INTORNO del ano 670 vanti de Cristo, la Assìria la era la nassion pi poderosa del mondo. El museo britànico el ga dito che la Assìria la scominsiea in Cipre nel oeste e la finia nel Iran al leste, e che par un tempo anca el Egito fea parte dela Assìria. La so cità pi importante la era Nìnive, che la era la cità pi granda del mondo. Le persone de Nìnive le se sprosiea par causa dele so grande costrussion, bei giardin, grande biblioteche e tante altre robe. Le robe scrite nele parede de Nìnive le mostrea che el rè Assurbanipal e altri rè dela Assìria i disea che i era i “rè del mondo”. In quel tempo, le persone le pensea che nissun mai podaria tor el poder dela Assìria e de Nìnive. *

Ma nela època che Nìnive la gavea de pi poder, el profeta Sofonia el ga dito: ‘Geovà el ndarà finir fora cola Assìria, e Nìnive la restarà seca come el deserto.’ Anca el profeta Naum el ga dito che i ndaria ciavar el argento e el oro de Nìnive, e che la cità la restaria voda e rovinada. El ga anca dito che tuti quei che i la vedesse i ndaria scampar via e dir che la cità la era stata rovinada! (Sof. 2:13; Naum 2:9, 10; 3:7) Quando le persone le ga scoltà queste professie, fursi le ga pensà: ‘Questo no pol mia suceder. Qualchedun el pol tor el poder dela Assìria?’ Nissun l’era bon de creder che questo podaria suceder.

Ma ga sucedesto quel che lori no i spetea! Intorno de 600 ani vanti de Cristo, la Babilònia e la Mèdia le ga tolto el poder dela Assìria. Alora, Nìnive la ze stata abandonada e nissun pi parlea de quela cità. De acordo col Museo de Nova York, un tempo dopo no ghen’era pi gnente de Nìnive parché la era soto tera. Le persone le scoltea parlar de pi sora questa cità nela Bìblia. Una organisassion che la stùdia robe che la Bìblia la parla la dise che intorno dei ani 1800, le persone no le era gnanca sicure che ghen’era una cità de nome Nìnive nel passà. Ma nel ano de 1845, el studioso Austen Henry Layard el ga scominsià a ndar in serca de quel che ghen’era soto tere nel posto ndove l’era la cità de Nìnive. E le rovine che el ga catà le ga provà che Nìnive la era una cità tanto siora e poderosa.

Tute le professie sora Nìnive le se ga realisà. Cossita, semo ancora pi sicuri che le altre professie sora el fin dei governi che ghen’è nela Bìblia anca le ndarà realisarse. — Dan. 2:44; Apo. 19:15, 19-21.