 metri darente a noantri. In quel giorno, mi go seità a domandar che Geovà el me desse coraio par no desister de giutar i me fradei.”
13 Vitali el ga dito: “Ghemo bio bisogno de tanto coraio. El primo viaio che go fato ghe ga volesto 12 ore, e go pregà a Geovà tuto el tempo.” Vitali el ga bio coraio, ma l’è stà anca tanto atento. Lu el ga dito: “Go domandà che Geovà el me desse sabedoria e che el me giutesse a capir quel che mi ero bon de far. Mi sol guidea par strade che le autorità le ne disea che podeino ndar. E la me fede la ze restada pi forte quando go visto i fradei e le sorele laorar insieme. Se ghen’era qualcossa par la strada che ne intrighea de ndar avanti, lori i la cavea via. Lori anca i ne dea robe de vestir e de magnar par portar ai fradei e i ne giutea a meter queste robe rento el camignon. E quando ne tochea fermarse, i fradei i ne dea un posto par dormir e qualcossa de magnar.”
Quando brute robe le ze drio suceder e te vol giutar i to fradei, sìpia coraioso, ma stà anca atento (Varda i paràgrafi 12 e 13.)
SEITA LEAL A GEOVÀ
14. Come se sentimo quando una persona che amemo la abandona a Geovà?
14 Sicuro che se sentimo pròpio desanimadi e disgustadi quando qualchedun dela nostra fameia o un caro amigo el abandona a Geovà. (Sal. 78:40; Pro. 24:10) De pi che amemo questa persona, pi fadiga l’è dàrghene fora con questa situassion. Se te sì drio infrontar una roba cossita, el esémpio de Zadoche pol darte la forsa che te ocore. Parché?
15. Parché che Zadoche el ga bio bisogno de coraio par seitar leal a Geovà? (1 Rè 1:5-8)
15 Zadoche el ga seità leal a Geovà anca quando el so caro amigo, Abiatar, no l’è stà pi leal. Cossa che ga sucedesto? Davi l’era belche vècio e darente dela so morte quando so fiol, Adonia, el ga volesto esser rè. Ma, Geovà el gavea belche prometesto che l’era Salomon che el saria rè. (1 Cró. 22:9, 10) Alora, invesse de esser leal a Davi e a Geovà, Abiatar l’è restà dela banda de Adonia. (Ledi 1 Rè 1:5-8.) f Pensa come che Zadoche el se ga sentio de veder el so caro amigo, Abiatar, fermarse de far quel che Geovà el volea. Lori i gavea laorà insieme come sasserdoti par de pi de 40 ani. (2 Sam. 8:17) Zadoche e Abiatar i gavea tendesto dela “Arca del vero Dio” insieme. (2 Sam. 15:29) Lori anca i gavea giutà el rè Davi a far tanti altri laori nela adorassion a Geovà. — 2 Sam. 19:11-14.
16. Cossa che fursi ga giutà Zadoche a seitar leal?
16 Quel che Zadoche el ga fato l’è stà pròpio difarente de Abiatar. Lu el ga seità leal a Geovà e a Davi. Cossa che fursi ga giutà Zadoche a seitar leal? Saver che Davi el se fidea pròpio in lu. Alora, quando Davi el ga savesto quel che Adonia l’era drio far, lu el ga domandà che Zadoche, Natan e Benaia i fesse con che Salomon el deventesse rè. (1 Rè 1:32-34) Nantra roba che fursi ga giutà Zadoche la ze stata veder che Natan e altri servi de Geovà i era leai a Davi. (1 Rè 1:38, 39) Dopo, quando Salomon l’è deventà rè, lu el ga scoliesto Zadoche come prinsipal sasserdote invesse de Abiatar. — 1 Rè 2:35.
17. Come che podemo far compagno a Zadoche se una persona che amemo la abandona la verità?
17 Come che ti te pol far compagno a Zadoche? Se una persona che te ami la abandona la verità, assa ciaro par Geovà che te vol seitar leal a lu. (Gios. 24:15) Prega par domandar el so aiuto e resta insieme a altri servi leai de Geovà. Lu el ndarà darte la forsa e el coraio che te ocore. E ricòrdate che Geovà el ghe dà tanto valor ala to lealtà e che el ndarà benedirte. — 2 Sam. 22:26.
