Nel ano 1923, la organisassion la ga cambià tante robe che ga giutà i Studianti dela Bìblia a esser pi unidi. Par esémpio, la revista Torre de Vigia la ga scominsià a far comentari par spiegar el testo che saria studià nela “Riunion par Pregar e Lodar a Geovà”. Lori anca i ga fato un marca giorno par mostrar el testo che el saria studià cada stimana e che càntico i podaria cantar quando i studiesse casa e cola fameia.

Nele riunion, i Studianti dela Bìblia i podea contar qualcossa che gavea sucedesto nela predicassion, ringrassiar a Geovà, cantar o fin far una orassion. La sorela Eva Barney, che la se ga batesà in 1923 con 15 ani, la ga dito: “Se te volei contar una roba, te tochea levarte su e scominsiar a parlar qualcossa cossita: ‘Mi vui ringrassiar el Signor par tute le robe bone che el me ga dato.’” Arquanti fradei i era sempre premosi par parlar qualcossa. La sorela Eva anca la ga dito: “El fradel Godwin l’era un omo belche vècio che sempre el gavea tante robe par ringrassiar el Signor. Ma quando la so dona la vedea che el fradel che l’era drio far la parte deromai l’era stufo de scoltarlo, la ghe dea un tiron nel so casaco e lo fea sentarse.”

Una volta al mese, la riunion la era fata de maniera difarente. La revista Torre de Vigia de 1 de april de 1923 la ga dito: “Valtri gavaré de doperar metà dela riunion par contar quel che ve ga sucedesto nela predicassion e par incoraiarve un al altro. Cossita, valtri ndaré restar pi amighi.”

Charles Martin, che l’era un predicador de 19 ani del Canadà, ghe piasea tanto queste riunion. Lu el ga dito: “I fradei sempre i contea qualcossa che ghe gavea sucedesto nela predicassion. Cossita, ero bon de saver cossa podaria parlar e come risponder se una persona la me fesse domande. L’è stà nele riunion che go imparà a predicar.”

In quel tempo, ghen’era giorni che tuti i era incoraiadi a ndar predicar. Questo laoro ghe ga giutà a restar ancora pi unidi. La Torre de Vigia de 1 de april de 1923 la ga dito: ‘Tuti noantri volemo esser unidi par far el medèsimo laoro. Alora, el marti de 1 de maio  de 1923 l’è el giorno de ndar predicar. Dopo, tuti i primi marti del mese sarà el giorno par far questo laoro. I predicadori de tute le congregassion i ga de ndar.’

Anca Studianti dela Bìblia pi gióveni i ndea ala predicassion. Hazel Burford, che la gavea sol 16 ani, la ga dito: “Nel Bulletin, ghen’era bele idee de come parlar dela Bìblia nela predicassion. a Mi e me nono predicheino tanto.” Ma, gnanca tuti i fradei ghe ga piasesto de quel che la era drio far. La sorela Burford la ga dito: “Un caro fradel pi vècio l’è vegnesto dirme che mi no podaria mia predicar ale persone. In quela època, tanti fradei no i era boni capir parché che tuti i Studianti dela Bìblia, anca quei pi gióveni, i gavea de ndar ala predicassion par lodar a Geovà.” (Sal. 148:12, 13) Ancora cossita, la sorela Burford no la ga mia desistio. Dopo de un tempo, la ze stata convidada par far la Scola de Gileade e la ze ndata servir come missionària nel Panamà. Sicuro che quei fradei i ga capio che anca i gióveni i ga de ndar predicar.

I congressi i ga giutà i fradei a far pi forte la so union. Nei congressi, ghen’era giorni scoliesti par tuti ndar predicar. Par esémpio, nel giorno 31 de marso, in Winnipeg, Canadà, tuti quei che i era nel congresso i ze stati convidadi par ndar predicar in tuta la cità. I fradei i ze stati boni de parlar con tante persone e i ga fato un bel laoro. Alora, nel giorno 5 de agosto, intorno de 7 mila persone le ze ndate a nantro congresso in Winnipeg. Questo congresso l’è stà el pi grando de quela època nel Canadà.

Un dei congressi pi importanti de quel ano l’è stà de 18 a 26 de agosto, in Los Angeles, Califòrnia. Nele stimane prima del congresso, i Studianti dela Bìblia i ga mandà stampar el convite in de pi de 500 mila giornai. I conviti anca i ze stati tacadi su par i tren che i passea in meso la cità e nei auti.

 Nel sabo, 25 de agosto, el fradel Rutherford el ga fato el discorso “Piégore e Cavre”, che el ga spiegà che le piégore le ze quei che i vol imparar de Geovà e i ga la speransa de viver in Paradiso. Lu anca el ga fato un discorso e el ga ledesto una dessision dei Studianti dela Bìblia. Lori i gavea dessidio che i scominsiaria a parlar dele busie dele religion false ale persone e a giutar a tuti quei che volesse imparar de Geovà a vegner fora de “Babilònia, la Granda”. (Apo. 18:2, 4) Dopo, i Studianti dela Bìblia in tuto el mondo i ga dato milioni de libretin che i parlea sora questa dessision.

Nel ùltimo giorno de congresso, ghen’era de pi de 30 mila persone. El fradel Rutherford el ga fato el discorso “Tute le nassion le sarà finide fora nel Armagedon, ma milioni che adesso i vive, mai i morirà.” Come i Studianti dela Bìblia belche i pensea che vegnaria tanta gente, lori i ga doperà un stàdio in Los Angeles che l’era stà pena fato su. Lori anca i ga doperà el sistema de son che ghen’era nel stàdio par esser sicuri che tuti i ndaria scoltar el discorso. Tante persone anca le ga scoltà quel congresso par meso del ràdio.

In quel ano, i Studianti dela Bìblia i ga scominsià a far un grando laoro de predicassion nela Àfrica, nela Europa, nela Ìndia e nela Amèrica del Sud. Par esémpio, un fradel de nome Joseph el ga giutà tanto a far questo laoro nela Ìndia. Anca se lu el gavesse de tender dela so dona e dei so sei fioi, lu el ga giutà a far publicassion nele léngue hindi, tamil, telugu e urdu.

I Studianti dela Bìblia Alfred Joseph e Leonard Blackman, che i era de star in Sera Leoa, i ga scrito par la sede mondial par domandarghe aiuto. Alora, nel giorno 14 de april de 1923, lori i ga ricevesto la risposta. El fradel Alfred el ga dito: “Nte un sabo de sera, un fradel el me ga ciamà par telèfono. Lu el me ga domandà: ‘Sito stà ti che ga domandà aiuto ala sede?’ E mi ghe go rispondesto: ‘Si.’ Alora, quel fradel el me ga dito: ‘Eco! I me ga mandà a mi.’” L’era el fradel Brown. Lu, la so dona, Antonia, e le so due fiole, Louise e Lucy, i era ndati via del Caribe e i era rivadi in Sera Leoa quel giorno. Alora, Alfred e Leonard no ghe tocaria spetar tanto par cognosserli.

 Alfred anca el ga contà: “Nela matina dopo, mi e Leonard èrino drio far el nostro stùdio dela Bìblia dela stimana. Alora, de colpo, ga capità un omo tanto grando nela nostra porta. Quel omo l’era William Brown. Lu ghe piasea tanto parlar dela Bìblia che el volea far un discorso nel giorno dopo.” In manco de un mese, el fradel Brown el ga dato tute le publicassion che el gavea portà insieme. Dopo, lu el ga ricevesto ancora 5 mila libri, ma suito i se ga finidi anca quei. Magari, le persone no lo cognossea mia come un omo che el vendea libri. Invesse, come lu l’era un bravo servo de Geovà e sempre el parlea dela Bìblia nei so discorsi, le persone lo ciamea de Bìblia Brown.

Nela Alemagna, i fradei i ga dessidio cambiar el Betel de Barmen, parché deromai l’era massa pìcolo. Lori anca i gavea sentio dir che el esèrsito dela Frància suito el ndaria rento la cità. Alora, i Studianti dela Bìblia i ze stati boni de catar un posto in Magdeburgo che ghe parea tanto bon par meter tute le màchine par stampar. Nel giorno 19 de giugno, i fradei i ga finio de portar tute le robe fin el novo Betel. Nel giorno dopo che i ga finio de portar tute le robe fin Magdeburgo, i giornai i ga dito che i esèrsiti dela Frància i era ndati rento la cità de Barmen. Cossita, i fradei i ga capio che Geovà l’era drio benedirli e protegerli.

In quel ano, un fradel de nome George Young, che el fea tanti viai par parlar dele bone notìssie, l’è rivà nel Brasil. Lu el ga scominsià un Betel e el ga tacà stampar la revista Torre de Vigia in portoghese. Pochi mesi dopo, lu el gavea belche dato de pi de 7 mila publicassion ale persone. Una dona de nome Sarah Ferguson la ze restada tanto contenta quando el fradel Young l’è ndato visitar la so fameia. Ela la gavea scominsià a leder la Torre de Vigia in 1899, ma no la era mai stata bona de esser batesada. Cossita, un per de mesi dopo, la sorela Ferguson e i so quatro fioi i ze stati batesadi.

Nel fin del ano, la Torre de Vigia de 15 de disembre la ga dito sora la union che ghen’era intrà i Studianti dela Bìblia: “L’è tanto fàcile veder che tuti i ga una forte fede. Alora, volemo seitar a far un bel laoro e a sforsarse par servir a Geovà contenti anca nel pròssimo ano.”

Nel ano dopo, sucederia tante bele robe coi Studianti dela Bìblia. I fradei in Betel i era drio laorar fea tanti mesi in Staten Island, un posto darente de Brooklyn. Quela costrussion la ze stata finida nel scomìnsio de 1924 e la ga giutà i fradei a restar ancora pi unidi e a predicar le bone notìssie de una maniera nova e tanto bela.