18. Cossa che te ghè imparà de quel che ga sucedesto con Marco e Sidse?
18 Varda quel che ga sucedesto con Marco e Sidse. Le so due fiole le ga dessidio abandonar a Geovà dopo che le ze vegneste grande. Marco el ga dito: “Quando nasse to fiol, te scominsi a amarlo tanto e te farissi de tuto par protegerlo. Par quela, quando to fiol el desside abandonar a Geovà, el to cuor el resta spacà. Ma, Geovà sempre el ne giuta a dàrghene fora. Quando mi son fiaco, la me dona la ga forsa, e quando ela la ze fiaca, mi che son forte.” Sidse la ga dito: “Mai sarìssino boni de dàrghene fora con questa situassion sensa el aiuto de Geovà. Mi son restada tanto desanimada e disgustada parché me sentia in colpa con quel che gavea sucedesto. Alora, go pregà a Geovà par dirghe quel che sentia. Poco tempo dopo, una sorela che no vedea fea tanti ani la ze vegnesta parlar con mi. Ela la ga metesto la so man nele me spale, la me ga vardà in fàcia e la me ga dito: ‘Sidse, ricòrdate che quel che ga sucedesto no l’è mia colpa toa!’ Alora, col aiuto de Geovà, son bona de seitar a servirlo con alegria.”
19. Cossa che te sì dessidio a far?
19 Geovà el vol che tuti i so servi i gàpia coraio compagno a Zadoche. (2 Tim. 1:7) Ma lu no’l vol che te te fidi nela to forsa. Invesse, Geovà el vol che te te fidi nela so forsa. Alora, se sucede qualcossa e te ghè bisogno de coraio, domanda el aiuto de Geovà. Cossita, el te farà gaver coraio compagno a Zadoche. — 1 Pie. 5:10.
CÀNTICO 126 Sempre forti, firmi e atenti
a (1 Cróniche 12:22) Tuti i giorni, òmini i seitea a rivar par giutar Davi, fin che el acampamento l’è restà grando compagno al acampamento de Dio.
b (1 Cróniche 12:26-28) Ghen’era 4.600 òmini dei leviti. 27 Geoiada l’era quel che comandea i fioi de Aron, e insieme de lu, ghen’era 3.700 òmini, 28 e anca Zadoche, che l’era un bravo e coraioso gióveno, e insieme a lu ghen’era 22 paroni dela fameia de so pare.
c (Salmo 138:3) Te me ghè rispondesto nel di che te go ciamà; Te me ghè fato coraioso e forte.
d Varda el vìdeo I veri cristiani i ga de bisogno de coraio — Par continuar neutri, nel jw.org.
e (2 Samuel 15:27-29) El rè el ga dito a Zadoche, el sasserdote: “No te sì doperà par veder quel che sucederà nel futuro? Torna in pace ala cità. Mené insieme i vostri fioi: Aimaàs, to fiol, e Gionatan, fiol de Abiatar. 28 Mi vao restar nei posti ndove se pol ndar de quel’altra banda del rio fin che qualchedun me porte notìssie vostre.” 29 Alora, Zadoche e Abiatar i ga portà indrio a Gerusalen la Arca del vero Dio, e i ze restadi lì.
f (1 Rè 1:5-8) In quela època, Adonia, fiol de Agite, sempre el se sprosiea e el disea: “Mi vao esser el rè!” Lu el ga mandà che i ghe fesse una careta e i ghe catesse cavalieri, e el ga metesto 50 òmini par corer davanti de lu. 6 Ma so pare no’l ghe gavea mai dito gnente, come: “Parché sito drio far queste robe?” Adonia l’era tanto bel e l’era pi gióveno de Absalon. 7 Adonia el ga discoresto con Gioabe, fiol de Zeruia, e con Abiatar, el sasserdote, e lori i lo ga incorarià e i ghe ga dito che i lo giutaria. 8 Ma Zadoche, el sasserdote, Benaia, fiol de Geioada, Natan, el profeta, Simei, Reì e i bravi soldadi de Davi no i ga volesto giutar Adonia.
